Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 51: Rut d Naεumi

Taqsiṭ tis 51: Rut d Naεumi

DEG Wedlis Iqedsen tella yiwet n tektabt yeţţusemman Rut. Teţmeslay-ed γef yiwet n twacult i gεacen di zzman ideg i ḥekkmen leqwaḍi γef Isṛayil. Rut d yiwet n tlemẓit n tmurt n Muwab; ur telli ara seg wat Isṛayil, agdud n Ṛebbi. Asmi i tessen Yahwa, Ṛebbi n tideţ, tuγal tḥemmel-it aṭas. D yiwet n temγart, yeţţusemman Naεumi i gεawnen Rut aţ-ţissin Yahwa.

Naεumi ţ-ţameṭṭut n wat Isṛayil. Tunag neţţat d wergaz-is d sin warraw-is γer tmurt n Muwab asmi i d-yeγli laẓ γef tmurt n Isṛayil. Dinna i gemmut wergaz-is. Umbeεd, zewǧen warraw-is nutni d snat n tullas n Muwab, yeţţusemman Rut akk-d Σurfa. Lameεna asmi i εeddan wazal n εecṛa iseggasen, mmuten ula d arraw n Naεumi. Acḥal i teḥzen Naεumi neţţat d snat n teslatin-is! Acu ara texdem tura Naεumi?

Yiwen wass, Naεumi teqsed aţ-ţuγal γer tmurt n imawlan-is. Rut akk-d Σurfa ur bγint ara a ţ-ǧǧent, dγa ddant yid-es. Lameεna asmi i lḥant kra n lweqt, Naεumi tezzi γer teslatin-is, tenna-yasent: ‘Uγalemt a yessi s ixxamen n tyemmatin-nkunt.’

Naεumi tsellem γef teslatin-is, tessuden-itent. Dγa ṭṭerḍqent d imeṭṭi axaṭer ḥemmlent aṭas Naεumi. Nnant-as: ‘Xaṭi! A neddu yid-em γer wegdud-im.’ Lameεna Naεumi terra-yasent: ‘Uγalemt kan a yessi. Axiṛ-akunt aţ-ţilimt deg wexxam n lehl-nkunt.’ Ihi Σurfa tekker aţ-ţuγal s imawlan-is, ma d Rut teggumma aţ-ţṛuḥ.

Naεumi tezzi γer Rut, tenna-yas: ‘Aţţan tnuṭ-im Σurfa teṭṭef abrid aţ-ţuγal γer wegdud-is. Ṛuḥ aţ-ţedduḍ yid-es.’ Lameεna Rut terra-yas: ‘Ur iyi-ḥerreṣ ara a kem-ǧǧeγ! Anef-iyi ad dduγ yid-em. Anda teddiḍ ad dduγ, anda tzedγeḍ ad zedγeγ. Agdud-im ad yuγal d agdud-iw, Ṛebbi-inem ad yuγal d Ṛebbi-inu. Anda ara temmteḍ ara mmteγ, dinna daγen ara neṭleγ.’ Mi tesla Naεumi i wannect-a, teḥbes aḥiwet deg-s, teǧǧa-ţ aţ-ţeddu yid-es.

Γer taggara, Rut d Naεumi wwḍent γer tmurt n Isṛayil, zedγent dinna. Rut ur tεeṭṭel ara tṛuḥ aţ-ţexdem di lexla, axaṭer tebda tmegra n temẓin. Yiwen wergaz yeţţusemman Buεaz, yeǧǧa-ţ aţ-ţelqeḍ deg iger-is. Teẓriḍ anta i d yemma-s n Buεaz? D Raḥab-nni n temdint n Yariḥu.

Yiwen was, Buεaz yenna i Rut: ‘Ḥkan-iyi-d kullec fell-am, amek i telhiḍ ţ-ţemγart-im Naεumi. Ẓriγ teǧǧiḍ baba-m, yemma-m ţ-ţmurt anda i tluleḍ akken a d-tṛuḥeḍ γer wegdud werǧin tessineḍ. A m-d-yerr Ṛebbi lxiṛ i txedmeḍ!’

Rut terra-yas: ‘Teččuṛeḍ d lḥanna γur-i a sidi. Tṣebbreḍ-iyi s lehduṛ-ik ḥlawen.’ Buεaz iḥemmel ayendin Rut, ur iεeṭṭel ara yezweǧ yid-es. Acḥal i tefṛeḥ Naεumi s wannect-a! Lameεna, sseεd n Naεumi yennerna akteṛ asmi i d-sεan mmi-tsen amenzu yeţţusemman Σubid. Mbeεd, Σubid yuγal d jeddi-s n Dawed iγef ara d-nemmeslay aṭas γer zdat.

Rut akk-d Naεumi

Adlis n Rut.



Isteqsiyen

  • Acu yewwin Naεumi γer tmurt n Muwab?
  • Anti i d Rut akk-d Σurfa?
  • Acu i ǧuwbent Rut akk-d Σurfa m’akken i sent-tenna Naεumi ad uγalent γer wegdud-nsent?
  • Anwa i d Buεaz? Amek i gexdem lxiṛ i Rut akk-d Naεumi?
  • Isem-is weqcic-nni i d-sεan Buεaz d Rut? Ayγer i γ-ilaq a necfu fell-as?

Isteqsiyen nniḍen

  • Γer Rut 1:1-17.

    Amek i d-tessken Rut leḥmala-s i Naεumi? (Rut 1:16, 17)

    Amek lεeqliya n Rut i tecba swaswa tin i sεant “wulli nniḍen” γer imasiḥiyen n wass-a yesεan asirem ad ḥekmen deg igenni? (Yuḥ. 10:16; Zaxar. 8:23)

  • Γer Rut 2:1-23.

    Anwa lemtel ifazen i d-teǧǧa Rut i telmeẓyin n wass-a? (Rut 2:17, 18; Lem. 23:22; 31:15)

  • Γer Rut 3:5-13.

    Rut teqbel aţ-ţezweǧ d Buεaz wala d ilemẓi. Acu i gxemmem Buεaz γef wannect-a?

    Acu i γ-tesselmad ṭṭbiεa n Rut γef leḥmala? (Rut 3:10; 1 Kurin. 13:4, 5)

  • Γer Rut 4:7-17.

    Amek i zemren yergazen imasiḥiyen n wass-a ad εanden Buεaz? (Rut 4:9, 10; 1 Tim. 3:1, 12, 13; 5:8)