Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 5: Tebda fell-asen lmeḥna

Taqsiṭ tis 5: Tebda fell-asen lmeḥna

SEG wasmi i d-ffγen si leǧnan n Σidin, Adam d Ḥewwa mmugren aṭas n lemḥayen. Ilaq ad εetben aṭas iwakken ad ččen aγrum-nsen. Anda ma ddan zzin-asen-d isennanen d ubuneqqar. Annect-a yeḍra-d imi ur uγen ara awal i Ṛebbi yerna sṛuḥen tadukli i cerken yid-es.

Adam akk-d mmi-s sεan lxedma yesseεtaben

Lameεna tella lexsaṛa yugaren akk tigi: Adam d Ḥewwa bdan ţmeţţaten. Tecfiḍ? Ṛebbi iεeggen-asen belli ass ideg ara ččen si ttejṛa-nni i sen-iḥeṛṛem ad mmten. Ihi, ass ideg i ččan, bdan ţmeţţaten. Mačči d lehbala imi ur uγen ara awal i Ṛebbi?

Adam d Ḥewwa sεan-d dderya di beṛṛa n leǧnan n Σidin iseg i ten-id-issufeγ Ṛebbi. Γef waya, arraw-nsen ula d nutni ţţiwsiren yerna ţmeţţaten.

Ah! Lemmer Adam d Ḥewwa uγen awal i Yahwa, tili ad ilin di sseεd ama d nutni ama d arraw-nsen. Tili ad εicen γef lqaεa di sseεd i lebda. Tili ulaḥedd win ara yuγalen d amγar, ara ihelken neγ ara yemmten.

Ṛebbi yebγa ad εicen yemdanen di sseεd i lebda. Iggull akka ara yili lḥal yiwen wass. Ass-nni, lqaεa meṛṛa aţ-ţili d lǧennet yerna imdanen akk ad sεun ṣṣeḥḥa n lεali. Imdanen ad ilin d iḥbiben n Ṛebbi yerna ad ilin d iḥbiben wway gar-asen.

Ḥewwa d warraw-is

Lameεna Ḥewwa tesṛuḥ tadukli i ţ-icerken d Ṛebbi. Annect-a yeţţawi-yas-d leεtab d lqerḥ mkul m’ara d-terbu. Mebla ccekk temmuger aṭas n leḥzen imi ur tuγ ara awal i Yahwa!

Adam d Ḥewwa sεan-d aṭas n warrac ţ-ţullas. Semman-as i mmi-tsen amenzu Kayin, ma d wis sin Habil. Teẓriḍ d acu yeḍran yid-sen?

Laṣel n ddunit 3:16-23; 4:1, 2; Aweḥḥi 21:3, 4.



Isteqsiyen

  • Amek i ţεicin Adam d Ḥewwa di beṛṛa n leǧnan n Σidin?
  • Acu i gebdan iḍerru d Adam akk-d Ḥewwa, yerna acuγer?
  • Ayγer dderya n Adam akk-d Ḥewwa ţţiwsiren yerna ţmeţţaten?
  • Lukan Adam d Ḥewwa uγen awal i Yahwa, amek ara εicen nutni akk-d dderya-nsen?
  • Anta lexsaṛa yesseḥzanen i temmuger Ḥewwa imi ur tuγ ara awal?
  • Amek i ţţusemman warrac imezwura n Adam akk-d Ḥewwa?
  • Wi ten-ilan warrac ţ-ţullas-agi nniḍen di ţţeswiṛa?

Isteqsiyen nniḍen

  • Γer Laṣel n ddunit 3:16-23 akk-d 4:1, 2.

    Amek deεwessu i d-yeγlin γef lqaεa tḥuza tudert n Adam? (Laṣel 3:17-19; Ṛuma 8:20, 22)

    Imi lmeεna n yisem n Ḥewwa “ţ-ţin iddren”, acuγer yerna yisem-agi fell-as? (Laṣel 3:20)

    Amek i d-isban Yahwa belli yefka lḥeṛma i Adam d Ḥewwa, γas akken denben? (Laṣel 3:7, 21)

  • Γer Aweḥḥi 21:3, 4.

    Anti “leḥwayeǧ” n zik i tḥarem ad ţwakksent?