Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 40: Ffγen-d waman seg weẓru

Taqsiṭ tis 40: Ffγen-d waman seg weẓru

ASEGGAS iṭṭafar wayeḍ armi εeddan 10, 20, 30, 39 iseggasen! At Isṛayil mazal-iten deg uneẓruf. Lameεna iseggasen-agi meṛṛa, Yahwa yelha-d dima d wegdud-is. Issečč-iten s tmana. Deg wass iţwellih-iten s tgejdit n tagut, deg yiḍ s tgejdit n tmes. Leεwam-agi meṛṛa, ur teqqerṣ llebsa-nsen, ur bzigen iḍarren-nsen.

Tura d aggur amezwaru n useggas wis 40 seg wasmi i d-ffγen si Maṣer. At Isṛayil sbedden iqiḍunen-nsen tikkelt nniḍen di Qadic. Yufa-ten-id lḥal dinna asmi i gceggeε Musa, 40 n sna uqbel, 12 n yexbaṛǧiyen γer tmurt n Kanεan. Meryem, weltma-s n Musa, temmut di Qadic. Am zik, atan tura yekker ccwal dinna.

Agdud ur yufi ula ţ-ţiqit n waman. Dγa yebda yeţcetki i Musa: ‘Ah lemmer nemmut axiṛ. Acuγer i γ-d-tewwim si Maṣer s amḍiq-agi yessewḥacen anda ur d-iţţemγi wacemma? Ur telli nneεma, ur llint tbexsisin, ur yelli waḍil, ur llint tṛemmanin. Ulac ula d aman i tissit.’

Musa iwet aẓru-nni

Musa d Haṛun ṛuḥen γer uqiḍun imqeddes akken ad ẓẓallen. Yahwa yenna i Musa: ‘Snejmaε-ed agdud meṛṛa. Imiren, hdeṛ zdat-sen i weẓru-yinna. A d-ffγen seg-s waman i wat Isṛayil d lmal-nsen.’

Ihi Musa isnejmaε-ed agdud, yenna-yas: ‘Ḥesset-ed a wid ur neţkil ara γef Ṛebbi! A wen-d-nessufeγ nekk d Haṛun aman seg weẓru-yagi?’ Musa iwet aẓru-nni sin iberdan s uεekkaz-is, dγa feggḍen-d waman d leεwanṣer. Qadden meṛṛa agdud d lmal.

Lameεna yerfa Yahwa γef Musa d Haṛun. Teẓriḍ ayγer? Axaṭer nnan d nutni ara d-issufγen aman seg weẓru-nni. Lameεna di tin n ṣṣeḥ, d Yahwa i gxedmen annect-a. Ihi imi ur d-nnin ara tideţ, Yahwa a ten-iεaqeb. Yenna: ‘Ur tessekcamem ara agdud-iw γer tmurt n Kanεan.’

At Isṛayil ur εeṭṭlen ara ǧǧan Qadic. S lemγawla leḥqen γer wedrar n Hur. Haṛun yemmut dinna γef yixef n wedrar, yesεa 123 iseggasen di leεmeṛ-is. At Isṛayil ḥeznen aṭas, ţrun fell-as 30 n wussan. Mmi-s Ilεaẓar yuγal deg wemkan-is d lmuqeddem ameqran n wat Isṛayil.

Aneẓruf 20:1-13, 22-29; Asmekti 29:5.



Isteqsiyen

  • Amek i gḥuder Yahwa At Isṛayil asm’akken llan deg uneẓruf?
  • Γef wacu i cetkan wat Isṛayil mi llan di Qadic?
  • Amek i d-ijuba Yahwa aman i wegdud d lmal-is?
  • Akken i teţwaliḍ di ţţeswiṛa, anwa-t wergaz-agi yeţwehhin iman-is s uḍad, yerna acuγer i gexdem aya?
  • Acimi i gerfa Yahwa γef Musa d Haṛun, yerna amek i ten-iεuqeb?
  • Acu yeḍran deg wedrar n Hur, yerna anwa i guγalen d lmuqeddem ameqran n wat Isṛayil?

Isteqsiyen nniḍen

  • Γer Aneẓruf 20:1-13, 22-29; d Wesmekti 29:5.

    Yahwa iḥuder At Isṛayil deg uneẓruf. Acu i γ-yesselmad wannect-a? (Asmek. 29:5; Matta 6:31; Iεeb. 13:5; Yeε. 1:17)

    Acu i gxemmem Yahwa asmi Musa d Haṛun ur s-fkin ara lεaḍima zdat n wat Isṛayil? (Aneẓ. 20:12; 1 Kurin. 10:12; Aweḥ. 4:11)

    Acu i nezmer a nelmed deg wayen ixdem Musa mi t-iεuqeb Yahwa? (Aneẓ. 12:3; 20:12, 27, 28; Asmek. 32:4; Iεeb. 12:7-11)