Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 54: Argaz yesεan lhiba

Taqsiṭ tis 54: Argaz yesεan lhiba

TEẒRIḌ anwa i d argaz iǧehden akk γef wiyaḍ seg wasmi i d-yexleq Ṛebbi ddunit? D yiwen lqaḍi yeţţusemman Cimcun. D Yahwa i s-yefkan tazmert i gesεa. Uqbel akk a d-ilal Cimcun, Yahwa yenna i yemma-s: ‘Qrib a d-tesεuḍ aqcic. D neţţa ara yezwiren zdat n wat Isṛayil akken a ten-isellek si ger ifassen n Ifilistiyen.’

Cicmun yeţnaγ d yizem

Ifilistiyen d yir lεibad iεacen di tmurt n Kanεan. Sεan ayendin n iεsekṛiwen, yerna sseṛwan lmeḥna i wat Isṛayil. Yiwen wass, asmi iteddu Cimcun γer Ifilistiyen, immuger-ed yiwen yizem i d-iṛeεden fell-as. Lameεna Cimcun yenγa-t, yerna s ifassen-is kan. Yenγa daγen imeyyaten n Ifilistiyen.

Mi gεedda kra n lweqt, Cimcun yeεceq deg yiwet n tmeṭṭut, isem-is Dalila. Imeqranen n Ifilistiyen εuhden ad fken i Dalila, yal yiwen deg-sen, 1 100 iṣurdiyen n lfeṭṭa ma temla-yasen ansi i d-ikka lǧehd yesεa Cimcun. Dalila tebγa idrimen-agi meṛṛa, yerna ur tḥemmel ara maḍi Cimcun d wegdud n Ṛebbi. Ihi, yal ass teţruẓu aqerru n Cimcun akken a s-d-yini ansi i s-d-yekka lǧehd i gesεa.

Dalila akk-d Cimcun

Γer taggara tessaweḍ Cimcun armi i s-d-yenna lbaḍna-s. Yenna-yas: ‘Leεmeṛ yekki lmus n ţţesḍila aqerruy-iw. Yahwa yextaṛ-iyi uqbel akk a d-laleγ akken ad iliγ d aqeddac ur necbi wayeḍ, iwumi qqaren anazari. Lemmer ad seṭṭleγ a yi-iṛuḥ lǧehd-iw.’

Mi twala Dalila belli yeldi-yas ul-is, tesgen Cimcun deg irebbi-s. Mbeεd tessawel i yiwen wergaz i s-iseṭṭlen aqerruy-is. Mi d-yekker Cimcun, yufa-d belli iṛuḥ-as akk lǧehd-is. Imiren usan-d Ifilistiyen, ṭṭfen Cimcun, sderγlen-t, yerna rran-t d akli-nsen.

Cimcun isseγli tigejda-nni

Yiwen wass, Ifilistiyen xedmen tameγra tameqrant akken ad εebden aṛebbit-nsen iwumi qqaren Dagun. Ssufγen-d Cimcun si lḥebs akken ad ḍṣen fell-as. Yuγ lḥal ixlef-ed ucebbub-is. Cimcun yenna i ilemẓi-nni i s-yeṭṭfen afus: ‘Awi-yi ad nnaleγ tigejda iγef ibedd wexxam-agi.’ Mbeεd yeẓẓull Yahwa akken a s-d-yefk lǧehd. Yeṭṭef tigejda-nni n wexxam, dγa iεeggeḍ: ‘Eǧǧ-iyi ad mmteγ nekk d Ifilistiyen.’ Yuγ lḥal 3000 n Ifilistiyen i gellan di tmeγra-nni. Mi gtekka Cimcun s lǧehd-is meṛṛa γef tgejda, yeγli wexxam-nni, dγa mmuten lγaci meṛṛa yellan dinna.

Inezzurfa ixef wis 13 alamma d wis 16.



Isteqsiyen

  • Anwa i d argaz i gγelben akk wiyaḍ seg wasmi i d-texleq ddunit? Anwa i s-yefkan lǧehd-agi?
  • Akken i teţwaliḍ di ţţeswiṛa, acu yexdem Cimcun yiwen wass i yizem ameqran?
  • Akken i teţwaliḍ di ţţeswiṛa, anta lbaḍna i genna Cimcun i Dalila? Amek i t-yesseγli wannect-a ger ifassen n Ifilistiyen?
  • Amek i genγa Cimcun 3000 n Ifilistiyen ass ideg yemmut ula d neţţa?

Isteqsiyen nniḍen

  • Γer Inezzurfa 13:1-14.

    Γef wayen yeεnan ţṛebga n dderya, anwa lemtel yelhan i d-ǧǧan Manuwaḥ ţ-ţmeṭṭut-is i imawlan? (Inez. 13:8; Ahel. 127:3; Ifas. 6:4)

  • Γer Inezzurfa 14:5-9 d 15:9-16.

    Cimcun yenγa izem, yesseγres imurar ijdiden i t-icudden, yenγa 1000 n yemdanen s uγesmar n weγyul. D acu i d-sbeggnent teḥkayin-a γef tezmert n ṛṛuḥ iqedsen?

    Amek i γ-iţεawan ass-a ṛṛuḥ iqedsen? (Inez. 14:6; 15:14; Zaxar. 4:6; Lec. 4:31)

  • Γer Inezzurfa 16:18-31.

    Acu i s-d-tewwi yir lemεacṛa i Cimcun? Acu γ-isselmad wannect-a? (Inez. 16:18, 19; 1 Kurin. 15:33)