Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 15: Tameṭṭut n Luṭ

Taqsiṭ tis 15: Tameṭṭut n Luṭ

LUṬ ţ-ţwacult-is llan ţεicin d Abṛaham di tmurt n Kanεan. Yiwen wass Abṛaham yenna i Luṭ: ‘Tamurt ur tewwi ara lmal-nneγ meṛṛa. Di leεnaya-k, eyya-d a nemfaraq. Ma tṛuḥeḍ γer yiwet n lǧiha, nekk ad ṛuḥeγ γer tayeḍ.’

Luṭ imuqel tamurt meṛṛa. Iwala yiwen wemḍiq ilhan, yeṛwan aman yerna yeččuṛen ţ-ţizzegzewt i lmal-is. Amḍiq-agi isem-is Azaγar n Uṛdun. Ihi Luṭ, tawacult-is d lmal-is ṛuḥen γer dinna. Γer taggara zedγen di temdint n Sudum.

Lγaci i gzedγen di Sudum fesden armi dayen. Annect-agi yesmuγben Luṭ yellan d argaz yelhan. Liḥala-ya tesneγni ula d Ṛebbi. Γef wannect-a i gceggeε Ṛebbi snat lmalayek γer Luṭ. Nnant-as belli Ṛebbi ad issenger Sudum ţ-ţemdint i ţ-iqerben iwumi qqaren Gumur axaṭer fesdent aṭas.

Lmalayekkat-nni nnant i Luṭ: ‘Γiwel! Ddem tameṭṭut-ik d snat yessi-k teffγeḍ ssyagi!’ Imi Luṭ ţ-ţwacult-is εeṭṭlen, lmalayekkat-nni ṭṭfent-ten seg ufus, ssufγent-ten-id si temdint-nni. Umbeεd, yiwet si lmalayekkat-nni tenna: ‘Rewlet, ssellket iman-nwen! Ur ţmuqulet ara γer deffir. Azzlet γer wedrar akken ur teţmeţţatem ara.’

Luṭ d yessi-s uγen awal, rewlen si Sudum. Ur ḥbisen, ur muqlen γer deffir. Meεna, tameṭṭut n Luṭ ur tuγ ara awal. Mi d-lḥan kra n lweqt si Sudum, teḥbes, dγa tezzi γer deffir. Imiren kan tameṭṭut n Luṭ tuγal ţ-ţigejdit n lemleḥ. Twalaḍ-ţ di ţţeswiṛa-ya?

Nezmer a nestenfeε mliḥ s teqsiṭ-agi. Nwala belli Ṛebbi yeţsellik wid i s-yeţţaγen awal, ma d wid ur s-neţţaγ ara awal ad mmten.

Laṣel n ddunit 13:5-13; 18:20-33; 19:1-29; Luqa 17:28-32; 2 Buṭrus 2:6-8.

Luṭ yerwel si Sudum


Isteqsiyen

  • Acuγer i mfaraqen Abṛaham d Luṭ?
  • Ayγer i gextaṛ Luṭ ad iεic di Sudum?
  • Amek i gan imezdaγ n Sudum?
  • Acu i nnant snat lmalayekkat i Luṭ?
  • Acimi i tuγal tmeṭṭut n Luṭ ţ-ţigejdit n lemleḥ?
  • Amek i nezmer a nestenfeε swayen yeḍran ţ-ţmeṭṭut n Luṭ?

Isteqsiyen nniḍen

  • Γer Laṣel n ddunit 13:5-13.

    Bac a nefru iγeblan gar-aneγ, acu i nezmer a nelmed deg wayen yexdem Abṛaham? (Laṣel 13:8, 9; Ṛuma 12:10; Filib. 2:3, 4)

  • Γer Laṣel n ddunit 18:20-33.

    Deg wayen i genna Yahwa i Abṛaham, acu i γ-d-yefkan ṭṭmana belli Σisa d Baba-s ad ḥasben s lḥeqq? (Laṣel 18:25, 26; Matta 25:31-33)

  • Γer Laṣel n ddunit 19:1-29.

    Σlaḥsab n Wedlis Iqedsen, amek i geḥseb Ṛebbi irgazen yegganen d yergazen nniḍen? (Laṣel 19:5, 13; Lewwi 20:13)

    Deg wayen yeεnan tiγin n wawal i lewṣayat n Ṛebbi, acu n lxilaf yellan ger Abṛaham d Luṭ? Acu i γ-isselmad wannect-a? (Laṣel 19:15, 16, 19, 20; 22:3)

  • Γer Luqa 17:28-32.

    Amek i teḥseb cci tmeṭṭut n Luṭ deg wul-is? I nekni, amek i glaq a nḥader iman-nneγ deg wannect-a? (Luqa 12:15; 17:31, 32; Matta 6:19-21, 25)

  • Γer 2 Buṭrus 2:6-8.

    Am Luṭ, acu i glaq a nḥuss γef wayen yeεnan ddunit ijehlen i γ-d-yezzin? (Ḥiziq. 9:4; 1 Yuḥ. 2:15-17)