ACU yesseγlin leṣwar-agi n Yariḥu? A s-tiniḍ teṭṭerḍeq lbumba tameqrant di tlemmast-nsen. Lameεna di zzman-nni ulac lbumbat, ur sεin ula ţ-ţimgeḥlin. Wagi d lbeṛhan nniḍen n Yahwa! Amek i d-yeḍra waya?

Leṣwar n Yariḥu γlin

Ḥess i wayen yenna Yahwa i Yacuεa: ‘Kečč d yergazen meṛṛa yessawḍen i lgirra ṛuḥet aţ-ţezzim i temdint. Zzit-as tikkelt i wass, xedmet annect-a seţţa n wussan. Awit yid-wen asenduq n leεqed. Sebεa n lmuqeddmin ad lḥun zdat-es w’ad ssendhen lbuqat-nsen.’

‘Ass wis sebεa, a d-tezzim i temdint sebεa tikkal. Imiren, ssendhet mliḥ lbuqat-nwen yerna εeggḍet s ṣṣut εlayen. Dγa leṣwar n temdint ad hudden din din!’

Yacuεa d wegdud xedmen akk ayen i sen-yenna Yahwa. M’akken i leḥḥun, ssusmen meṛṛa. Yiwen ur t-id-yuli lmenṭeq. Ala ṣṣut n lbuq d yerkasen-nsen imi sellen. Ahat iεdawen n wegdud n Yahwa di Yariḥu tekcem-iten tugdi. Twalaḍ amrar-inna azeggaγ i d-yeffγen si ṭṭaq? Menhu i d bab n ṭṭaq-inna? D Raḥab. Raḥab texdem ayen akk i s-nnan sin yexbaṛǧiyen-nni. Tawacult-is meṛṛa tella yid-es zdaxel, ţεassan lwaḥid acu ara yeḍrun.

Yacuεa

Γer taggara, deg wass wis sebεa, mi d-zzin i temdint sebεa tikkal, irgazen ssendhen lbuqat-nsen yerna εeggḍen, dγa γlin leṣwar-nni. Mbeεd, Yacuεa yenna: ‘Nγet imezdaγ meṛṛa, tesserγem tamdint d wayen akk yellan deg-s. Σezlet kan ddheb, lfeṭṭa, nnḥas d wuzzal, terrem-ten s agerruj n uqiḍun n Yahwa.’

Yacuεa yenna i sin yexbaṛǧiyen-nni: ‘Ṛuḥet γer wexxam n Raḥab, ssufγet-ţ-id neţţat ţ-ţwacult-is meṛṛa.’ Raḥab d wexxam-is ţţusellken akken i s-weεden yexbaṛǧiyen-nni.

Yacuεa 6:1-25.



Isteqsiyen

  • Acu yenna Yahwa i lmuqeddmin d yergazen yessawḍen i lgirra a t-xedmen seţţa wussan?
  • Acu i sen-ilaq a t-xedmen ass wis sebεa?
  • Akken i teţwaliḍ di ţţeswiṛa, acu yeḍran d leṣwar n Yariḥu?
  • Acimi i d-iεelleq wemrar azeggaγ si ṭṭaq?
  • Acu yumeṛ Yacuεa i yergazen-nni yessawḍen i lgirra a t-xedmen i temdint d imezdaγ-is? Acu yenna diγen γef lfeṭṭa, ddheb, nnḥas d wuzzal?
  • Acu i geţwaḍelben i sin yexbaṛǧiyen-nni a t-xedmen?

Isteqsiyen nniḍen

  • Γer Yacuεa 6:1-25.

    At Isṛayil dewwṛen i temdint n Yariḥu sebεa tikkal ass wis sebεa. Deg wacu i gcuba wannect-agi aberreḥ n Inagan n Yahwa deg wussan-a ineggura? (Yac. 6:15, 16; Icεa. 60:22; Matta 24:14; 1 Kurin. 9:16)

    Amek i ḍran imeslayen yuran di Yacuεa 6:26 azal n xemsa leqrun mbeεd? Acu i γ-isselmad waya γef wawal n Yahwa? (1 Igel. 16:34; Icεa. 55:11)