Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 32: Σecṛa n lmuṣibat

Taqsiṭ tis 32: Σecṛa n lmuṣibat

MUQEL ţţeswiṛat-agi. Mkul yiwet seg-sent tessken-ed yiwet si lmuṣibat i d-isseγli Yahwa γef Maṣer. Di ţţeswiṛa tamezwarut tzemreḍ aţ-ţwaliḍ Haṛun yekkaten asif n Nnil s uεekkaz-is. Imiren kan uγalen waman-nni d idammen. Iḥutiwen mmuten, dγa yebda yeţfuḥu wasif.

Lmuṣibat γef imaṣriyen

Mbeεd, Yahwa yessufeγ-ed seg wasif n Nnil imqerqar. Llan di yal lǧiha: di lkucat, deg urekti, deg wusu n lγaci, di mkul amkan. Asmi i mmuten yemqerqar-agi, Imaṣriyen jemεen-ten d iεemmuṛen, tamurt meṛṛa teţraḥ.

Mbeεd, Haṛun iwet lqaεa s uεekkaz-is, dγa yuγal uγebbar ţ-ţiziţ iteqqsen imdanen d lḥiwan. Tiziţ d lmuṣiba tis tlata i d-yeγlin γef tmurt n Maṣer.

Lmuṣibat i d-itebεen ḥuzant kan Imaṣriyen, ur nnulent ara At Isṛayil. Lmuṣiba tis ṛebεa d izumal n yizan imeqranen ikeččmen s ixxamen n Imaṣriyen. Lmuṣiba tis xemsa teγli-d γef lḥiwan. Tesserwet s waṭas, tenγa lmal amecṭuḥ d umeqran n Imaṣriyen.

Mbeεd, Musa d Haṛun ddmen-d iγiγden, ḍeggren-ten s igenni, dγa uγalen ţ-ţimmas i Imaṣriyen d lḥiwan. Tagi d lmuṣiba tis seţţa.

Mbeεd, Musa yeẓẓel afus-is γer igenni, dγa yefka-d Ṛebbi ṛṛεud d webruri. Leεmeṛ i d-yeγli webruri yecban winna γef tmurt n Maṣer.

Lmuṣiba tis tmanya d izumal n wejṛad. Leεmeṛ ur d-yelli wannect-nni n wejṛad di tmurt n Maṣer. Ayen meṛṛa i d-iǧǧa webruri, ikemmel-as wejṛad.

Lmuṣiba tis tesεa d ṭṭlam. Yeγli-d γef tmurt, yekka tlata wussan. Lameεna deg imukan anda zedγen wat Isṛayil, tella tafat.

Γer taggara, Ṛebbi yenna i wat Isṛayil ad ṛuccen s idammen uqelwac neγ n ikerri tigejda n tewwura n yexxamen-nsen. Mbeεd, lmelk n Ṛebbi ad iεeddi γef tmurt n Maṣer. Ma yufa idammen γef tewwurt, ur ineqq ula d yiwen deg wexxam-nni. Ma d ixxamen anda ur yufi ara idammen, lmelk n Ṛebbi ad ineγ imenza meṛṛa, ama d wid n yemdanen ama d wid n lmal. Lmuṣiba-ya ţ-ţis εecṛa.

Armi i tεedda lmuṣiba-yagi taneggarut i gumeṛ Ferεun i wegdud n Ṛebbi ad iṛuḥ. At Isṛayil wejden tura i ṛṛwaḥ. Iḍ-nni dγa i bdan tikli akken ad ffγen si Maṣer.

Tuffγa ixef wis 7 alamma d wis 12.



Isteqsiyen

  • Muqel ţţeswiṛat-agi teḥkuḍ-d tlata n lmuṣibat timezwura i d-yesseγli Yahwa γef Maṣer.
  • Acu n lxilaf yellan ger tlata n lmuṣibat timezwura d sebεa n lmuṣibat-nni nniḍen?
  • Ḥku-d lmuṣiba tis ṛebεa, tis xemsa ţ-ţis seţţa.
  • Mel-ed amek i tga lmuṣiba tis sebεa, tis tmanya ţ-ţis tesεa.
  • Acu yeḍleb Yahwa i wat Isṛayil a t-xedmen uqbel lmuṣiba tis εecṛa?
  • Anta i d lmuṣiba tis εecṛa, yerna acu yeḍran umbeεd?

Isteqsiyen nniḍen

  • Γer Tuffγa 7:19-8:23.

    Γas zemren iseḥḥaren n Maṣer ad xedmen ula d nutni snat lmuṣibat-nni timezwura, s wacu i sen-ilaq ad steεṛfen mi tεedda lmuṣiba tis tlata? (Tuf. 8:18, 19; Matta 12:24-28)

    Amek i d-tbeggen lmuṣiba tis ṛebεa belli yezmer Yahwa ad iḥunn γef wegdud-is? Amek i geḍmen wannect-a agdud n Ṛebbi yeţṛaǧun “leqheṛ d ameqqran”? (Tuf. 8:22, 23; Aweḥ. 7:13, 14; 2 Amez. 16:9)

  • Γer Tuffγa 8:24; 9:3, 6, 10, 11, 14, 16, 23-25; d 10:13-15, 21-23.

    Σecṛa-nni n lmuṣibat sbanent-ed snat n trebbuεa n lεibad. Anta-tent? Amek i glaq a nwali snat n trebbuεa-yagi ass-a? (Tuf. 8:10, 18, 19; 9:14)

    Amek i γ-iţεawan wayen yuran di Tuffγa 9:16 a nefhem acimi yeǧǧa Yahwa ad yidir Cciṭan armi ţ-ţura? (Ṛuma 9:21, 22)

  • Γer Tuffγa 12:21-32.

    Amek i ţţusellken waṭas n yemdanen s Lεid n Usuref (iwumi qqaren kra Tafaska)? Acu i d-imettel lεid-agi? (Tuf. 12:21-23; Yuḥ. 1:29; Ṛuma 5:18, 19, 21; 1 Kurin. 5:7)