• Acu i glaq ad yexdem wergaz bac ad yili d amezwaǧ n lεali?

  • Amek ara tennecṛaḥ tmeṭṭut izewǧen?

  • Amek ara nili d ababat neɣ ţ-​ţayemmaţ yelhan?

  • Amek ara d-​tawi dderya sseεd i twacult?

1. Acu ara d-​yessisen sseεd di twacult?

YAHWA ṚEBBI yebɣa aţ-​ţili twacult-​ik ţ-​ţaseεdit. Awal-​is, Adlis Iqedsen, deg-​s ţewṣayat yeεnan yal aεeggal di twacult. Yesskanay-​ed ccɣel i gefka Ṛebbi i mkul yiwen. M’ara xeddmen iεeggalen n twacult ccɣel i sen-​iţţunefken, akken i ten-​iweṣṣa Ṛebbi, yeţnecṛaḥ wul-​nsen. Σisa yenna-​d: “A sseεd n wid isellen i wawal n Yillu yerna ḥerrzen-​t!”—Luqa 11:28.

2. S wacu i glaq a nesteεṛef akken aţ-​ţili twacult-​nneɣ ţ-​ţaseεdit?

2 Iwakken aţ-​ţili twacult ţ-​ţaseεdit, ilaq-​aɣ uqbel kulci a nesteεṛef belli Yahwa, iwumi i gsemma Σisa “Baba-​tneɣ”, d neţţa i d-​yeǧǧan tawacult. (Matta 6:9) Imi d neţţa i d-​yefkan tiwaculin meṛṛa yellan di ddunit, bla ccekk, Baba-​tneɣ n igenwan yeẓra d acu ara sent-​d-​yawin sseεd. (Ifasusiyen 3:14, 15) Ihi, εlaḥsab n Wedlis Iqedsen, acu i d ccɣel i geţţunefken i mkul aεeggal n twacult?

D ṚEBBI I D-​YEFKAN TAWACULT

3. Acu i d-​yeḥka Wedlis Iqedsen ɣef twacult tamezwarut? Amek i nezmer a netḥeqqeq belli ayen i d-​yeqqar d ṣṣeḥ?

3 Yahwa ixleq-​ed argaz ţ-​ţmeṭṭut imezwura, Adam d Ḥewwa, mbeεd izewweǧ-​iten. Yessers-​iten deg yiwen n  wemḍiq itεeddan yellan d lǧennet yeţţusemman leǧnan n Σidin, yerna iḍleb-​asen a d-​sεun dderya. Yahwa yenna-​yasen: “Arwet, ffuktit, ččaṛet lqaεa.” (Laṣel n ddunit 1:26-28; 2:18, 21-24) Tagi mačči ţ-​ţamacahuţ; Σisa s yiman-​is issken-​ed belli ţ-​ţideţ wayen i d-​yeqqar Laṣel n ddunit ɣef twacult tamezwarut. (Matta 19:4, 5) Tura, a nẓer ayɣer i nezmer a nili d iseεdiyen di twacult, ɣas akken neţmagar-​ed xilla n cceddat yerna ɣas tudert n wass-​a temxallaf ɣef wayen yenwa Ṛebbi di tazwara.

4. a) Amek i gezmer yal aεeggal a d-​yawi sseεd i twacult-​is? b) Bac a nesεu sseεd di twacult, ayɣer i geṣleḥ a nnadi a nissin tudert n Σisa?

4 Yal aεeggal yezmer a d-​yawi sseεd i twacult, ma yella iεuned Ṛebbi deg wamek i d-​isbeggin leḥmala-​s. (Ifasusiyen 5:1, 2) Meεna, amek i nezmer a nεaned Ṛebbi, nekni ur t-​neţwali ara? Nezmer a nissin lefεayel n Yahwa axaṭer iceggeε-​ed Mmi-​s amenzu ɣer lqaεa. (Yuḥenna 1:14, 18) Asmi yella Σisa Lmasiḥ ɣef lqaεa, iεuned Baba-​s n igenwan. Seg wakken i t-​iεuned akken ilaq, win i s-​iḥessen neɣ i t-​iẓran, amzun iḥess-​as i Yahwa neɣ yella yid-​es. (Yuḥenna 14:9) Ihi, ma neẓra amek i tga (temmug) leḥmala i d-​ibeggen Σisa yerna netbeε lemtel-​is, mkul yiwen seg-​neɣ yezmer a d-​yawi sseεd i twacult-​is.

D LEMTEL I YERGAZEN IZEWǦEN

5, 6. a) Ayɣer ssira i d-​ibeggen Σisa i inelmaden-​is d lemtel i yergazen izewǧen? b) Acu i glaq a t-​ixdem walbeεḍ akken ad ţwasemmḥen ddnubat-​is?

5 Adlis Iqedsen yeqqar-​ed belli irgazen ilaq ad leḥḥun i tulawin-​nsen akken i sen-​ileḥḥu Σisa i inelmaden-​is. Neţţaf deg Wedlis Iqedsen lewṣaya-​yagi: “Ay irgazen, mkul yiwen ad iḥemmel tameṭṭut-​is, akken i gḥemmel Lmasiḥ tamezdayt, yerna yefka iman-​is fell-​as [...]. Akka i glaq ad iḥemmel wergaz tameṭṭut-​is am lǧeţţa-​s. Win iḥemmlen tameṭṭut-​is iḥemmel iman-​is. Muḥal ikṛeh yiwen lǧeţţa-​s, lameεna iţεeggic-​iţ, iţḥadar-​iţ, akken i t-​ixeddem Lmasiḥ i tmezdayt.”—Ifasusiyen 5:23, 25-29.

 6 S leḥmala i gḥemmel Σisa tajmaεt-​is (tamezdayt-​is), ideg i llan inelmaden-​is, yeţban-​ed d lemtel ikemlen i yergazen izewǧen. Σisa ‘iḥemmel inelmaden-​is yiwet leḥmala ur nesεi tilas’; isebbel tudert-​is ɣef ddemma-​nsen, ɣas ur kmilen ara. (Yuḥenna 13:1; 15:13) D ayagi daɣen i geţţucerḍen i imezwaǧen; ilaq i “mkul yiwen ad iḥemmel tameṭṭut-​is, ur iţţiqsiḥ ara yid-​es.” (Ikulusiyen 3:19) Acu ara iεiwnen argaz ad yetbeε lewṣayat-​agi, abeεda ma yella tameṭṭut-​is ur tţeddu ara tikwal s lewqam? Yessefk a d-​iţmekti belli ula d neţţa iɣelleṭ w’a d-​iţmekti ayen i glaqen a t-​yexdem bac a s-​isemmeḥ Ṛebbi. Acu i glaq a t-​ixdem? Ilzem ad isemmeḥ i wid i t-​iḍelmen, ula i tmeṭṭut-​is. Acu kan, uma d neţţat ilaq aţ-​ţeţsemmiḥ. (Γer-​ed Matta 6:12, 14, 15.) Daymi i d-​qqaren kra belli zzwaǧ aseεdi, d zzwaǧ ger wergaz ţ-​ţmeṭṭut i geţţemsamaḥen.

7. Amek i gella iţeddu Σisa i inelmaden-​is, yerna anwa lemtel i d-​yeǧǧa i yergazen izewǧen?

7 Ilaq-​asen daɣen i yergazen izewǧen a d-​rren s lexbaṛ belli Σisa yella dima yeţţak ccan i inelmaden-​is. Iţeddu-​yasen εlaḥsab n tezmert-​nsen yerna yeţḥebbiṛ ɣef lmeḥwiǧat-​nsen. Di lemtel, yiwen wass llan εyan, dɣa yenna-​yasen: “Eyyaw an-​nṛuḥ s albaεḍ n imukan iḍerfen, aţ-​ţesteεfum.” (Marqus 6:30-32) Ula ţ-​ţilawin stahlent ad bedden ɣur-​sent yergazen-​nsent w’a sent-​fken lεezz. Adlis Iqedsen imettel-​itent ɣer “lḥila tameεlalt” yerna yefka i yergazen lameṛ-​agi: “Qadret-​ţent.” Acimi? Axaṭer, am yergazen, ula ţ-​ţilawin a tent-​id-​tṣaḥ “nneεma n tudert.” (1 Buṭrus 3:7) D nnṣaḥa i geţţarran albeεḍ εziz ɣur Ṛebbi, mačči imi i gella d argaz neɣ ţ-​ţameṭṭut. Ur ilaq ara ad ţţun annect-​a yergazen izewǧen.—Ahellil 101:6.

8. a) Acuɣer i nezmer a d-​nini belli argaz “iḥemmlen tameṭṭut-​is iḥemmel iman-​is”? b) Argaz ţ-​ţmeṭṭut-​is ad ilin “d yiwet n lǧeţţa.” Acu i d lmeεna n imeslayen-​agi?

8 Adlis Iqedsen yeqqar-​ed belli argaz “iḥemmlen tameṭṭut-​is iḥemmel iman-​is.” Ţ-​ţideţ, am wakken i t-​id-​yenna  Σisa, argaz ţ-​ţmeṭṭut-​is “ur llin ara d sin, lameεna d yiwet n lǧeţţa.” (Matta 19:6) Deg wayen yeεnan lεalaqat i xeddmen deg wusu, ilaq mkul yiwen a d-​yelhi d wayeḍ, yerna wway gar-​asen kan. (Lemtul 5:15-21; Iεebṛaniyen 13:4) Ad ssiwḍen ɣer wayagi ma yella mkul yiwen yeţḥebbiṛ ɣef wayen i geḥwaǧ wayeḍnin. (1 Ikurintiyen 7:3-5) Imeslayen-​agi ara d-​itebεen sεan lmeεna tameqrant: “Muḥal ikṛeh yiwen lǧeţţa-​s, lameεna iţεeggic-​iţ, iţḥadar-​iţ.” Ilzem i yergazen ad ḥemmlen tulawin-​nsen akken i ḥemmlen iman-​nsen, yerna ur teţţun ara belli a ten-​iḥaseb win yellan d aqerru fell-​asen, Σisa Lmasiḥ.—Ifasusiyen 5:29; 1 Ikurintiyen 11:3.

9. Anta ṣṣifa i gesεa Σisa i d-​iţwabedren deg Ifilibiyen 1:8? Iwacu i glaq i yergazen a d-​beggnen ṣṣifa-​yagi i tlawin-​nsen?

9 Amceggeε Bulus ihdeṛ-​ed ɣef “leḥnana n Σisa Lmasiḥ.” (Ifilibiyen 1:8, Awal n tudert) Leḥnana n Σisa tella d ṣṣifa yesseǧhaden; tḥuza ulawen n tlawin i guɣalen ţ-​ţinelmadin-​is. (Yuḥenna 20:1, 11-13, 16) Tilawin ḥwaǧent ayendin leḥnana n yergazen-​nsent.

D LEMTEL I TLAWIN IZEWǦEN

10. Deg wacu i gella Σisa d lemtel i tulawin?

10 Bac aţ-​ţeddu twacult akken iwulem, ilaq-​as i wergaz ad yili d aqerru fell-​as. Ula d Σisa yesεa win yellan d Aqerru fell-​as, iwumi i d-​iţbeyyin ṭṭaεa. “Aqerru n Lmasiḥ, d Illu,” akken daɣen “aqerru n tmeṭṭut, d argaz.” (1 Ikurintiyen 11:3) Σisa yella-​yaɣ d lemtel ifazen deg wayen yeεnan ṭṭaεa i Ṛebbi, axaṭer akken ma nella nesεa win yellan d aqerru fell-​aneɣ, i ɣ-​ilaq a nḍuε.

11. Amek i glaq a s-​telḥu tmeṭṭut i wergaz-​is, yerna acu i gezmer a d-​yawi waya?

11 Imi irgazen d imednuben yerna ɣellṭen, ur zmiren ara ad ilin d iqerra ikemlen di twaculin-​nsen. Acu ara texdem ihi tmeṭṭut? Ur tesεi ara lḥeqq aţ-​ţekkat di lefεayel n wergaz-​is neɣ aţ-​ţebɣu aţ-​ţili d aqerru deg wemkan-​is. Ţţif  xiṛ a d-​temmekti belli ṛṛuḥ aḥnin imhenni d ayen yesεan lqima tameqrant zdat n Ṛebbi. (1 Buṭrus 3:4) Ma tesεa ṭṭbiεa am tagi, a s-​yishil mliḥ lḥal a d-​tesbeggen ṭṭaεa i gebɣa Ṛebbi, ula di liḥalat iweεṛen. Adlis Iqedsen yeqqar-​ed: “Tameṭṭut aţ-​ţqader argaz-​is.” (Ifasusiyen 5:33) Meεna, acu ara texdem ma yella ur yeqbil ara wergaz-​is ad yili Lmasiḥ d Aqerru fell-​as neţţa? Adlis Iqedsen ifka-​d lewṣaya-​yagi i tlawin: “Mkul yiwet aţ-​ţḍuε argaz-​is, iwakken, ɣas ma kra ugwin ad amnen s wawal n Yillu, s tikli-​nsent, tilawin a ten-​id-​rebḥent mebla lhedṛa, m’ara walin tikli-​nkwent teṣfa yerna tesεa leqder.”—1 Buṭrus 3:1, 2.

12. Ayɣer mačči d ayen n diri ma tefka-​d tmeṭṭut ṛṛay-​is s leqder?

12 Ama yeţţamen wergaz-​is ama ur yeţţamen ara, tameṭṭut ur s-​tţekkes ara leqder ma yella tefka-​d, s wawal aẓidan, ṛṛay ixulfen ṛṛay-​is. Tezmer aţ-​ţesεu lḥeqq, yerna tawacult-​is meṛṛa aţ-​ţaf lfayda ma yella iḥess-​as wergaz-​is. Yiwen wass, Ṣara tefka-​d lḥel (tifrat) iwulmen ɣef yiwen wugur yeεnan tawacult-​is; Abṛaham ur yeqbil ara ṛṛay-​ines, meεna Ṛebbi yenna-​yas: “Aɣ awal i Ṣara.” (Γer-​ed Laṣel n ddunit 21:9-12.) Acu kan, asm’ara yeṭṭef wergaz leqrar ur nxulef ara lqanun n Ṛebbi, tameṭṭut-​is a d-​tbeyyen ṭṭaεa ma yella tetbeε leqrar-​agi.—Lecɣal 5:29; Ifasusiyen 5:24.

Acu n lemtel n lεali i d-​teǧǧa Ṣara i tulawin izewǧen?

13. a) Γer wacu i geţweṣṣi Titus 2:4, 5 tulawin izewǧen? b) Acu i d-​yeqqar Wedlis Iqedsen ɣef lefraq d berru?

13 Ma yella txeddem tmeṭṭut ccɣel i s-​iţţunefken sɣur Ṛebbi, tezmer a d-​tawi aṭas n lfayda i twacult-​is. Γef lemtel, Adlis Iqedsen iqqar-​ed i tulawin izewǧen belli ilaq-​asent “ad ḥemmlent irgazen-​nsent d warraw-​nsent, ad ilint ţ-​ţiεeqliyin, ad ddunt s ṣṣfa, ad lhint d lecɣal n wexxam, ad lhunt, ad ţţaɣent awal i yergazen-​nsent.” (Titus 2:4, 5, Awal n tudert, 2001) Tameṭṭut izewǧen neɣ tayemmaţ ara ixedmen akka a d-​terbeḥ sɣur twacult-​is leḥmala akk-​d leqder ara idumen. (Γer-​ed Lemtul 31:10, 28.) Acu kan, imi zzwaǧ ţ-​ţadukli ger wergaz ţ-​ţmeṭṭut ur nelli ara kemlen,  kra n liḥalat iṣeεben nezzeh zemrent a ten-​ssiwḍent ɣer lefraq neɣ ɣer berru. Adlis Iqedsen iεemmed ad yili lefraq di kra n liḥalat. Lameεna, ur ilaq ara i imezwaǧen ad mfaraqen am wakken ayagi d lḥel isehlen, axaṭer Awal n Ṛebbi yeţweṣṣi: “Ayen yesdukel Yillu, amdan ur t-​iferreq ara!” (Marqus 10:9) Ma d ayen yeεnan berru, Adlis Iqedsen yefka-​d yiwet n ssebba kan: ma yella yiwen ger sin imezwaǧen-​nni yexdem zzna.—Matta 19:9.

D LEMTEL IKEMLEN I IMAWLAN

14. Amek i gella Σisa ileḥḥu-​yasen i warrac imecṭaḥ? Acu i ḥwaǧen warrac imecṭaḥ sɣur imawlan-​nsen?

14 Σisa yeǧǧa-​d lemtel ikemlen i lwaldin deg wamek i sen-​ileḥḥu i warrac imecṭaḥ. Yiwen wass, bɣan kra ad qeḍεen i warrac imeẓyanen ad qerrben ɣur-​es; neţţa yenna-​yasen: “Anfet i warrac imecṭaḥ a d-​ṛuḥen ɣur-​i! Ur sen-​qeṭṭεet ara.” Adlis Iqedsen iḥekku-​d belli umbeεd “irfed-​iten ɣef yiɣil-​is, isers ifassen-​is fell-​asen dɣa iburek-​iten.” (Marqus 10:13-16) Imi gefka Σisa si lweqt-​is i imecṭaḥ, ur ilaq ara aţ-​ţxeddmem akka ula d kenwi i warraw-​nwen? Ḥwaǧen xilla si lweqt-​nwen mačči ayen i wen-​d-​yegran kan. Ilaq aţ-​ţεezlem lweqt  akken a ten-​tesselmdem, axaṭer d ayenni i d-​icreḍ Yahwa i imawlan.—Γer-​ed Asmekti 6:4-9.

15. Acu i zemren a t-​xedmen imawlan akken ad ḥarben ɣef warraw-​nsen?

15 Imi simmal yeţzid ccum di ddunit, imeẓyanen ḥwaǧen ad ḥarben fell-​asen imawlan-​nsen akken a ten-​id-​menεen seg wid i gebɣan a sen-​xedmen cceṛ, am wid ixeddmen lεaṛ i imecṭaḥ. Σisa iḥureb ɣef inelmaden-​is, iwumi yeqqar s leḥnana “arraw-​iw imecṭaḥ.” Asmi i d-​iḥdeṛ ad yeţwaṭṭef yerna iqreb-​ed lweqt ideg ara t-​nɣen, yexdem ayen akk ilaqen akken ad ǧǧen inelmaden-​is ad ṛuḥen. (Yuḥenna 13:33; 18:7-9) Ma tesεam dderya, ilzem-​awen a ten-​tḥadrem si Iblis i geţţeεraḍen a sen-​ixdem ṭṭerr.  Ilaq-​awen a ten-​tweṣṣim ɣef wayagi. * (1 Buṭrus 5:8) Ass-​a, imecṭaḥ zemren a tent-​aɣen akteṛ akk ɣef zik deg wayen yeεnan leḥwayeǧ n ṛṛuḥ, lǧeţţa-​nsen, neɣ lbal-​nsen.

Acu i zemren ad lemden imawlan seg wamek i gleḥḥu Σisa i warrac imecṭaḥ?

16. Acu i zemren ad lemden imawlan seg wayen yexdem Σisa zdat n lexṣaṣ n inelmaden-​is?

16 Iḍ aneggaru uqbel lmut n Σisa, inelmaden-​is mjadalen (mceččawen) bac ad ẓren menhu i d ameqran gar-​asen. Σisa ur yezεif ara fell-​asen, meεna iεawed iweṣṣa-​ten s leḥmala ama s lehduṛ-​is ama s lemtel-​is. (Luqa 22:24-27; Yuḥenna 13:3-8) Ma yella tesεam dderya, tfehmem amek i tzemrem aţ-​ţḍefrem lemtel n Σisa m’ara ten-​tneddṛem? Ţ-​ţideţ, ḥwaǧen a ten-​tṛebbim, meεna ṛebbit-​ţen “s lḥeqq”, mačči m’ara tilim terfam. Ur sen-​heddṛet ara mebla ameyyez, “am ujenwi” iţjerriḥen. (Irmiya 30:11; Lemtul 12:18) Ilaq aţ-​ţefkem i dderya-​nwen ţṛebga ara sen-​d-​ibanen mbeεd belli stahlen-​ţ.—Ifasusiyen 6:4; Iεebṛaniyen 12:9-11.

D LEMTEL I DDERYA

17. Deg wacu i d-​yeǧǧa Σisa lemtel ikemlen i dderya?

17 Zemren ad sfaydin imecṭaḥ si lemtel n Σisa? Anεam ih! Σisa issken-​ed, s lemtel-​is, amek i glaq ad aɣen awal i lwaldin-​nsen. Yenna-​d: “Qqareɣ-​d ayen i y-​isselmed Baba [...], xeddmeɣ dayem ayen i s-​iţţeεǧaben.” (Yuḥenna 8:28, 29) Σisa yella yeţţaɣ awal i Baba-​s n igenwan. Adlis Iqedsen iţweṣṣi dderya ad ţţaɣen awal i lwaldin-​nsen. (Γer-​ed Ifasusiyen 6:1-3.) Σisa yella yekmel, meεna asmi meẓẓi yeţţaɣ awal i imawlan-​is, iţţusemman Yusef d Meryem, ɣas akken nutni ur kmilen ara. Bla ccekk, annect-​a yewwi-​d sseεd i iεeggalen meṛṛa n twacult-​is!—Luqa 2:4, 5, 51, 52.

18. Iwacu i gella Σisa d win yeţţaɣen dima awal i Baba-​s n igenwan? Anwa i gfeṛṛḥen m’ara ţţaɣen awal dderya i lwaldin-​nsen?

18 Zemren a d-​afen warrac imecṭaḥ amek ara εanden akteṛ Σisa d wamek ara ssefṛḥen imawlan-​nsen? Iwεeṛ-​asen  tikwal ad aɣen awal i lwaldin-​nsen, meεna Ṛebbi yebɣa ad xedmen ayagi. (Lemtul 1:8; 6:20) Σisa yella d win yeţţaɣen dima awal i Baba-​s n igenwan, ula di cceddat. Yiwen wass ideg ilaq ad yexdem yiwet lḥaǧa i s-​iweεṛen, i gellan d lebɣi n Ṛebbi, yenna: “Ssebεed akkin fell-​i taqbuct agi [ccerṭ-​agi].” Lameεna, yexdem ayen i d-​yeḍleb Ṛebbi axaṭer yesteεṛef belli Baba-​s yeεlem d acu yelhan. (Luqa 22:42) Ma ţnadin dderya ad aɣen awal, ad ssefṛḥen mliḥ imawlan-​nsen d Baba-​tsen n igenwan. *Lemtul 23:22-25.

Γer wacu i glaq ad xemmen imeẓyanen m’ara ţţujeṛṛben?

19. a) Amek i geţjeṛṛib Cciṭan dderya? b) Acu i tezmer a d-​tawi i imawlan yir tikli n dderya-​nsen?

19 Iblis ijeṛṛeb Σisa. Nezmer a netḥeqqeq belli yeqsed daɣen ad idemmer imeẓyanen ad xedmen ayen n diri. (Matta 4:1-10) Yessexdam lḥerṣ i d-​itekken seg wid i sen-​d-​yezzin, yerna iwεeṛ-​asen tikwal ad ɣelben ayagi. Ur ilaq ara ihi i imeẓyanen ad ţεacaṛen wid ixeddmen cceṛ. (1 Ikurintiyen 15:33) Dina, yelli-​s n Yeεqub, tella teţεacaṛ wid ur neţţeεbad ara Yahwa. Aya yewwi-​yas-​d xilla n lehmum. (Laṣel n ddunit 34:1, 2) Meyyez acḥal ara yeqreḥ lḥal tawacult lukan ad yexdem lεaṛ yiwen seg iεeggalen-​is!—Lemtul 17:21, 25.

 TAWWURT YESSUFUΓEN ΓER SSEΣD N TWACULT

20. Acu i glaq a t-​ixdem kul aεeggal akken ad yili sseεd di twacult-​is?

20 Tezmer twacult aţ-​ţeɣleb s sshala cceddat i d-​teţmagar ma yella tessexdam lewṣayat n Wedlis Iqedsen. Di tin n ṣṣeḥ, aṭebbeq n lewṣayat-​agi ţ-​ţawwurt yessufuɣen ɣer sseεd n twacult. Ihi, ay irgazen, ḥemmlet tulawin-​nwen yerna leḥḥut-​asent akken ileḥḥu Σisa i tejmaεt-​is. A tulawin, ḍuεemt irgazen-​nkent, tebεemt lemtel n tmeṭṭut taεerḍit (iqefzen) iɣef i d-​yehdeṛ Lemtul 31:10-31. Ay imawlan, ṛebbit arraw-​nwen. (Lemtul 22:6) Ay ibabaten, ‘sselḥayet ixxamen-​nwen akken ilaq.’ (1 Timutawus 3:4, 5; 5:8) Kenwi, a dderya, ţţaɣet awal i imawlan-​nwen. (Ikulusiyen 3:20) Di twacult, ulac win ikemlen; ɣellṭen akken ma llan. Ihi sεut annuz: ṭṭalabet ssmaḥ wway gar-​awen.

21. Anta tudert i geţṛaǧun imdanen? Amek i gezmer, si tura, ad yili sseεd di twacult-​nneɣ?

21 S tideţ, Adlis Iqedsen deg-​s xilla n lewṣayat iṣelḥen mliḥ i twacult. Iheddeṛ-​ed daɣen ɣef ddunit tajdiṭ n Ṛebbi akk-​d lǧennet ɣef lqaεa. Lǧennet-​agi aţ-​ţeεmeṛ d imdanen ara iεebden Yahwa. (Aweḥḥi 21:3, 4) Acḥal ara telhu tudert-​agi yeţṛaǧun lεibad! Yezmer ad yili si tura sseεd di twacult-​nneɣ ma yella neṭṭebbiq lewṣayat n Ṛebbi i gellan deg Wawal-​is.

^ § 15 Neţţaf lewṣayat akken a nḥareb ɣef imecṭaḥ deg yixef wis 32 n tektabt Écoute le grand Enseignant, i d-​ssufɣen Inagan n Yahwa.

^ § 18 Tella yiwet liḥala kan ideg i zemren imecṭaḥ ad εaṣin imawlan-​nsen: ma yella yemma-​tsen neɣ baba-​tsen iḍleb-​asen ad εaṣin lqanun n Ṛebbi.—Lecɣal 5:29.