Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 14: Yeţţujeṛṛeb Abṛaham

Taqsiṭ tis 14: Yeţţujeṛṛeb Abṛaham

TWALAḌ d acu i gxeddem dagi Abṛaham? Yeṭṭef lmus deg ufus-is am wakken yekker ad ineγ mmi-s. Acuγer ara t-ineγ? Uqbel a d-nerr lǧawab, a nwali amek Abṛaham d Ṣara i d-sεan mmi-tsen.

Abṛaham la yeţbuddu Isḥaq d asfel

Tecfiḍ? Ṛebbi iwεed-asen belli a d-sεun aqcic. Lameεna iban-ed am wakken d lmuḥal wannect-a, axaṭer Abṛaham d Ṣara llan d imγaren. Meεna Abṛaham, neţţa, yumen belli Ṛebbi yezmer i wayen yeḥseb wemdan d lmuḥal. D acu i geḍran ihi?

Tura iεedda useggas kamel seg wasmi i gexdem Ṛebbi lemεahda. Asmi i gewweḍ Abṛaham 100 iseggasen di leεmeṛ-is, Ṣara 90, sεan-d aqcic iwumi i semman Isḥaq. Ṛebbi yeṭṭef deg wawal-is!

Asmi i guγal Isḥaq d argaz, Yahwa ijeṛṛeb liman n Abṛaham. Issawel-as: ‘Abṛaham!’ Abṛaham yerra-yas: ‘Anεam!’ Ṛebbi yenna-yas: ‘Ddem mmi-k awḥid, Isḥaq, tṛuḥeḍ γer yiwen wedrar ara k-d-mleγ. Dinna neγ mmi-k tefkeḍ-t d asfel.’

Acḥal i sseḥznen lehduṛ-agi Abṛaham axaṭer iḥemmel aṭas mmi-s. Yerna tecfiḍ, Ṛebbi yewεed belli tarwa n Abṛaham aţ-ţεic di tmurt n Kanεan. Lameεna, amek ara yeḍru waya ma yemmut Isḥaq? Γas ur ifhim ara imeslayen-a, Abṛaham yuγ awal i Ṛebbi.

Mi gewweḍ γer wedrar, Abṛaham icudd mmi-s Isḥaq, issers-it γef udekkan n iseflawen (uεalṭar) i gebna. Syenna, Abṛaham iẓẓel afus-is γer lmus akken ad ineγ mmi-s. Imiren kan lmelk n Ṛebbi issawel-as: ‘Abṛaham, Abṛaham!’ Abṛaham yerra-yas: ‘Anεam!’

Ṛebbi yenna-yas s yimi n lmelk-nni: ‘Ur teẓẓel ara afus-ik γer weqcic-nni, ur s-xeddem acemma! Tura ẓriγ belli tumneḍ yis-i axaṭer ur iyi-tekkiseḍ ara mmi-k, awḥid-ik.’

Acḥal i meqqer liman i gesεa Abṛaham di Ṛebbi! Yumen belli yezmer Yahwa i kullec, yezmer ula i ḥeggu n Isḥaq si lmut. Lameεna di tin n ṣṣeḥ, Ṛebbi ur yebγi ara ad ineγ Abṛaham mmi-s. Γef waya i s-d-issken yiwen ikerri iḥeṣlen deg inijel, yenna-yas i Abṛaham a t-yefk d asfel deg wemkan n mmi-s.

Laṣel n ddunit 21:1-7; 22:1-18.



Isteqsiyen

  • Anta lemεahda i gefka Ṛebbi i Abṛaham? Amek i geṭṭef Ṛebbi deg wawal-is?
  • Akken i t-teţwaliḍ di ţţeswiṛa, amek i gjeṛṛeb Ṛebbi liman n Abṛaham?
  • Acu i gexdem Abṛaham γas akken ur yefhim ara ayen i s-d-yeḍleb Ṛebbi?
  • Acu i geḍran m’akken yekker Abṛaham ad ineγ mmi-s s lmus?
  • Acḥal i meqqer liman yesεa Abṛaham di Ṛebbi?
  • Acu i s-d-ijuba Ṛebbi i Abṛaham akken a t-imudd d asfel, yerna amek?

Isteqsiyen nniḍen

  • Γer Laṣel n ddunit 21:1-7.

    Ayγer i gesseḍher Abṛaham i mmi-s ass wis tmanya? (Laṣel 17:10-12; 21:4)

  • Γer Laṣel n ddunit 22:1-18.

    Amek i d-isbeggen Isḥaq ṭṭaεa-ines γer baba-s Abṛaham? Amek i d-imettel wannect-a lḥaǧa ara yeḍrun γer zdat yesεan azal akteṛ? (Laṣel 22:7-9; 1 Kurin. 5:7; Filib. 2:8, 9)