Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 37: Aqiḍun i leεbada

Taqsiṭ tis 37: Aqiḍun i leεbada

TEẒRIḌ d acu-t lebni-yagi? D aqiḍun ur necbi wayeḍ yeţwaεezlen i leεbada n Yahwa. Yeţţusemma diγen aqiḍun imqeddes neγ tanezduγt n Ṛebbi. Agdud ifukk-it s lebni aseggas segmi i d-yeffeγ si Maṣer.

Aqiḍun imqeddes

D Yahwa i gebγan lebni-yagi. M’akken yella Musa γef wedrar n Sinay, Yahwa yessefhem-as amek yebγa lebni n uqiḍun-agi. Inna-yas a t-xedmen akken a sen-yishil a t-fessin. Akka, ad izmiren ad refden iḥricen n uqiḍun s amḍiq nniḍen anda ara t-sbedden. Ihi, m’ara ţḥerriken wat Isṛayil seg wemḍiq γer wayeḍ deg uneẓruf, ţţawin-t yid-sen.

Aqiḍun-agi llant deg-s snat n texxamin. Ma tmuqleḍ zdaxel n texxamt-inna tamecṭuḥt, tzemreḍ aţ-ţwaliḍ yiwen usenduq, yeţţusemman asenduq n leεqed. Llant snat n lmalayek neγ ikerruben n ddheb nnig-es. Ṛebbi yura abrid wis sin Σecṛa Lumuṛ-nni γef snat n teblaḍin nniḍen axaṭer yerẓa Musa timezwura. Tiblaḍin-agi ţwaxeznent zdaxel n usenduq n leεqed nutenti d yiwet n tecmuxt yeččuṛen ţ-ţamana. Tecfiḍ d acu i ţ-ţamana?

Imdanen i gqeddcen deg uqiḍun-agi ţţusemman lmuqeddmin. D Haṛun, gma-s n Musa, i gextaṛ Yahwa akken ad yili d lmuqeddem ameqran. D neţţa i gesskanayen i wegdud amek ara yeεbed Yahwa. Arraw-is llan daγen d lmuqeddmin.

Tura muqel taxxamt tameqrant n uqiḍun. Tugar meṛtayen taxxamt-nni tamecṭuḥt. Twalaḍ tasenduqt-agi iseg i d-iteffeγ dduxxan (abbu)? D ayen iwumi i nsemma aεalṭar. Fell-as i sserγayen lmuqeddmin lḥaǧa yesεan rriḥa yelhan iwumi neqqar lǧawi (lebxuṛ). Dinna i gella lmeṣbaḥ yesεan sebεa n teftilin. Lḥaǧa tis tlata yellan di texxamt-agi, d ṭṭabla iγef i srusuyen daymen tnac iγerman.

Deg wefrag (webṛaḥ) n uqiḍun, tella lḥila tameqrant yeččuṛen d aman ideg i ssiriden lmuqeddmin. Yella daγen uεalṭar ameqran anda sserγayen lmal imezlen i ţţaken d lweεda i Yahwa. Aqiḍun-agi yers di tlemmast n wegrur; At Isṛayil zzin-as-d s iqiḍunen-nsen.

Tuffγa 25:8-40; 26:1-37; 27:1-8; 28:1; 30:1-10, 17-21; 34:1, 2; Iεebṛaniyen 9:1-5.



Isteqsiyen

  • Amek i geţţusemma lebni i teţwaliḍ di ţţeswiṛa, yerna i wacu i t-ssexdamen?
  • Ayγer i gessuter Yahwa i Musa ad bnun aqiḍun-nni akken a sen-yishil a t-fessin?
  • D acu-ţ tsenduqt-nni yellan zdaxel n texxamt tamecṭuḥt n uqiḍun? Acu yellan zdaxel-is?
  • Anwa i gextaṛ Yahwa ad yili d lmuqeddem ameqran, yerna acu i d lxedma-s?
  • Ini-d tlata-nni n leḥwayeǧ yellan di texxamt tameqrant.
  • D acu-tent snat n tγawsiwin yellan deg wefrag i d-yezzin i uqiḍun, yerna i wacu i tent-ssexdamen?

Isteqsiyen nniḍen

  • Γer Tuffγa 25:8-40; 26:1-37; 27:1-8; d 28:1.

    Acu i d lmeεna n ikerruben-nni yellan nnig “usenduq n cchada”? (Tuf. 25:20, 22; Aneẓ. 7:89; 2 Igel. 19:15)

  • Γer Tuffγa 30:1-10, 17-21; 34:1, 2 d Iεebṛaniyen 9:1-5.

    Acimi yefka Yahwa azal ameqran i ṣṣfawa n lǧeţţa i glaq ad sεun lmuqeddmin i gqeddcen deg uqiḍun imqeddes? Amek i glaq ad idemmer wannect-a tikli-nneγ? (Tuf. 30:18-21; 40:30, 31; Iεeb. 10:22)

    Amek i d-yessken wemceggeε Bulus belli aqiḍun imqeddes akk-d leεqed n Lqanun futen di zzman anda yura tabṛaţ i imasiḥiyen iεibṛaniyen? (Iεeb. 9:1, 9; 10:1)