Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 48: Tiḥila n wat Gibεun

Taqsiṭ tis 48: Tiḥila n wat Gibεun

AṬAS n temdinin n Kanεan i gessewjden iman-nsent ad nnaγent tura d Isṛayil. Imezdaγ n temdinin-agi γilen zemren ad rebḥen. Lameεna wid n temdint n Gibεun, ur nebεid ara γef Isṛayil, ur ţxemmimen ara akka. Steεṛfen belli d Ṛebbi i geţnaγen γer tama n wat Isṛayil. Imi ur bγin ara ad xaṣmen Ṛebbi, xedmen yiwet n lḥaǧa. Teẓriḍ d acu-ţ?

At Gibεun steεmlen belli zedγen deg yiwet n tmurt ibeεden aṭas. Ihi kra n yergazen lsan llebsa yesεan tifawtin d yerkasen iqdimen. Σebban i yeγyal-nsen icwariyen iqdimen yerna wwin yid-sen aγrum yeqquren. Imiren ṛuḥen γer Yacuεa, nnan-as: ‘Nusa-d si tmurt ibeεden axaṭer nesla s Ṛebbi-nwen εlayen Yahwa. Nesla s leḥwayeǧ meṛṛa i wen-yexdem di Maṣer. Ihi, fkan-aγ-d lameṛ ineḥkamen-nneγ a neddem aεwin i webrid w’a d-nṛuḥ a wen-nini: “Aql-aγ d iqeddacen-nwen. Σahdet-aγ tura ur teţnaγem ara yid-nneγ.” Walit, llebsa-nneγ teḥfa si tikli i d-nelḥa aṭas, aγrum-nneγ atan d aquran yerna yerγel (yeγmel).’

Yacuεa d imeqranen n wegdud umnen At Gibεun. Dγa εuhden-ten belli ur ţnaγen ara yid-sen. Lameεna, mi εeddan tlata wussan, iwweḍ-iten-id lexbaṛ belli ur yebεid ara wanda i zedγen wat Gibεun.

Yacuεa yesteqsa-ten: ‘Ayγer i yi-d-tennam belli tusam-d si tmurt ibeεden?’

At Gibεun rran-as: ‘Nkellex-ikkun axaṭer nesla belli iεuhed Ṛebbi-nwen Yahwa a wen-yefk tamurt-agi n Kanεan. Nexdem annect-a axaṭer nugad a γ-tenγem.’ At Isṛayil ṭṭfen deg wawal-nsen, ur nγin ara At Gibεun. Lameεna rran-ten d iqeddacen-nsen.

Mi gesla ugellid n Yarucalim belli At Gibεun xedmen lehna nutni d wat Isṛayil, yezεef aṭas. Ihi yenna i ṛebεa igelliden nniḍen: ‘Eyyaw a yi-tεiwnem a neẓdem γef wat Gibεun.’ D ayen i xedmen igelliden-a di xemsa yid-sen. Ihi, At Gibεun d ukyisen i llan m’akka xedmen lehna nutni d wat Isṛayil, lehna i sen-d-yewwin tura ccwal? D ayen ara nwali.

Yacuεa 9:1-27; 10:1-5.

Yacuεa akk-d wat Gibεun


Isteqsiyen

  • Deg wacu i mxalafen wat Gibεun akk-d Ikanεaniyen n temdinin ur nebεid ara γef Isṛayil?
  • Akken i teţwaliḍ di ţţeswiṛa, acu i xeddmen wat Gibεun, yerna acuγer?
  • Acu weεden Yacuεa d wat Isṛayil i wat Gibεun, lameεna acu i fehmen mi εeddan tlata wussan?
  • Acu yeḍran mi slan igelliden n temdinin nniḍen belli At Gibεun xedmen lehna d wat Isṛayil?

Isteqsiyen nniḍen

  • Γer Yacuεa 9:1-27.

    Imi i genna Yahwa i wat Isṛayil ad ssengren imezdaγ meṛṛa n tmurt, anti ṣṣifat i d-issken asm’akken yemneε At Gibεun? (Yac. 9:22, 24; Matta 9:13; Lec. 10:34, 35; 2 Buṭ. 3:9)

    Imi i geṭṭef di lemεahda i gefka i wat Gibεun, anwa lemtel ifazen i d-yeǧǧa Yacuεa i imasiḥiyen n wass-a? (Yac. 9:18, 19; Matta 5:37; Ifas. 4:25)

  • Γer Yacuεa 10:1-5.

    Ass-a, amek i ţεanaden izumal n lγaci At Gibεun? Annect-a yewwi-ten ad sεun aεdaw. Teẓriḍ anwa-t? (Yac. 10:4; Zaxar. 8:23; Matta 25:35-40; Aweḥ. 12:17)