Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 27: Yir agellid yeḥkem γef Maṣer

Taqsiṭ tis 27: Yir agellid yeḥkem γef Maṣer

ATNAN yergazen-agi ḥerrṣen lγaci ad xedmen. Wali argaz-a yekkaten yiwen uxeddam s ujelkaḍ! Ixeddamen-agi meṛṛa kkan-d si twacult n Yeεqub. Ţţusemman At Isṛayil. Imdanen-agi i ten-iţḥettimen ad xedmen d Imaṣriyen. At Isṛayil uγalen d aklan n Imaṣriyen. Amek i d-yeḍra waya?

Imaṣriyen ţqehhiren At Isṛayil

Ddeqs iseggasen i tεac di lehna twacult tameqrant n Yeεqub di Maṣer. Yusef, yellan d aneḥkam ameqran mbeεd Ferεun, yelha-d yid-sen. Lameεna tura yemmut Yusef. Yekker-ed Ferεun nniḍen ur nḥemmel ara At Isṛayil, yuγal d agellid γef Maṣer.

Ferεun-agi yella d amcum, yerra At Isṛayil meṛṛa d aklan. Isbedd yir lεibad ijehlen akken ad ḥekmen fell-asen s ẓẓur. Ţḥettimen At Isṛayil ad xedmen sennig n tezmert-nsen akken ad bnun timdinin i Ferεun. Lameεna γas akka, At Isṛayil ţzidin rennun. Iεedda kra n lweqt, Imaṣriyen ugaden ad ftin w’ad ǧehden akteṛ wat Isṛayil.

Imaṣriyen ţqehhiren At Isṛayil

Teẓriḍ acu yexdem Ferεun? Yenna i lqiblat, meḥsub tilawin iţεawanen tiyemmatin ad rbunt: ‘Nγemt mkul aqcic ara d-ilalen i Tεibṛaniyin.’ Lameεna, tilawin-agi lhant, ur nγint ara llufanat-nni.

Ferεun yumeṛ ihi i wegdud-is meṛṛa: ‘Mmγet γef warrac n wat Isṛayil, tenγem-ten meṛṛa. Ǧǧet kan tullas ad idirent.’ Ur yejhil ara Ferεun-agi? A nwali tura amek i geţţusellek yiwen si llufanat-nni.

Tuffγa 1:6-22.



Isteqsiyen

  • Anwa-t wergaz-agi yeṭṭfen ajelkaḍ di ţţeswiṛa? Anwa akka i gekkat?
  • Si lmut n Yusef d asawen, acu yeḍran d wat Isṛayil?
  • Acimi i ugaden Imaṣriyen At Isṛayil?
  • Anwa lameṛ i gefka Ferεun i lqiblat?

Isteqsiyen nniḍen

  • Γer Tuffγa 1:6-22.

    Yahwa yeṭṭef deg wawal-is γef wayen yeεnan lemεahda i gefka i Abṛaham. Melmi i d-iban wannect-a? (Tuf. 1:7; Laṣel 12:2; Lec. 7:17)

    Amek i d-beggnent lqiblat-nni tiεibṛaniyin belli ţqadarent tudert? (Tuf. 1:17; Laṣel 9:6)

    Amek i gburek Yahwa lqiblat-nni γef ddemma n nnṣaḥa-nsent? (Tuf. 1:20, 21; Lem. 19:17)

    Amek i gnuda Cciṭan ad ixaṣem leqsed n Yahwa yeεnan zzerriεa i gewεed i Abṛaham? (Tuf. 1:22; Matta 2:16)