Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 3: Argaz ţ-ţmeṭṭut imezwura

Taqsiṭ tis 3: Argaz ţ-ţmeṭṭut imezwura

ACU i neţwali tura γef ţţeswiṛa-ya? Neţwali argaz ţ-ţmeṭṭut imezwura. Teẓriḍ anwa i ten-id-ixelqen? D Ṛebbi. Tessneḍ isem n Ṛebbi? D Yahwa. Argaz-agi d Adam, ma ţ-ţameṭṭut-agi d Ḥewwa.

Adam d Ḥewwa di leǧnan n Σidin

Atah wamek i d-ixleq Yahwa Adam. Iddem-ed aγebbar n wakal, yessufeγ-ed yis yiwet n lǧeţţa ur nesεi ara lexṣaṣ, lǧeţţa n wergaz. Mbeεd, Ṛebbi isuḍ deg wanzaren-is, dγa Adam yuγal d amdan iddren.

Yahwa Ṛebbi ihegga ccγel i Adam. Yenna-yas ad yefk ismawen i lḥiwan. Ilaq-as i Adam a ten-imuqel nezzeh akken a sen-d-yaf ismawen ara sen-d-iṣebḥen. M’akken i sen-iţsemmi i lḥiwan, Adam ifaq i yiwet n lḥaǧa. Teẓriḍ d acu-ţ?

Iwala belli yal yiwen si lḥiwan yesεa tamwanest. Yella ubabat ţ-ţyemmaţ di twacult n lfilat. Yella ubabat ţ-ţyemmaţ di twacult n yizmawen. Ma d Adam, neţţa, yella weḥd-es. Ṛebbi yesseγli-d ihi yiwen n nadam fell-as d ameqran, dγa yekkes-as-d iγes seg ubeṛdi. S yiγes-nni, Yahwa yexdem tameṭṭut i Adam.

Tura Adam yeččuṛ d lfeṛḥ! Nezmer a nxayel acḥal i tefṛeḥ Ḥewwa mi d-tufa iman-is di leǧnan-agi icebḥen! Tura zemren ad sεun dderya w’ad εicen akken di sseεd.

Yahwa yebγa i Adam d Ḥewwa tamεict n lebda. Yebγa daγen ad rren lqaεa meṛṛa am leǧnan-nni ifazen n Σidin. Nezmer a nxayel acḥal i feṛḥen m’ara ţxemmimen γer ccγel i ten-iţṛaǧun! Lukan d ayen yellan deg ufus-ik, aţ-ţeţţekkiḍ di ccγel-agi ara yerren lqaεa d leǧnan igerrzen? Lameεna sseεd-nsen ur idum ara. A nwali acimi.

Ahellil 83:18; Laṣel n ddunit 1:26-31; 2:7-25.



Isteqsiyen

  • Anwa lxilaf yellan ger ţţeswiṛa n teqsiṭ tis 3 ţ-ţin n teqsiṭ tis 2?
  • Anwa i d-ixelqen argaz amezwaru? Anwa i d isem n wergaz-agi?
  • Anwa ccγel i gefka Ṛebbi i Adam?
  • Acuγer i d-isseγli Ṛebbi yiwen n nadam d ameqran γef Adam?
  • Acḥal n lweqt i zemren ad εicen Adam d Ḥewwa? Acu n ccγel i sen-yefka Yahwa a t-xedmen?

Isteqsiyen nniḍen

  • Γer Ahellil 83:18.

    Anwa i d isem n Ṛebbi? Ini-d acḥal meqqer wemkan i gesεa Ṛebbi γef ddunit meṛṛa. (Irm. 16:21; Dan. 4:17)

  • Γer Laṣel n ddunit 1:26-31.

    Anta lḥaǧa taneggarut i d-yexleq Ṛebbi ass wis seţţa, yerna deg wacu i temxalaf lexliqa-ya d lḥiwan? (Laṣel 1:26)

    Acu i gefka Yahwa ama i yemdanen ama i lḥiwan? (Laṣel 1:30)

  • Γer Laṣel n ddunit 2:7-25.

    Acu i glaq a t-yexdem Adam uqbel ad yefk ismawen i lḥiwan? (Laṣel 2:19)

    Amek i γ-iţεawan Laṣel n ddunit 2:24 a nefhem tamuγli yesεa Yahwa γef zzwaǧ, lefraq d berru? (Matta 19:4-6, 9)