Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Acu yesselmad s ṣṣeḥ Wedlis Iqedsen?

 IXEF WIS TNAC

Amek ara nesεu tamεict ara iεeǧben i Ṛebbi?

Amek ara nesεu tamεict ara iεeǧben i Ṛebbi?
  • Amek i tzemreḍ aţ-​ţuɣaleḍ d aḥbib n Ṛebbi?

  • Cciṭan yerra di ccekk lḥeqq i gesεa Ṛebbi ad iḥkem. Deg wacu i k-​yeεna waya?

  • Anta tikli ur neεǧib ara i Yahwa?

  • Amek i tzemreḍ aţ-​ţesεuḍ tamεict ara iεeǧben i Ṛebbi?

1, 2. Bder-​ed imdanen i geḥseb Yahwa d iḥbiben-​is.

ANWA i tebɣiḍ ad yili d aḥbib-​ik? Bla ccekk, d albeεḍ i geţxemmimen am kečč, i gḥemmlen ayen i tḥemmleḍ yerna i geţţaken lqima i wayen iwumi teţţakeḍ lqima. Aţ-​ţebɣuḍ ahat aţ-​ţesεuḍ d aḥbib win ikesben ṣṣifat n lεali; di lemtel, albeεḍ i geṣfan yerna yelhan.

2 Seg wasmi i d-​tebda ddunit, Ṛebbi yeţţextiṛi imdanen i geţţuɣalen d iḥbiben-​is. Di lemtel, Abṛaham yeţţusemma aḥbib n Ṛebbi. (Γer-​ed Icεaya 41:8; Yeεqub 2:23.) Yahwa yenna-​d belli Dawed ‘d argaz i gebɣa wul-​is’, axaṭer yella d win i gesεan ṣṣifat i gḥemmel. (Lecɣal 13:22) Yahwa yeḥseb daɣen Danyil d win ‘εzizen’ fell-​as.—Danyil 9:23.

3. Amek i gebɣa Yahwa ad ilin lεibad ara yextiṛ d iḥbiben-​is?

3 Acimi i geḥseb Yahwa Abṛaham d Dawed akk-​d Danyil d iḥbiben-​is? Yenna-​yas i Abṛaham: “Tuɣeḍ-​iyi awal.” (Laṣel n ddunit 22:18) Yahwa iţqerrib ihi ɣer wid i gxeddmen s wannuz ayen i sen-​d-​iṭṭalab. Yenna-​yasen i wat Isṛayil: “Ţţaɣet-​iyi awal, a wen-​iliɣ d Illu-​nwen, kwenwi a yi-​tilim d agdud-​iw.” (Irmiya 7:23) Ma yella  teţţaɣeḍ awal i Yahwa, tzemreḍ aţ-​ţuɣaleḍ ula d kečč d aḥbib-​is.

YAHWA YEŢŢAK-​ED LǦEHD I LEḤBAB-​IS

4, 5. Amek i gesseǧhad Yahwa iqeddacen-​is?

4 Xemmem ɣer lmeεna i sεan imeslayen-​agi: “aḥbib n Ṛebbi.” Adlis Iqedsen yeqqar-​ed belli Yahwa yeţnadi tiswiεin ideg ara “isseǧhed at wulawen ikemlen.” (2 Amezruy 16:9) Amek ara k-​isseǧhed? Deg Uhellil 32:8, yura wayagi: “[Nekk, Yahwa] a k-​sfehmeɣ, a k-​mleɣ abrid ara t-​tebεeḍ; a k-​weṣṣiɣ, ad serseɣ tamuɣli-​w fell-​ak.”

5 Ay εzizit imeslayen-​agi i d-​isbegginen acḥal i geţḥebbiṛ Yahwa fell-​ak! A k-​d-​yefk lewṣayat ara k-​iṣelḥen yerna ad iḥareb fell-​ak ma tessexdameḍ-​tent di tudert-​ik. Yahwa yebɣa a k-​iεiwen aţ-​ţqableḍ ajeṛṛeb. (Γer-​ed Ahellil 55:23.) Ihi, ma yella tqeddceḍ fell-​as s wul ikemlen, tzemreḍ a d-​tecbuḍ bab n Uhellil, i d-​yennan s ţţeḥqiq: “Izga [Yahwa] zdat-​i, ɣer tama-​w tayeffust i geţţili, d lmuḥal ad mdeṛkaleɣ.” (Ahellil 16:8; 63:9) Ţ-​ţideţ, Yahwa yezmer a k-​iεiwen aţ-​ţesεuḍ tamεict i s-​iεeǧben. Lameεna, akken i t-​teẓriḍ, yella weεdaw i gebɣan a k-​iḥeṛṛem aţ-​ţawḍeḍ ɣer waya.

CCIṬAN YECQARREW ṚEBBI

6. Acu i d-​yenna Cciṭan ɣef lεibad?

6 Akken i t-​id-​nwala deg yixef wis 11, εlaḥsab n Cciṭan Iblis, Ṛebbi ur yesεi ara lḥeqq ad yeḥkem. Yerra Yahwa d akeddab yerna d amesbaṭli imi ur yeǧǧi ara Adam d Ḥewwa ad ḍebbren s yiman-​nsen d acu yelhan d acu i diri. Adam d Ḥewwa denben. Lqaεa tebda teţţeεmaṛ s warraw-​nsen. Dɣa, Cciṭan yerra di ccekk ayen yellan deg wulawen n lεibad meṛṛa. Am wakken yenna-​d: ‘Lεibad ur ţţeεbaden ara Ṛebbi s leḥmala. Lukan a yi-​d-​teţţunefk tegniţ, ad xedmeɣ ayen i glaqen iwakken mkul yiwen seg-​sen, akken yebɣu yili, ad ixaṣem Ṛebbi.’ D ayen i genwa Cciṭan  yezmer a t-​yexdem i yiwen wergaz yeţţusemman Yub. Anwa i d Yub, yerna amek armi d-​yufa iman-​is di temsalt-​agi i d-​yexleq Cciṭan?

7, 8. a) Deg wacu i gxulef Yub lεibad n zzman-​ines? b) Acu i d-​yenna Cciṭan ɣef wayen i gdemmren Yub ad yeqdec ɣef Ṛebbi?

7 Azal n 3 600 iseggasen aya i gεeddan segmi i gεac Yub. Yella d argaz n lεali; daymi i d-​yenna fell-​as Yahwa: “Ulac argaz am neţţa di ddunit; iṣfa yerna d uwqim, iţţagwad Illu yerna yexḍa i cceṛ.” (Yub 1:8) Yub iεǧeb i Ṛebbi.

8 Cciṭan Iblis yerra di ccekk ayen i gdemmren Yub ad iqdec ɣef Ṛebbi. Yenna i Yahwa: “Eεni mačči d kečč i gḥurben fell-​as [ɣef Yub], ɣef wexxam-​is, ɣef wayen meṛṛa yesεa, si mkul tama? Tburkeḍ ayen akw ixeddem ufus-​is, yerna tiqeḍεiyin-​is uɣent-​ed tamurt meṛṛa. Lameεna ẓẓel afus-​ik fell-​as, nnal ayen akw yesεa, a k-​inεel qbala.”—Yub 1:10, 11.

9. Acu yexdem Yahwa di temsalt i d-​yexleq Cciṭan, yerna ayɣer?

9 S wannect-​a, Cciṭan yebɣa a d-​yini belli Yub iţţeεbad Ṛebbi i nnfeε-​is kan. Yenna-​d daɣen belli ma yella yeţţujeṛṛeb wergaz-​agi, ala axaṣem ara ixaṣem Ṛebbi. Acu yexdem Yahwa di temsalt-​agi ideg i t-​icqarrew Cciṭan? Imi tamsalt-​a teεna ayen yellan deg wul n Yub, Yahwa yeǧǧa Cciṭan a t-​ijeṛṛeb. Akka, a d-​iban εinani ma yella Yub iḥemmel Ṛebbi neɣ ala.

YUB YEŢŢUJEṚṚEB

10. Amek i geţţujeṛṛeb Yub, yerna acu yexdem?

10 Cciṭan yesεedda-​d bihfih Yub si mkul d ṣṣenf n ujeṛṛeb. Kra si lmal-​is yeţwaker-​as, wayeḍ yeţwanɣa. Amur ameqran seg iqeddacen-​is mmuten. Yufa-​d iman-​is yefles. Mbeεd, teɣli-​d fell-​as twaɣit: arraw-​is di εecṛa yid-​sen mmuten deg yiwet n tbuciḍant. Γas akken ḍrant-​as-​d twaɣiyin-​agi meṛṛa, “Yub ur idnib ara; ur ilumm ara Illu.”—Yub 1:22.

11. a) Anta lḥaǧa tis snat i d-​iger Cciṭan ɣef Yub, yerna d acu yexdem Yahwa? b) Acu i d-​yenna Yub mi d-​yeɣli fell-​as lehlak-​nni qerriḥen?

 11 Mačči d aya kan i s-​yexdem Cciṭan i Yub. Ahat yenna deg yiman-​is belli ɣas akken Yub yeṣber mi s-​iṛuḥ lmal-​is, iqeddacen-​is akk-​d warraw-​is, bla ccekk ad ixaṣem Ṛebbi ma yeɣli-​d fell-​as lehlak. Yahwa yeǧǧa-​t ad iwet Yub s yiwen n lehlak d ameεfun yerna qerriḥ. Γas akken, Yub ur s-​iṛuḥ ara liman-​ines. Yenna-​d seg wul-​is imeslayen-​agi: “Alamma d asm’ara mmteɣ, ur nekkṛeɣ ara belli ṣfiɣ.”—Yub 27:5, Ṭrejma n ddunit tajdiṭ (s tṛumit).

Yub iţţubarek imi yeqqim d unṣiḥ.

12. Amek i d-​ifḍeḥ Yub lekdeb i d-​iger Cciṭan?

12 Yub ur yeẓri ara d Cciṭan i d ssebba n lehmum-​is. Imi ur yeεlim ara belli Cciṭan yerra di ccekk lḥeqq i gesεa Ṛebbi ad yeḥkem; iɣil (yenwa) sɣur Ṛebbi i d-​kkant cceddat i d-​yeɣlin fell-​as. (Yub 6:4; 16:11-14) Acu kan, yeqqim d unṣiḥ zdat n Ṛebbi. Nnṣaḥa-​ines tbeggen-​ed belli Cciṭan yeɣleḍ mi d-​yenna belli Yub iqeddec ɣef Ṛebbi i nnfeε-​is kan.

13. Acu n tegniţ i tefka nnṣaḥa n Yub i Ṛebbi?

13 Nnṣaḥa n Yub tefka tagniţ i Yahwa akken ad iǧaweb i Cciṭan. Yub yella s ṣṣeḥ d aḥbib n Ṛebbi; Ṛebbi iburek-​it.—Yub 42:12-17.

TEΣNA-​K TEMSALT

14, 15. Iwacu i nezmer a d-​nini belli lekdeb i d-​iger Cciṭan ɣef Yub yeεna lεibad meṛṛa?

14 Mačči d nnṣaḥa n Yub kan i gerra Cciṭan di ccekk. Ula d kečč teεna-​k temsalt. D ayen i d-​iţbanen εinani di Lemtul 27:11, ideg i d-​yenna Wawal n Yahwa: “Ili-​k d ukyis, a mmi, ssefṛeḥ ul-​iw! Ad izmireɣ ad rreɣ i win i y-​ireggmen.” Imeslayen-​agi, yeţwaketben kra n leqrun mbeεd lmut n Yub, ţwerrin-​d belli Cciṭan mazal-​it ireggem Ṛebbi, yeεni yeţţaweḍ-​it, yerna yeţcetkay ɣef iqeddacen-​is. Ma yella nesεa tikli i gεeǧben i Yahwa, a d-​nesbeggen belli ayen i d-​yenna Cciṭan d lekdeb, yerna a nessefṛeḥ ul  n Ṛebbi. Acu i tenniḍ? Ur tennecṛaḥeḍ ara imi tzemreḍ a d-​tbeggneḍ belli d lekdeb wayen i d-​yenna Iblis, ɣas ma ilaq aţ-​ţbeddleḍ kra n leḥwayeǧ di tudert-​ik?

15 Err lbal-​ik ɣer wayen akka i d-​yenna Cciṭan: “Ayen akw yesεa wemdan iţţak-​it ɣef teṛwiḥt-​is.” (Yub 2:4) Mi d-​yenna ‘amdan’, ur d-​yeqsid ara kan Yub, lameεna lεibad meṛṛa. Ayagi yesεa lmeεna tameqrant. Cciṭan yerra di ccekk nnṣaḥa-​inek zdat Ṛebbi. Lukan ad yaf, ur teţţaɣeḍ ara awal i Ṛebbi yerna ur txeddmeḍ ara yakk ayen yellan d lewqam di teswiεin n ccedda. Amek i geţnadi a k-​issiweḍ ɣer waya?

16. a) Acu n ţţawilat i gessexdam Cciṭan akken ad issebεed imdanen ɣef Ṛebbi? b) Amek ara yessexdem ahat Iblis ţţawilat-​agi deg wayen i k-​yeεnan?

16 Akken i t-​id-​nefhem deg yixef wis 10, Cciṭan yeţţeεraḍ ad issebεed lεibad ɣef Ṛebbi s kra n ţţawilat. Deg yiwet lǧiha, iẓeddem “am yizem iṛeεεden, iţnadi anwa ara yessebleε.” (1 Buṭrus 5:8) Lateṛ-​is yeţban-​ed m’ara bɣun leḥbab-​ik, iεeggalen n twacult-​ik neɣ lεibad nniḍen a k-​ḥeṛṛmen aţ-​ţeɣreḍ Adlis Iqedsen neɣ aţ-​ţtebεeḍ ayen i tlemmdeḍ. * (Yuḥenna 15:19, 20) Di lǧiha nniḍen, Cciṭan “iţbeddil ṣṣifa, iţţarra iman-​is d lmelk n tafat.” (2 Ikurintiyen 11:14) Yezmer ad issexdem tiḥila bac a k-​ikellex yerna a k-​issebεed ɣef temεict iεeǧben i Ṛebbi. Yezmer daɣen a k-​issefcel. Γef lemtel, ad yeεreḍ a k-​iqenneε belli ur tessawaḍeḍ ara aţ-​ţεeǧbeḍ i Ṛebbi. Ama yella d ‘izem iṛeεεden’ ama yella d ‘lmelk n tafat’, Cciṭan ur ibeddel ara: mazal yeqqar-​ed belli ma teţţujeṛṛbeḍ aţ-​ţḥebseḍ leqdic i tqeddceḍ ɣef Ṛebbi. Amek ara tqableḍ  acqirrew-​agi w’a d-​tessekneḍ nnṣaḥa-​inek zdat n Ṛebbi, am wakken yexdem Yub?

TIΓIN N WAWAL I LEWṢAYAT N YAHWA

17. Anta i d ssebba yakk tameqrant ara k-​idemmren aţ-​ţaɣeḍ awal i lumuṛ n Yahwa?

17 Tzemreḍ aţ-​ţqableḍ acqirrew n Cciṭan ma yella tesεiḍ tamεict iεeǧben i Ṛebbi. Amek yeεni? Adlis Iqedsen yefka-​d leǧwab: “Aţ-​ţḥemmleḍ [Yahwa], Illu-​yik, s wul-​ik meṛṛa, s teṛwiḥt-​ik meṛṛa, s tezmert-​ik meṛṛa.” (Asmekti 6:5) Simmal teţţimɣur leḥmala-​inek i Ṛebbi, simmal tbeqquḍ aţ-​ţxedmeḍ ayen i k-​d-​yeṭṭalab. Atan wayen yekteb wemceggeε Yuḥenna: “Leḥmala n Yillu, d aḥraz n lumuṛ-​is.” Ma yella tḥemmleḍ Yahwa seg wul-​ik meṛṛa, aţ-​ţafeḍ belli “lumuṛ-​is ur ẓẓayit ara.”—1 Yuḥenna 5:3.

18, 19. a) Bder-​ed kra n lumuṛ n Yahwa. (Ẓer aḥric yeţţusemman: “ Xḍu i wayen ikṛeh Yahwa.”) b) Amek i neẓra belli Yahwa ur ɣ-​d-​iṭṭalab ara nnig n tezmert-​nneɣ?

18 Anwi-​ten lumuṛ n Yahwa? Kra εnan leḥwayeǧ ur nlaq ara a tent-​nexdem. Wali aḥric yeţţusemman “ Xḍu i wayen ikṛeh Yahwa.” Aţ-​ţafeḍ kra n leḥwayeǧ i gḥeṛṛem Wedlis Iqedsen. Di tazwara, ahat leḥwayeǧ-​agi a k-​d-​banent amzun ulac fell-​asent. Meεna, m’ara tmeyyzeḍ ɣef yefyar n Wedlis Iqedsen i d-​iţţunefken deg-​s, bla ccekk aţ-​ţwaliḍ belli leqwanen n Yahwa ččuṛen d lekyasa. A k-​d-​iban ahat iwεeṛ nezzeh aţ-​ţbeddleḍ kra n leḥwayeǧ di tikli-​inek. Acu kan, ma yella nesεa tamεict i gεeǧben i Ṛebbi, nfeṛṛeḥ ayendin. (Icεaya 48:17, 18) Lfeṛḥ-​agi tzemreḍ a t-​tewεuḍ (t-​tawḍeḍ). Amek i neεlem s waya?

19 D lmuḥal a ɣ-​d-​yeḍleb Yahwa ayen yellan nnig n tezmert-​nneɣ. (Γer-​ed Asmekti 30:11-14.) Yeẓra xiṛ-​nneɣ  ayen iwumi nezmer d wayen iwumi ur nezmir ara. (Ahellil 103:14) Uyerna, yezmer a ɣ-​d-​yefk lǧehd akken a s-​neţţaɣ awal. Amceggeε Bulus yura imeslayen-​a: “Illu yellan d unṣiḥ ur iţεemmid ara aţ-​ţeţwajeṛṛbem nnig n tezmert-​nwen; lameεna deg ujeṛṛeb nni, a d-​ifk tabburt, tazmert swayes ara tṣebrem.” (1 Ikurintiyen 10:13) Iwakken aţ-​ţṣebreḍ, Yahwa yezmer a k-​d-​yefk ‘tazmert tameqrant.’ (2 Ikurintiyen 4:7) Atan d acu i d-​yenna Bulus mbeεd mi geṣber i xilla n teswiεin n ujeṛṛeb: “Zemreɣ i kullec s win i y-​isseǧhaden.”—Ifilibiyen 4:13.

 KSEB ṢṢIFAT IΣEǦBEN I ṚEBBI

20. Anti ṣṣifat i gεeǧben i Ṛebbi i k-​ilaq aţ-​ţkesbeḍ, yerna ayɣer i sεant azal?

20 Bac a neεǧeb i Yahwa, ur d-​yewwi ara kan a nexḍu i wayen i gekṛeh. Ilaq daɣen a nḥemmel ayen i gḥemmel. (Iṛumaniyen 12:9) Bla ccekk, aţ-​ţebɣuḍ aţ-​ţqerrbeḍ ɣer walbeεḍ i geţxemmimen am kečč, i gḥemmlen ayen i tḥemmleḍ yerna i geţţaken lqima i wayen iwumi teţţakeḍ lqima, neɣ ala? Uma d Yahwa akken. Nadi ihi aţ-​ţḥemmleḍ leḥwayeǧ yesεan lqima ar ɣur-​es. Kra seg-​sent neţţaf-​itent  deg Uhellil wis 15, i d-​issefhamen menhu i geḥseb d iḥbiben-​is. (Γer-​ed Ahellil 15:1-5.) Iḥbiben n Yahwa ţbegginen-​d ayen umi i gsemma Wedlis Iqedsen ‘lfakya n ṛṛuḥ.’ Lfakya-​yagi, d “leḥmala, d lfeṛḥ, d lehna, d ṣṣber, d lehhu, d leḥnana, d liman, d annuz, d rrẓana.”—Igalatiyen 5:22, 23.

21. Acu ara k-​iεiwnen akken aţ-​ţkesbeḍ ṣṣifat i gεeǧben i Ṛebbi?

21 Aţ-​ţkesbeḍ ṣṣifat-​agi ma yella tezgiḍ teqqareḍ yerna tessenqadeḍ Adlis Iqedsen. M’ara tlemmdeḍ ayen i geţṛaǧu Ṛebbi seg-​k, aţ-​ţesεuḍ ixemmimen iεedlen d ixemmimen-​is. (Icεaya 30:20, 21) Simmal teţḥibbiḍ Yahwa, simmal tbeqquḍ aţ-​ţesεuḍ tamεict ara s-​iεeǧben.

22. Acu ara tafeḍ ma teţεiciḍ tamεict i gεeǧben i Ṛebbi?

22 Bac aţ-​ţesεuḍ tamεict i gεeǧben i Yahwa, laqen lmeǧhudat. Adlis Iqedsen imettel win ara ibeddlen tikli ɣer win ara yekksen ṭṭbiεa-​s taqdimt w’ad yels ṭṭbiεa tajdiṭ. (Ikulusiyen 3:9, 10) Meεna, bab n Uhellil yenna-​d ɣef lumuṛ n Yahwa: “Win i ten-​iḥerzen, istenfiε aṭas seg-​sen.” (Ahellil 19:12) Ula d kečč aţ-​ţestenfεeḍ aṭas ma teţεiciḍ tamεict i gεeǧben i Ṛebbi. Akka, a d-​tbeggneḍ belli ayen i d-​yenna Cciṭan d lekdeb yerna aţ-​ţessefṛḥeḍ ul n Yahwa.

^ § 16 Ur ilaq ara a s-​nini belli wid akk ara k-​ixaṣmen d Cciṭan i ten-​issexdamen. Acu kan, d neţţa i d ṛebbi n ddunit-​a yerna ddunit kamel tella ddaw n ufus-​is. (2 Ikurintiyen 4:4; 1 Yuḥenna 5:19) Ihi, iban belli lɣaci ur beqqun ara aţ-​ţesεuḍ tamεict ara iεeǧben i Ṛebbi, yerna kra seg-​sen a k-​ţxaṣamen.