Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 4: Acuγer i d-ffγen si lǧennet

Taqsiṭ tis 4: Acuγer i d-ffγen si lǧennet

WALI acu i gḍerrun tura. Adam d Ḥewwa yessufeγ-iten-id Ṛebbi si leǧnan n Σidin. Teẓriḍ acimi?

Adam d Ḥewwa yessufeγ-iten-id Ṛebbi si leǧnan n Σidin

Axaṭer xedmen lexsaṛa tameqrant. Γef waya i ten-iεuqeb Yahwa. Teẓriḍ d acu i xedmen?

Xedmen yiwet n lḥaǧa i sen-yugi Ṛebbi. Ṛebbi yeǧǧa-ten ad ččen si ttjuṛ meṛṛa n leǧnan-nni, siwa yiwet. Ma yella ččan si lfakya n ttejṛa-yagi ad mmten, axaṭer ttejṛa-yagi d ayla n Ṛebbi. Yak neẓra belli diri ma neddem ayla n medden, neγ ala? Ihi d acu i geḍran?

Yiwen wass ideg i tella Ḥewwa weḥd-es di leǧnan-nni, ihdeṛ-as-d yiwen wezrem. D lewhayem! Yenna-yas i Ḥewwa aţ-ţečč si lfakya n ttejṛa-nni i sen-yugi Ṛebbi ad ččen. Xuḍi asmi i d-ixleq Ṛebbi izerman, ur heddṛen ara. Ihi d albeεḍ i d-issenṭqen azrem-nni. Anwa-t wagi?

Mačči d Adam. Bla ccekk ihi d yiwen ger wid i d-ixleq Ṛebbi aṭas n lweqt uqbel a d-ixleq lqaεa. Lexliqat-agi d lmalayekkat ur nezmir ara a nwali. Yiwen lmelk ger lmalayek-agi tekcem-it nnefxa, dγa yebda yeţmenni ad iḥkem am Ṛebbi. Lmelk-a yebγa a s-aγen awal yemdanen i neţţa wala i Yahwa. D lmelk-agi i d-issenṭqen azrem-nni.

Lmelk-agi iγder (ixdeε) Ḥewwa. Yenna-yas belli ma tečča si lfakya-nni yeţţuḥeṛṛmen aţ-ţuγal am Ṛebbi. Ḥewwa tumen-it, dγa tečča. Umbeεd Adam yečča ula d neţţa. Adam d Ḥewwa ur uγen ara awal i Ṛebbi, daymi i sen-tṛuḥ tnezduγt-nsen di leǧnan-nni amelḥan.

Lameεna, yiwen wass lqaεa meṛṛa aţ-ţili tecbeḥ am leǧnan n Σidin. Deg wayen i d-iteddun aţ-ţwaliḍ amek i tzemreḍ aţ-ţeţţekkiḍ di ccγel-agi. Lameεna tura a nwali d acu i geḍran d Adam akk-d Ḥewwa.

Laṣel n ddunit 2:16, 17; 3:1-13, 24; Aweḥḥi 12:9.



Isteqsiyen

  • Acu akka yeḍran d Adam akk-d Ḥewwa di ţţeswiṛa-yagi?
  • Acuγer i ten-iεuqeb Yahwa?
  • Acu i genna yiwen wezrem i Ḥewwa?
  • Anwa i d-issenṭqen azrem-nni i ghedṛen i Ḥewwa?
  • Acimi i sen-tṛuḥ tnezduγt-nsen i Adam d Ḥewwa di lǧennet?

Isteqsiyen nniḍen

  • Γer Laṣel n ddunit 2:16, 17 akk-d 3:1-13, 24.

    Acuγer asteqsi i gefka wezrem i Ḥewwa ur d-isban ara Yahwa akken yella s ṣṣeḥ? (Laṣel 3:1-5; 1 Yuḥ. 5:3)

    Amek i gezmer a γ-iεiwen lemtel n Ḥewwa akken a neţḥadar iman-nneγ? (Filib. 4:8; Yeε. 1:14, 15; 1 Yuḥ. 2:16)

    Amek i d-sbanen Adam akk-d Ḥewwa belli ugin ad qeblen lγelṭat-nsen? (Laṣel 3:12, 13)

    Amek i dufεen γef leḥkem n Yahwa ikerruben-nni (lmalayekkat) ibedden γer tama n ccerq n leǧnan n Σidin? (Laṣel 3:24)

  • Γer Aweḥḥi 12:9.

    Acu i d-isbeggnen belli Cciṭan idemmer lγaci ad xaṣmen leḥkem n Ṛebbi? (1 Yuḥ. 5:19)