Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 39: Yeǧǧuǧeg uεekkaz n Haṛun

Taqsiṭ tis 39: Yeǧǧuǧeg uεekkaz n Haṛun

MUQEL ijeǧǧigen d lluz yewwan i d-yemγin deg uεekkaz-agi. D aεekkaz n Haṛun. Ijeǧǧigen d lfakya-yagi yewwan ffγen-d seg uεekkaz n Haṛun deg yiwen yiḍ kan! Amek i d-yeḍra waya?

Musa yeţţak i Haṛun aεekkaz-nni yeǧǧuǧgen

Iεedda kra n lweqt, At Isṛayil mazal-iten ţmenṭaren deg uneẓruf. Kra seg-sen ur uminen ara belli Musa d amwellah yelhan. Ur ḥsiben ara diγen Haṛun d lmuqeddem ameqran. Quraḥ d yiwen seg wid yeţxemmimen akka. Ddan diγen yid-es Datan, Abiram akk-d 250 n yergazen yellan d imeqranen n wegdud. Ṛuḥen lwaḥid γer Musa, nnan-as: ‘Acuγer i tessemγarem iman-nwen fell-aneγ?’

Musa yenna i Quraḥ ţ-ţerbaεt-is: ‘Azekka ṣṣbeḥ ddmet timbexṛin, tezzuzzrem fell-asent lebxuṛ. Imiren aset-ed γer uqiḍun imqeddes. A nwali anwa ara yextiṛ Yahwa.’

Azekka-nni ṣṣbeḥ, Quraḥ d 250 n yergazen yeddan yid-es ṛuḥen γer uqiḍun imqeddes. Aṭas n yemdanen nniḍen i geddan yid-sen akken a sen-fken afus. Yahwa yerfa aṭas. Dγa Musa yenna: ‘Beεdet akkin γef iqiḍunen n yergazen-agi imcumen. Ur ţnalet acemma seg wayla-nsen.’ Agdud issemḥess, dγa iwexxeṛ γef iqiḍunen n Quraḥ, Datan akk-d Abiram.

Umbeεd Musa yenna: ‘S wannect-a ara twalim anwa i gextaṛ Yahwa: lqaεa a d-teldi imi-s yerna aţ-ţessebleε yir irgazen-agi.’

Akken kan yekfa Musa ameslay, teldi lqaεa, tessebleε aqiḍun n Quraḥ d wayen akk yesεa. Tessebleε daγen Datan, Abiram d wat yexxamen-nsen. Umbeεd lqaεa tuγal fell-asen. Mi slan i leεyaḍ n wigad i tečča lqaεa, At Isṛayil ţsuγun, qqaren: ‘Tarewla neγ m’ulac a γ-tečč lqaεa ula d nekni!’

Ma d Quraḥ d 250 n yergazen yeddan yid-es mazal-iten bedden γer tama n uqiḍun imqeddes. Imiren-nni kan Yahwa iceggeε-ed times i ten-yeččan akken ma llan. Umbeεd Yahwa yenna i Ilεaẓar, mmi-s n Haṛun, ad ikkes timbexṛin n lmeggtin-nni, ad ixdem yis-sent tilwiḥin swayes ara iγumm aεalṭar. Aγummu-yagi γef uεalṭar ad yili d limaṛa ara d-ismektin i wat Isṛayil belli ur yezmir ḥedd ad iṭṭef amkan n lmuqeddem zdat n Yahwa, siwa Haṛun d warraw-is.

Lameεna Yahwa yebγa ad issefhem akken ilaq i wegdud belli d Haṛun d warraw-is i gextaṛ ad ilin d lmuqeddmin. Ihi yenna i Musa: ‘Ameṛ i uqerru n mkul lεeṛc a d-yawi aεekkaz-is. Ameṛ diγen i Haṛun, yellan si lεeṛc n Lewwi, a d-yawi aεekkaz-is ula d neţţa. Umbeεd, ssers iεekkzan-agi meṛṛa deg uqiḍun imqeddes, zdat n usenduq n leεqed. D aεekkaz n win ara xtiṛeγ ad yuγal d lmuqeddem ara yeǧǧuǧgen.’

Azekka-nni ṣṣbeḥ, iṛuḥ Musa ad imuqel, yufa aεekkaz n Haṛun mγin-d deg-s ijeǧǧiǧen d lluz yewwan. Tfehmeḍ tura acimi yeǧǧuǧeg uεekkaz n Haṛun?

Aneẓruf 16:1-49; 17:1-11; 26:10.



Isteqsiyen

  • Anwa i gεuṣan amkan yefka Yahwa i Musa d Haṛun, yerna acu i nnan i Musa?
  • Musa yenna i Quraḥ d 250 n yergazen yeddan yid-es ad xedmen yiwet n lḥaǧa. Tecfiḍ d acu-ţ?
  • Acu i genna Musa i wegdud? Acu i geḍran akken kan i gfukk ameslay?
  • Acu yeḍran d Quraḥ akk-d 250 n yergazen-nni i t-itebεen?
  • Acu yexdem Ilεaẓar, mmi-s n Haṛun, s tembexṛin-nni n lmeggtin, yerna acuγer?
  • Acimi yesǧuǧeg Yahwa aεekkaz n Haṛun? (Wali ţţeswiṛa.)

Isteqsiyen nniḍen

  • Γer Aneẓruf 16:1-49.

    Acu i xedmen Quraḥ ţ-ţerbaεt-is? Amek i d-sseknen s wannect-a belli εuṣan Yahwa? (Aneẓ. 16:9, 10, 18; Lewwi 10:1, 2; Lem. 11:2)

    Anwa axemmem n diri i d-beggnen mitin uxemsin-nni “iqerra γef tejmaεt”? (Aneẓ. 16:1-3; Lem. 15:33; Icεa. 49:7)

  • Γer Aneẓruf 17:1-11 d 26:10.

    Acu d lmeεna n uǧuǧǧeg uεekkaz n Haṛun? Ayγer i gumeṛ Yahwa a t-xeznen deg usenduq n leεqed? (Aneẓ. 17:5, 8, 10)

    Acu i γ-yesselmad wayen yeḍran d uεekkaz n Haṛun? (Aneẓ. 17:10; Lec. 20:28; Filib. 2:14; Iεeb. 13:17)