Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 52: Gidεun d lεeskeṛ-is

Taqsiṭ tis 52: Gidεun d lεeskeṛ-is

ACU akka i teţwaliḍ dagi? Irgazen-agi meṛṛa d lεeskeṛ n Isṛayil. Wagi yellan γer tama n yergazen-agi yeknan akken ad swen, d lqaḍi Gidεun. Yeţmuqul amek i tessen aman.

Muqel mliḥ mliḥ amek i tessen. Kra seg-sen qerrben udem-nsen γer waman. Lameεna yella yiwen itess aman s ufus-is, swakka yezmer ad iwali ayen iḍerrun di yal tama. Annect-a yesεa azal, axaṭer Yahwa yumeṛ i Gidεun ad yextiṛ wid kan yeţεassan iman-nsen m’ara tessen. Ma d wiyaḍ ilaq-asen ad uγalen s ixxamen-nsen. A nwali acuγer.

At Isṛayil atnan diγen di ccedda tameqrant. Yeḍra-d waya axaṭer ur uγen ara awal i Yahwa. At Midyan zeyyṛen-ţ fell-asen yerna ţqehhiren-ten aṭas. Dγa At Isṛayil suγen γer Yahwa akken a ten-iεiwen. Yahwa yesla-d i leεyaḍ-nsen.

Yahwa yenna i Gidεun a d-yejmeε lεeskeṛ. Dγa Gidεun ijmeε-ed 32 000 n yergazen n ṭṭrad. Lameεna ixṣimen i d-yusan ad nnaγen d Isṛayil llan di 135 000 yid-sen. Γas akka, Yahwa yenna i Gidεun: ‘Bezzaf n yergazen i gellan yid-ek.’ Acimi i d-yenna Yahwa ayagi?

Axaṭer ma rebḥen wat Isṛayil, izmer lḥal a s-inin s tezmert-nsen i ten-γelben. Zemren ad γilen ur ḥwaǧen ara Yahwa akken ad rebḥen. Γef waya i gumeṛ Yahwa i Gidεun: ‘Ini i wid akk yugaden ad kecmen s ixxamen-nsen.’ Mi gexdem aya Gidεun, 22 000 n iεsekṛiwen i gṛuḥen. Qqimen-d kan 10 000 ara yemceččawen nutni d 135 000 n yexṣimen-nni.

Gidεun iţjeṛṛib lεeskeṛ-is

Lameεna, ḥess kan i wayen i s-yenna Yahwa: ‘Mazal-ik tesεiḍ bezzaf n iεsekṛiwen.’ Ihi yumeṛ i Gidεun ad yawi irgazen yeddan yid-es ad swen deg wasif, mbeεd ad yerr s ixxamen-nsen wid akk ara iqerrben udem-nsen γer waman. Yahwa iεuhed: ‘S 300 n yergazen i gεussen iman-nsen m’akken i swan ara kkun-sellkeγ.’

Yusa-d wass umenγi. Gidεun yebḍa 300 n yergazen yeddan yid-es γef tlata n terbaεin. Yefka i yal yiwen deg-sen lbuq, abuqal akk-d usafu sdaxel-is. Uqbel kan ad inṣef yiḍ, zzin-d akken ma llan i wegrur n yeεdawen-nsen. Imiren kan ssendhen lbuq, rẓan ibuqalen-nsen, εeggḍen: ‘Ssif n Yahwa akk-d Gidεun!’ Mi d-dduqqsen yexṣimen-nsen, iffeγ-iten leεqel, tweḥcen. Imiren bdan regglen akken ma llan, dγa rebḥen wat Isṛayil lgirra.

Inezzurfa ixef wis 6 alamma d wis 8.



Isteqsiyen

  • Anta yir liḥala ideg i llan wat Isṛayil, yerna acuγer?
  • Acimi i genna Yahwa i Gidεun belli bezzaf n iεsekṛiwen i gesεa?
  • Acḥal i d-yegran n iεsekṛiwen mi gerra Gidεun s ixxamen-nsen wid-nni yugaden?
  • Akken i teţwaliḍ di ţţeswiṛa, amek i gexdem Yahwa akken ad yessenqes leḥsab n iεsekṛiwen n Gidεun akken a d-qqimen kan 300?
  • Amek i gessewjed Gidεun 300 n yergazen-nni? Amek i rebḥen wat Isṛayil lgirra?

Isteqsiyen nniḍen

  • Γer Inezzurfa 6:36-40.

    Amek i getḥeqqeq Gidεun s lebγi n Yahwa?

    Amek i nezmer ass-a a nissin lebγi n Yahwa? (Lem. 2:3-6; Matta 7:7-11; 2 Tim. 3:16, 17)

  • Γer Inezzurfa 7:1-25.

    Acu i nezmer a nelmed si lemtel n telt meyya-nni n yergazen i gḥezzben m’ara ten-nmettel γer wid-nni ur nḥebbeṛ ara? (Inez. 7:3, 6; Ṛuma 13:11, 12; Ifas. 5:15-17)

    Am telt meyya-nni n yergazen i gḥefḍen γef Gidεun m’akken i t-ţmuqulen, amek i nḥeffeḍ ula d nekni m’ara neţmuqul Gidεun Ameqran, yeεni Σisa Lmasiḥ? (Inez. 7:17; Matta 11:29, 30; 28:19, 20; 1 Buṭ. 2:21)

    Amek i γ-iţεawan wayen yuran deg Inezzurfa 7:21 akken a naf lfeṛḥ di mkul leqdic i γ-d-iţţunefken di tuddsa n Yahwa? (1 Kurin. 4:2; 12:14-18; Yeε. 4:10)

  • Γer Inezzurfa 8:1-3.

    Gidεun yefra amennuγ yekkren d wat Ifrayim. Acu i nezmer a nelmed si temsalt-a m’ara nebγu a nefru ccwal i nesεa nekni d gma-tneγ neγ d weltma-tneγ? (Lem. 15:1; Matta 5:23, 24; Luqa 9:48)