Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 31: Musa d Haṛun zdat n Ferεun

Taqsiṭ tis 31: Musa d Haṛun zdat n Ferεun

ASMI i guγal Musa γer Maṣer, yeḥka i gma-s Haṛun lbeṛhanat meṛṛa i gwala. Mi sseknen di sin i wat Isṛayil lbeṛhanat-agi, agdud s lekmal-is yumen belli Ṛebbi yella yid-sen.

Mbeεd, Musa akk-d Haṛun ṛuḥen ad ẓren Ferεun. Nnan-as: ‘Atah wayen i d-yenna Yahwa, Ṛebbi n Isṛayil: “Serreḥ i wegdud-iw tlata wussan ad iṛuḥ s aneẓruf (ṣṣeḥṛa) akken ad iyi-iεbed.”’ Ferεun yerra-yasen: ‘Ur umineγ s Yahwa, ur ţserriḥeγ i Isṛayil ad iṛuḥ.’

Ferεun yezεef axaṭer yebγa wegdud ad yeεbed Yahwa di lweqt-nni n lxedma. Yuγal issawεeṛ fell-asen lxedma akteṛ n zik. At Isṛayil lummen Musa imi ẓẓayet fell-asen teεkemt. Annect-a yesseḥzen Musa. Meεna Yahwa isebbeṛ-it mi s-yenna: ‘Ad ḥettmeγ Ferεun akken ad iserreḥ i wegdud-iw.’

Musa d Haṛun zdat n ferεun

Musa akk-d Haṛun ṛuḥen daγen ad ẓren Ferεun. Tikkelt-a xedmen lbeṛhan zdat-es. Haṛun iḍegger aεekkaz-is γer lqaεa, dγa yuγal d azrem ameqran. Lameεna ula d iseḥḥaren n Ferεun ḍeggren iεekkzan-nsen γer lqaεa, dγa uγalen ula d nutni d izerman. Meεna muqel! Azrem n Haṛun ibda iteţţ izerman-nni n iseḥḥaren. Γas akka, Ferεun iggumma ad iserreḥ i wat Isṛayil.

Tura yusa-d lweqt anda ara yessefhem Yahwa i Ferεun ayen akk ur yezmir ad yeţţu. Teẓriḍ d acu yexdem? Isseγli-d εecṛa n lmuṣibat γef Maṣer.

Mbeεd, mi εeddant kra n lmuṣibat, Ferεun issawel i Musa, yenna-yas: ‘Ḥbes lmuṣiba-yagi, ma d nekk ad ǧǧeγ Isṛayil ad iṛuḥ.’ Lameεna akken kan teḥbes lmuṣiba, Ferεun yuγal deg wawal-is. Ur yebγi ara ad iserreḥ i wegdud n Isṛayil. Armi d asmi i d-teγli lmuṣiba tis εecṛa i geǧǧa Ferεun At Isṛayil ad ṛuḥen.

Teẓriḍ amek i gant lmuṣibat-agi? Dewweṛ tawerqeţţ-a akken a tent-twaliḍ.

Tuffγa 4:27-31; 5:1-23; 6:1-13, 26-30; 7:1-13.



Isteqsiyen

  • Acu xedmen wat Isṛayil asmi i xedmen Musa d Haṛun lbeṛhanat zdat-sen?
  • Acu nnan Musa d Haṛun i Ferεun, yerna acu i sen-yerra?
  • Akken i teţwaliḍ di ţţeswiṛa, acu yeḍran m’akken iḍegger Haṛun aεekkaz-is γer lqaεa?
  • Acu yessexdem Yahwa akken ad issefhem i Ferεun ayen akk ur izmir ad yeţţu? Acu yexdem Ferεun?
  • Acu yeḍran mi tεedda lmuṣiba tis εecṛa?

Isteqsiyen nniḍen

  • Γer Tuffγa 4:27-31 d 5:1-23.

    Acu i gebγa a d-yini Ferεun m’akken i d-yenna belli ur yessin ara Yahwa? (Tuf. 5:2; 1 Cam. 2:12; Ṛuma 1:21)

  • Γer Tuffγa 6:1-13, 26-30.

    Acu yebγa a d-yini Yahwa asmi i genna belli mačči s yisem-is i t-ssnen Abṛaham, Isḥaq d Yeεqub? (Tuf. 3:13, 14; 6:3; Laṣel 12:8)

    Acu i neţḥussu imi neẓra belli Yahwa yesseqdec Musa γas neţţa iḥqer iman-is m’akken yeţţuceggeε? (Tuf. 6:12, 30; Luqa 21:13-15)

  • Γer Tuffγa 7:1-13.

    Asmi i nnan s tirrugza lḥisab n Yahwa i Ferεun, anwa lemtel i d-ǧǧan Musa d Haṛun i iqeddacen n Ṛebbi n wass-a? (Tuf. 7:2, 3, 6; Lec. 4:29-31)

    Amek i d-ibeggen Yahwa belli lεaḍima-s tugar tin n iṛebbiten n Maṣer? (Tuf. 7:12; 1 Amez. 29:12)