Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 17: D akniwen meεna mxalafen

Taqsiṭ tis 17: D akniwen meεna mxalafen
Σisu

SIN warrac-agi i teţwaliḍ dagi mxalafen, neγ ala? Tessneḍ ismawen-nsen? Aṣeggad-agi d Σisu (Icaw) ma d aqcic-agi yesslufuyen i izimer d Yeεqub.

Σisu d Yeεqub d akniwen i d-sεan Isḥaq d Ribka. Baba-tsen Isḥaq iḥemmel aṭas Σisu axaṭer yezweṛ di ṣṣyada, yerna yeţţawi-d lqut i wat wexxam. Ma d Ribka, neţţat, tḥemmel akteṛ Yeεqub axaṭer d aqcic amhenni.

Jeddi-tsen Abṛaham mazal-it yedder. Nezmer a nxayel acḥal iḥemmel Yeεqub a s-issemḥess m’ara d-iţmeslay γef Yahwa. Γer taggara Abṛaham yemmut mi gesεa 175 n sna, mi wwḍen wakniwen-nni 15 iseggasen di leεmeṛ.

Asmi i gewweḍ Σisu 40 n sna, yuγ snat tlawin si tmurt n Kanεan. Annect-agi isseḥzen aṭas Isḥaq d Ribka, axaṭer tilawin-agi ur ţεebbident ara Yahwa.

Yiwen wass, teḍra-d yiwet lḥaǧa i gewwin Σisu ad izεef γef gma-s Yeεqub. Iḥdeṛ-ed lawan ad yefk Isḥaq lbaṛaka i mmi-s amenzu. Imi i d neţţa i d amenzu, Σisu yessarem ihi a t-id-tṣaḥ lbaṛaka-ya. Lameεna yeţţu belli, zik yezzenz i Yeεqub lḥeqq-is n lbaṛaka-yagi. Yerna asmi i d-lulen sin warrac-a, Ṛebbi yenna-d belli d Yeεqub iwumi ara teţţunefk lbaṛaka. D ayen i geḍran. Isḥaq yefka lbaṛaka i mmi-s Yeεqub.

Yeεqub

Asmi i gesla Σisu i lexbaṛ-agi, izεef yiwen n zzεaf d ameqran γef gma-s Yeεqub. Zzεaf-is issaweḍ-it armi yeţgalla di gma-s a t-ineγ. Mi tesla Ribka s lexbaṛ-agi ikcem-iţ uγilif ameqran. Dγa tenna i wergaz-is Isḥaq: ‘Ţ-ţawaγit ma yezweǧ ula d Yeεqub d yiwet si tlawin n Kanεan.’

Ihi Isḥaq yessawel i mmi-s Yeεqub, yenna-yas: ‘Ur d-ţţawi ara tameṭṭut si Kanεan. Meεna ṛuḥ s axxam n jeddi-k Batwil yellan di tmurt n Ḥaṛan. Aγ yiwet si yessi-s n mmi-s n Laban.’

Yeεqub issemḥess i baba-s. Din din yekker iṛuḥ γer Ḥaṛan anda zedγen imawlan-is.

Laṣel n ddunit 25:5-11, 20-34; 26:34, 35; 27:1-46; 28:1-5; Iεebṛaniyen 12:16, 17.



Isteqsiyen

  • Anwi i d Σisu d Yeεqub? Deg wacu i mxalafen?
  • Acḥal di leεmeṛ n Σisu d Yeεqub asmi i gemmut jeddi-tsen Abṛaham?
  • Acu i gexdem Σisu i gesseḥznen aṭas imawlan-is?
  • Ayγer i gezεef aṭas Σisu γef gma-s Yeεqub?
  • Anwa lameṛ i gefka Isḥaq i mmi-s Yeεqub?

Isteqsiyen nniḍen

  • Γer Laṣel n ddunit 25:5-11, 20-34.

    Acu i d-yenna Yahwa uqbel talalit n sin warrac n Ribka? (Laṣel 25:23)

    Acu n lxilaf yellan ger lεeqliya n Yeεqub ţ-ţin n Σisu γef wayen yeεnan “lḥeqq n umenzu”? (Laṣel 25:31-34)

  • Γer Laṣel n ddunit 26:34, 35; 27:1-46; d 28:1-5.

    Amek i d-iban belli Σisu yeḥqer leḥwayeǧ yeεnan Ṛebbi? (Laṣel 26:34, 35; 27:46)

    Akken lbaṛaka n Ṛebbi a d-tṣaḥ Yeεqub, acu i s-yenna Isḥaq a t-ixdem? (Laṣel 28:1-4)

  • Γer Iεebṛaniyen 12:16, 17.

    Acu i gḍerrun i wid ur neţţak ara lεezz i leḥwayeǧ iqedsen am wakken i t-nwala di lemtel n Σisu?