Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 33: Yeldi webrid di lebḥeṛ

Taqsiṭ tis 33: Yeldi webrid di lebḥeṛ

WALI kan acu iḍerrun! Musa yerfed aεekkaz-is γer lebḥeṛ Azeggaγ. Imdanen-agi yellan di ṭṭmana γer tama-s d At Isṛayil. Lameεna Ferεun d lεeskeṛ-is atnan la γerrqen di lebḥeṛ. Amek i d-yeḍra waya?

Iεsekṛiwen n Maṣer γerqen

Akken i t-nwala di teqsiṭ iεeddan, Ferεun yumeṛ i wat Isṛayil ad ffγen si tmurt n Maṣer mi tεedda lmuṣiba tis εecṛa. Azal n 600 000 n yergazen i gṛuḥen, bla ma neḥseb tilawin d imecṭaḥ. Ddan diγen yid-sen aṭas n lγaci i gumnen s Yahwa. Akken ma llan wwin lmal-nsen amecṭuḥ d lmal-nsen ameqran.

Uqbel ad ṭṭfen abrid, At Isṛayil ssutren i Imaṣriyen llebsa ţ-ţγawsiwin yeţwaxedmen s ddheb d lfeṭṭa. Imaṣriyen ikcem-iten lxuf asmi i tεedda fell-asen lmuṣiba tis εecṛa. Γef waya i fkan i wat Isṛayil ayen akk i sen-d-ḍelben.

Mi lḥan kra n wussan, At Isṛayil wwḍen γer lebḥeṛ Azeggaγ. Dinna i sbedden iqiḍunen-nsen. Lameεna Ferεun d yergazen yeddan yid-es nedmen imi serrḥen i wat Isṛayil. Qqaren: ‘Acu akka i nexdem? Neǧǧa iqeddacen-nneγ ad ṛuḥen!’

Ferεun ibeddel daγen ṛṛay. Issewjed s lemγawla akeṛṛus-is d lεeskeṛ-is meṛṛa. Imiren itbeε At Isṛayil s 600 ikeṛṛusen itεeddan akk-d ikeṛṛusen meṛṛa nniḍen n Maṣer.

Mi refden wat Isṛayil allen-nsen, walan Ferεun iteddu-d neţţa d lεeskeṛ-is. Dγa ugaden, iffeγ-iten leεqel. Ulac amḍiq γer wanda ara rewlen. Γer zdat iqubel-iten-id lebḥeṛ Azeggaγ, γer deffir Imaṣriyen a d-ţţazzalen γur-sen. Lameεna Yahwa yesbedd tagut ger wegdud-is d Imaṣriyen. Akka, Imaṣriyen ur zmiren ara ad walin At Isṛayil akken ad ẓedmen fell-asen.

Mbeεd, Yahwa yumeṛ i Musa ad yerfed aεekkaz-is γer lebḥeṛ. Musa yuγ awal, dγa yessker-ed Yahwa yiwen waḍu iǧehden si ccerq. Aman n lebḥeṛ bḍan γef sin, bedden ssya wesya am leṣwar.

Imiren, At Isṛayil bdan leḥḥun di tlemmast n lebḥeṛ γef wakal yekkawen. Ilaq ddeqs n sswayeε i imelyan n lγaci d lmal-nsen meṛṛa akken ad leḥqen di lehna γer lǧiha nniḍen. Γer taggara, Imaṣriyen uγalen walan At Isṛayil. Wid yellan d aklan-nsen atnan regglen! Din din ḍeffren-ten γer tlemmast n lebḥeṛ.

Mi gwala Yahwa belli qerben-d Imaṣriyen, yeclex ṛṛwaḍi-nsen. Imaṣriyen ugaden aṭas, dγa bdan ţsuγun: ‘Yahwa yeţnaγ γer tama n wat Isṛayil. Tarewla!’ Lameεna ifut lḥal.

Imiren-nni i gumeṛ Yahwa i Musa ad yerfed aεekkaz-is γer lebḥeṛ, akken i t-teţwaliḍ di ţţeswiṛa-yagi. Musa yuγ awal, dγa leṣwar-nni n waman γlin-d γef Imaṣriyen d ikeṛṛusen-nsen, γummen-ten meṛṛa. Yuγ lḥal lεeskeṛ s lekmal-is yetbeε At Iṣrayil γer tlemmast n lebḥeṛ. Tura ula d yiwen seg Imaṣriyen ur yemniε!

Acḥal meqqer lfeṛḥ n wegdud n Ṛebbi imi yemneε! Irgazen bdan cennun akken ad cekkṛen Yahwa, qqaren: ‘Yahwa yerbeḥ rrbeḥ ameqran. Iḍegger iεawdiwen d yemnayen-nsen γer tlemmast n lebḥeṛ.’ Meryem, weltma-s n Musa, teddem-ed amendayer (ṭṭbel). Tilawin meṛṛa tebεent-eţ s imenduyar-nsent. Bdant ceṭṭḥent s lfeṛḥ, ţγennint nutenti d yergazen: ‘Yahwa yerbeḥ rrbeḥ ameqran. Iḍegger iεawdiwen d yemnayen-nsen γer tlemmast n lebḥeṛ.’

Tuffγa ixef wis 12 alamma d wis 15.



Isteqsiyen

  • Acḥal n yergazen n wat Isṛayil i geffγen si Maṣer mebla leḥsab n tlawin d imecṭaḥ? Anwi i geddan yid-sen?
  • Acu i gḥuss Ferεun asm’akken yeǧǧa At Isṛayil ad ṛuḥen? Acu yexdem?
  • Acu yexdem Yahwa akken ur ẓeddmen ara Imaṣriyen γef wegdud-is?
  • Acu yeḍran asm’akken yeẓẓel Musa aεekkaz-is γer lebḥeṛ Azeggaγ? D acu i xedmen wat Isṛayil?
  • Acu yeḍran m’akken Imaṣriyen tebεen At Isṛayil di lebḥeṛ?
  • Amek i d-sbeggnen wat Isṛayil belli feṛḥen yerna steεṛfen imi i ten-isellek Yahwa?

Isteqsiyen nniḍen

  • Γer Tuffγa 12:33-36.

    Acu yexdem Yahwa akken ad ţţuxellṣen wat Isṛayil γef iseggasen-nni ideg i llan ddaw ufus n Imaṣriyen? (Tuf. 3:21, 22; 12:35, 36)

  • Γer Tuffγa 14:1-31.

    Acu ara ḥussen iqeddacen n Yahwa n wass-a, ara iwalin lgirra n Harmagidun i d-iteddun, m’ara γren imeslayen n Musa di Tuffγa 14:13, 14? (2 Amez. 20:17; Ahel. 91:8)

  • Γer Tuffγa 15:1-8, 20, 21.

    Ayγer i glaq iqeddacen n Yahwa ad ḥemden Ṛebbi? (Tuf. 15:1, 2; Ahel. 105:2, 3; Aweḥ. 15:3, 4)

    Anwa lemtel i d-teǧǧa Meryem ţ-ţlawin nniḍen i tmasiḥiyin n lweqt-nneγ asmi i ḥemdent Yahwa di lebḥeṛ Azeggaγ? (Tuf. 15:20, 21; Ahel. 68:11)