Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 47: Yiwen umaker di Isṛayil

Taqsiṭ tis 47: Yiwen umaker di Isṛayil
Σaxan iţeffer ayen i guker

MUQEL d acu akka iteffer wergaz-agi deg uqiḍun-is! D aqendur ireqmen, lqaleb n ddheb d kra n iṣurdiyen n lfeṭṭa. Iddem-iten-id si temdint n Yariḥu. Lameεna d acu i glaq ad xedmen i leḥwayeǧ meṛṛa yellan di Yariḥu? Tecfiḍ?

Lukan d lebγi, mḥan akk ayen yellan dinna. Ma d ddheb d lfeṭṭa, ilaq-asen a ten-awin γer ugerruj yellan deg uqiḍun n Yahwa. Ihi imdanen-agi i teţwaliḍ, ur uγen ara awal i Ṛebbi. Ukren ayen yellan d ayla n Yahwa. Isem n wergaz-a d Σaxan, ma d wid yellan γer tama-s d iεegallen n wexxam-is. A nwali tura d acu ara yeḍrun.

Mi tεedda tukerḍa n Σaxan, Yacuεa iceggeε kra n yergazen ad ẓedmen γef temdint n Σay. Lameεna imezdaγ n Σay rnan At Isṛayil deg imenγi. Kra deg-sen mmuten, wiyaḍ rewlen. Ul n Yacuεa idub aṭas. Yeγli γef wudem γer lqaεa, dγa yeẓẓull Yahwa: ‘A nnaγ a Yahwa, acuγer i teǧǧiḍ annect-agi a d-yeḍru?’

Yahwa iǧuweb-as: ‘Kker! At Isṛayil denben. Ddmen seg wayen i glaq ad ssengren neγ ad εezlen i uqiḍun n Yahwa. Ukren aqendur urqim yerna ṭṭfen imawen-nsen. Tura ur ţţuγaleγ ara a kkun-barkeγ alamma temḥam aqendur-a d win yukren leḥwayeǧ-agi.’ Yahwa yenna i Yacuεa belli d neţţa ara s-d-isseknen yir bnadem-agi.

Yacuεa ijmeε-ed agdud meṛṛa, imiren Yahwa iwehha-yas-d Σaxan. Σaxan yenna: ‘Denbeγ. Mi walaγ aqendur-nni urqim, lqaleb-nni n ddheb d kra n iṣurdiyen-nni n lfeṭṭa, yewwi-yi ṭṭmeε, dγa ddmeγ-ten. A ten-tafem neṭleγ-ten di tlemmast n uqiḍun-iw.’

Mi s-d-wwin ayen akk ufan, Yacuεa yenna i Σaxan: ‘Acimi i γ-d-tewwiḍ lhemm? Tura a d-yesseγli Yahwa tawaγit γef uqerru-k.’ Imiren, At Isṛayil meṛṛa bdan ṛejjmen Σaxan ţ-ţwacult-is armi mmuten. Tamsalt-agi tbeggen-ed belli ur ilaq ara a neddem ayen ur nelli ara d ayla-nneγ.

Mbeεd ayagi meṛṛa, At Isṛayil ṛuḥen ad nnaγen tikkelt nniḍen nutni d wat Σay. Abrid-agi Yahwa iεawen agdud-is, dγa rebḥen lgirra.

Yacuεa 7:1-26; 8:1-29.



Isteqsiyen

  • Anwa-t wergaz-agi di ţţeswiṛa iţeffren igerrujen i d-yekkan si temdint n Yariḥu? Wi ten-ilan wigad-agi i t-iţεawanen?
  • Ayγer yecmet nezzeh wayen yexdem Σaxan d iεegallen n wexxam-is?
  • Acu i d-iǧuweb Yahwa i Yacuεa m’akken i t-yesteqsa acimi i xesṛen wat Isṛayil deg umenγi nutni d wat Σay?
  • Acu yeḍran d Σaxan ţ-ţwacult-is m’akken i ten-wwin zdat n Yacuεa?
  • Acu i nestenfeε si lḥisab n Σaxan?

Isteqsiyen nniḍen

  • Γer Yacuεa 7:1-26.

    Acu i d-beggnent tẓilla n Yacuεa γef lεalaqat yesεa neţţa d Uxellaq-is? (Yac. 7:7-9; Ahel. 119:145; 1 Yuḥ. 5:14)

    Acu i d-yessken lemtel n Σaxan? Amek ara nḥader iman-nneγ akken ur nettabaε ara lateṛ-is? (Yac. 7:11, 14, 15; Lem. 15:3; 1 Tim. 5:24; Iεeb. 4:13)

  • Γer Yacuεa 8:1-29.

    Anwa lfeṛḍ yellan γef yal yiwen deg-nneγ zdat n tejmaεt tamasiḥit? (Yac. 7:13; Lewwi 5:1; Lem. 28:13)