DL LLUΓAT n zik swayes yeţwakteb Wedlis Iqedsen, ssexdmen ameslay ciyul s tεibṛanit akk-​d umeslay hadis s tyunanit, akteṛ n 70 n tikkal. Imeslayen-​agi sεan yiwet n lmeεna; cudden i sin ɣer lmut. Di kra n ṭrejmat n Wedlis Iqedsen ţwaṭerjmen-​d “aẓekka”, “axenduq”, “tasraft”. Deg Wedlis Iqedsen s teqbaylit sṭerjmen-​ten “laxeṛt”. Acu kan, amur ameqran n lluɣat ur sεint ara ameslay ara d-​yefken swaswa lmeεna-​nsen. Daymi i neţţaf di Ṭrejma n ddunit tajdiṭ (s tṛumit) imeslayen “ciyul” akk-​d “hadis”. Acu i d lmeεna-​nsen ihi? A nẓer amek i ten-​ssexdmen deg waṭas n yefyar n Wedlis Iqedsen.

Amusnaw 9:10 yenna-​d: “Ulac la ccɣwel, la leḥsab, la tamusni, la lekyasa, di laxeṛt [ciyul] iɣer tţedduḍ.” Eεni a d-​nefhem seg wannect-​a belli “ciyul” d albeεḍ n iẓekwan ideg yeţwanṭel win i nḥemmel? Xaṭi. M’ara d-​yehdeṛ Wedlis Iqedsen ɣef yiwen uẓekka, yessexdam imeslayen nniḍen n tεibṛanit akk-​d tyunanit, ur yessexdam ara “ciyul” akk-​d “hadis”. (Laṣel n ddunit 23:7-9; Matta 28:1) Ur yessexdam ara daɣen ameslay “ciyul” bac a d-​yebder yiwen wemḍiq anda i ţwaneṭlen kra n lεibad lwaḥid, am uẓekka ideg i srusuyen iεeggalen n twacult.—Laṣel n ddunit 49:30, 31.

Acu n wemḍiq ihi i d-​yeεna “ciyul”? Γef wayen yeεnan ameslay “ciyul” neɣ “hadis”, Awal n Ṛebbi yessefham-​ed belli mačči ţ-​ţasraft kan ideg i ţwanṭalen kra n lεibad, meεna d lḥaǧa meqqren akteṛ. Γef lemtel, Icεaya 5:14 issenεet-​ed belli ciyul “ildi axenfuc-​is” yerna “issebṛaṛeḥ aḥelqum-​is.” Γas akken nezmer a d-​nini yessebleε lεibad mebla leḥsab, iţban-​ed amzun mazal-​it yebɣa ad yernu. (Lemtul 30:15, 16) Aẓekka n ṣṣeḥ yezmer ad yawi kra kan n lmeggtin, ma d “laxeṛt [ciyul] akw-​d tesraft n nnger ur ṛebbun ara.” (Lemtul 27:20) Lmeεna-​s, “ciyul” ur yesεi ara tilisa; d lmuḥal ad yeččaṛ. Ihi, “ciyul”, neɣ “hadis”, mačči d amḍiq yellan s ṣṣeḥ deg walbeεḍ n imukan. D aẓekka ideg i llan wid meṛṛa yemmuten, yeεni d amḍiq i d-​iţmettilen amkan ideg yeṭṭeṣ umur ameqran n lεibad di lmut.

 Aselmed i neţţaf deg Wedlis Iqedsen ɣef ḥeggu n lmeggtin yeţεawan-​aɣ a nefhem akteṛ lmeεna n “ciyul” d “hadis”. Deg Wawal n Ṛebbi, “ciyul” d “hadis” cudden ɣer lmut iseg ara d-​ḥyun lεibad. * (Yub 14:13; Lecɣal 2:31; Aweḥḥi 20:13) Adlis Iqedsen yeţwerri-​d daɣen belli di “ciyul”, neɣ “hadis”, llan wid iqedcen yakan ɣef Yahwa akk-​d xilla n wid ur neqdic ara fell-​as. (Laṣel n ddunit 37:35; Ahellil 55:16) Yesselmad belli ɣer taggara ad yili “ḥeggu n iḥeqqiyen akw-​d imesbaṭliyen.”—Lecɣal 24:15.

^ § 1 Di tama nniḍen, yura belli wid ur d-​nḥeggu ara si lmut ur llin ara di “ciyul”, neɣ “hadis”, meεna di “ǧahennama.” (Matta 5:30; 10:28; 23:33) Am “ciyul” d “hadis”, ǧahennama mačči d amḍiq yellan s ṣṣeḥ.