Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 10: Aḥemmal n waman

Taqsiṭ tis 10: Aḥemmal n waman

DI BEṚṚA n lbabuṛ-nni, imdanen ţkemmilen tudert-nsen am zik. Ugin ad amnen belli a d-yas uḥemmal n waman. Ţmesxiṛen ahat akteṛ. Lameεna qrib taḍṣa-nsen a sen-tuγal d imeṭṭi.

Imdanen yugaden akk-d lḥiwan dewwṛen-asen-d iḥemmalen n waman

Asmi ur bnin ara fell-as, tebda tekkat lehwa. Kra kra, ikkat-ed ugeffur d iceṛcuṛen. Ayen akk i d-yenna Nuḥ yeḍra. Lameεna tura dayen ifut lḥal, ulac win izemren ad ikcem γer lbabuṛ-nni. Yahwa izemmem mliḥ tawwurt.

S lemγawla, uγalen waman-nni d isaffen imeqranen i gγummen akk izuγar (luḍa). Aman-agi sseγlin ttjuṛ, reffden srusun iẓra imeqranen yerna xedmen aṭas n lḥess. Imiren imdanen tekcem-iten tugi, dγa ulin γer imukan εlayen. Ah! Acḥal i nedmen tura imi ur ḥessen ara i Nuḥ yerna ur kcimen ara γer lbabuṛ-nni asmi i mazal teldi tewwurt! Lameεna tura ifut lḥal.

Aman ţzidin rennun. Ageffur ikkat 40 n wussan d 40 n wuḍan. Iḥemmalen n waman γummen tiγaltin yerna leḥqen ula d ixfawen n idurar. Akken i t-id-yenna Ṛebbi, imdanen d lḥiwan meṛṛa yellan di beṛṛa n lbabuṛ mmuten. Lameεna ḥaca wid yellan daxel-is i gmenεen.

Nuḥ d warraw-is xedmen akken ilaq lbabuṛ-nni. Asmi i t-refden waman, yebda yeţţifrir. Yiwen wass, yeḥbes ugeffur dγa iḍall-ed yiṭij. Ayen akk i sen-d-yezzin yessewham! Lqaεa meṛṛa tuγal d lebḥeṛ ameqran. Ḥaca lbabuṛ-nni i tezmer aţ-ţwali tiṭ sennig waman.

Lbabuṛ-nni yeţţifrir γef waman

Tura mmuten leγwal-nni. Ur ţţuγalen ara ad qehren imdanen. Mmuten akk nutni ţ-ţyemmatin-nsen d yemcumen nniḍen meṛṛa. Lameεna acu yeḍran d ibabaten-nsen?

Ibabaten n leγwal-nni ur llin ara d imdanen am nekni. Llan d leṛwaḥ, yeεni d lmalayek, i d-iṣubben γer lqaεa akken ad εicen am yemdanen. Asmi i d-iwet uḥemmal n waman ur mmuten ara d yemcumen nniḍen. Ǧǧan lǧeţţa-nni n wemdan i lsan, uγalen s igenni am lmalayek. Lameεna ur sen-iεemmed ara Ṛebbi ad uγalen γer twacult-is n lmalayekkat. Uγalen d lmalayekkat n Cciṭan i geţţusemman leǧnun deg Wedlis Iqedsen.

Ṛebbi issker-ed aḍu i d-ihubben γef lqaεa, dγa bdan neqqsen waman. Σeddan xemsa wagguren d wamek i gers lbabuṛ-nni γef yixef n wedrar. Mi εeddan kra n wussan nniḍen, wigad yellan daxel n lbabuṛ-nni bdan ţwalin tiqucac n idurar. Aman ţkemmilen neqqsen.

Mbeεd, Nuḥ iserreḥ i tgerfa γer beṛṛa. Tefferfer, lameεna ur tεeṭṭel ara tuγal-ed axaṭer ur tufi ara amkan iwulmen anda ara ters. Teţṛuḥu acḥal d abrid, lameεna daymen teţţuγal-ed γer lbabuṛ-nni.

Titbirt

Nuḥ yebγa ad iẓer ma ṭṭaxxṛen waman γef lqaεa, ihi iserreḥ i tetbirt γer beṛṛa. Titbirt-nni tuγal-ed ula d neţţa-t axaṭer ur tufi ara amkan anda ara ters. Nuḥ iserreḥ-as abrid wis sin, tikkelt-a tuγal-ed s yifer n tzemmurt deg yimi-s. Swakka i geẓra Nuḥ belli wexxṛen waman γef lqaεa. Nuḥ iserreḥ-as i tetbirt-nni abrid wis tlata, tikkelt-a tufa amkan yekkawen, γef waya ur d-tuγal ara.

Tura Ṛebbi yenna i Nuḥ: ‘Ffeγ si lbabuṛ, kečč ţ-ţwacult-ik. Ssufeγ daγen lḥiwan meṛṛa yellan yid-ek.’ Nuḥ ţ-ţwacult-is qqimen daxel n lbabuṛ-nni akteṛ n useggas. Nezmer a nxayel acḥal i feṛḥen mi d-ffγen γer beṛṛa yerna mazal-iten ddren!

Laṣel n ddunit 7:10-24; 8:1-17; 1 Buṭrus 3:19, 20.



Isteqsiyen

  • Acuγer ur yezmir yiwen ad ikcem γer lbabuṛ asmi i tebda tekkat lehwa?
  • Acḥal n wussan d wuḍan i d-iwet ugeffur s lqeḍra n Yahwa? Sani i wwḍen waman-nni?
  • Acu yeḍran d lbabuṛ-nni asmi i γummen waman lqaεa?
  • Menεen leγwal-nni di lḥemla n waman? Acu yeḍran d ibabaten-nsen?
  • Acu yeḍran d lbabuṛ-nni mi εeddan xemsa wagguren?
  • Acimi i gserreḥ Nuḥ i tgerfa γer beṛṛa n lbabuṛ-nni?
  • Amek i geẓra Nuḥ belli wexxṛen waman γef lqaεa?
  • Acu yenna Ṛebbi i Nuḥ ţ-ţwacult-is asmi i sεeddan akteṛ n useggas di lbabuṛ-nni?

Isteqsiyen nniḍen

  • Γer Laṣel n ddunit 7:10-24.

    S wacu i tegla lḥemla-nni n waman? (Laṣel 7:23)

    Acḥal n wussan i gεeddan d wamek i neqsen waman γef lqaεa? (Laṣel 7:24)

  • Γer Laṣel n ddunit 8:1-17.

    Amek i d-isbeggen Laṣel n ddunit 8:17 belli ur ibeddel ara lebγi n Yahwa γef wayen yeεnan lqaεa? (Laṣel 1:22)

  • Γer 1 Buṭrus 3:19, 20.

    Amek i gḥuseb Ṛebbi lmalayek-nni i t-iεuṣan, asmi i uγalent s igenni? (Yuda 6)

    Yahwa izmer ad isellek iqeddacen-is. Amek taqsiṭ n Nuḥ ţ-ţwacult-is tesseǧhad liman-nneγ deg wannect-a? (2 Buṭ. 2:9)