Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 23: Tirga n Ferεun

Taqsiṭ tis 23: Tirga n Ferεun

ΣEDDAN sin iseggasen, Yusef mazal-it di lḥebs. Lewkil-nni n tissit ur t-id-immekti ara. Yiwen yiḍ, Ferεun yurga snat n tirga issewhamen, dγa yebγa ad iẓer acu i d lmeεna-nsent. Twalaḍ-t dagi deg wusu-ines? Azekka-nni ṣṣbeḥ, Ferεun yessawel i imusnawen-is dγa yeḥka-yasen akk ayen yurga. Lameεna ula d yiwen ur yezmir a s-d-yessefru tirga-ines.

Lewkil-nni n tissit yemmekta-d imir Yusef. Yenna i Ferεun: ‘Asmi i lliγ di lḥebs yella dinna yiwen wergaz i gzemren ad issefru tirga.’ Din din Ferεun yessufeγ-ed Yusef si lḥebs.

Ferεun yeḥka i Yusef tirga-ines. Yenna-yas: ‘Walaγ sebεa n testan (tisita) cebḥent yerna ṣeḥḥant. Mbeεd walaγ sebεa n testan nniḍen cemtent yerna ḍeεfent. Tistan-nni iḍeεfen ččant tistan-nni iṣeḥḥan.

Ferεun yeţţargu

‘Di targit tis snat, walaγ sebεa n tgedrin, cebḥent, ččuṛent, ffγent-ed seg yiwen yimγi. Mbeεd walaγ sebεa n tgedrin nniḍen ţ-ţujjixin (ţ-ţirqaqin) yerna kkawent. Tigedrin-nni tujjixin sseblεent tigedrin-nni yeččuṛen.’

Yusef yenna i Ferεun: ‘Snat n tirga-yagi sεant yiwet lmeεna. Sebεa n testan-nni iṣeḥḥan akk-d sebεa n tgedrin-nni yeččuṛen d sebεa iseggasen. Sebεa n testan-nni iḍeεfen akk-d sebεa n tgedrin-nni tujjixin d sebεa iseggasen nniḍen. A d-ilin sebεa iseggasen ideg ara iεum lxiṛ di tmurt n Maṣer. Mbeεd, a ten-id-tebεen sebεa iseggasen n laẓ.’

Yusef yenna daγen i Ferεun: ‘Xtiṛ argaz aεeqli, ufhim ara d-ijemεen yerna ara ixeznen lqut di sebεa iseggasen-nni n tawant. Akkenni agdud ur iţmeţţat ara m’ara d-asen sebεa iseggasen-nni n laẓ.’

Ṛṛay-agi yeεǧeb i Ferεun. Dγa yextaṛ Yusef akken ad ijmeε yerna ad ixzen nneεma. Yusef yuγal d argaz ameqran di tmurt meṛṛa n Maṣer. Ulac win yellan nnig-es, siwa Ferεun.

Tura εeddan tmanya iseggasen, aql-aγ di lawan-nni n laẓ. Yusef iwala kra n yergazen i d-iteddun. Teẓriḍ anwa-ten? D εecṛa watmaten-is! Iceggeε-iten-id baba-tsen Yeεqub γer Maṣer axaṭer ixuṣṣ lqut di tmurt n Kanεan. Yusef yeεqel atmaten-is, ma d nutni ur t-εqilen ara. Teẓriḍ acuγer? Axaṭer Yusef yuγal d argaz yerna yelsa llebsa ixulfen tin n zik.

Dγa Yusef yemmekta-d ayen akken yurga γef watmaten-is di temẓi-s. Yurga usan-d ad knun zdat-es. Tecfiḍ ayen teγriḍ γef wannect-a? Yusef yefhem belli d Ṛebbi i t-id-iceggεen γer Maṣer, yerna mačči bla ssebba. Teẓriḍ d acu ara yexdem Yusef? D ayen ara nwali tura.

Laṣel n ddunit 41:1-57; 42:1-8; 50:20.



Isteqsiyen

  • Acu yeḍran d Ferεun yiwen yiḍ?
  • Acu yewwin lewkil-nni n tissit a d-yemmekti Yusef γer taggara?
  • Akken i t-teţwaliḍ di ţţeswiṛa, acu yurga Ferεun?
  • Acu i d-yenna Yusef γef lmeεna n tirga-nni?
  • Amek i guγal Yusef di tmurt n Maṣer d argaz yugaren akk wiyaḍ mbeεd Ferεun?
  • Acimi i d-ṛuḥen watmaten n Yusef γer Maṣer, yerna acuγer ur t-εqilen ara?
  • Anta targit i d-yemmekta Yusef, yerna d acu i t-tεawen ad yefhem?

Isteqsiyen nniḍen

  • Γer Laṣel n ddunit 41:1-57.

    Amek i gejbed Yusef tamuγli-nneγ γef Yahwa? Amek i zemren a t-εanden imasiḥiyen ass-a? (Laṣel 41:16, 25, 28; Matta 5:16; 1 Buṭ. 2:12)

    Amek i d-weṣṣfen iseggasen-nni n tawant i d-ḍefren leεwam-nni n laẓ lxilaf yellan ger liḥala n wegdud n Ṛebbi di leḥwayeǧ n ṛṛuḥ ass-a, ţ-ţin ideg i tella ddunit tamasiḥit? (Laṣel 41:29, 30; Σamus 8:11, 12)

  • Γer Laṣel n ddunit 42:1-8 d 50:20.

    Lεebd yuklalen leqder d lεezz imi yeṭṭef amkan ameqran, zemren ad knun zdat-es iqeddacen n Yahwa ma yella d lεadda wannect-a di tmurt-nsen? (Laṣel 42:6)