Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Acu yesselmad s ṣṣeḥ Wedlis Iqedsen?

 IXEF WIS ṚEBΣA

Anwa i d Σisa Lmasiḥ?

Anwa i d Σisa Lmasiḥ?
  • Acu i d ccɣel n Σisa?

  • Ansi i d-​yusa?

  • Anti ṣṣifat i gesεa?

1, 2. a) Acimi ur nezmir ara a d-​nini belli nessen s ṣṣeḥ albeεḍ mechuṛen ma yella ţ-​ţimesliwt kan i nesla yis? b) Anti leḥwayeǧ yemxallafen i nsell ɣef Σisa?

DI DDUNIT llan xilla n yemdanen mechuṛen. Kra ţwassnen di lḥuma-​nsen, kra di temdint-​nsen, wiyaḍ di tmurt-​nsen. Llan daɣen wid i geţwassnen di ddunit meṛṛa. Acu kan, ma yella tessneḍ isem n walbeεḍ mechuṛen, aya ur d-​iţbeyyin ara belli tessneḍ s ṣṣeḥ amdan-​agi. Ayagi daɣen ur d-​iţbeyyin ara belli tessneḍ swaswa ṭṭbiεa-​ines d wayen i gεac.

2 Slan akk medden s Σisa (Yasuε) Lmasiḥ ɣas akken iεac ɣef lqaεa azal n 2 000 iseggasen aya. Meεna, aṭas ur neεlim ara akken ilaq menhu-​t. Kra qqaren-​d belli d amdan kan n lεali i gella. Wiyaḍ qqaren belli yella kan d nnbi. Wiyaḍ nniḍen ţţamnen belli Σisa d Ṛebbi yerna ilaq ad yeţwaεbed. Ţ-​ţideţ wayagi meṛṛa?

3. Acuɣer i glaq aţ-​ţissineḍ Yahwa Ṛebbi akk-​d Σisa Lmasiḥ?

3 Yeṣleḥ mliḥ aţ-​ţissineḍ tideţ ɣef Σisa. Ayɣer? Axaṭer Adlis Iqedsen yeqqar-​ed: “Ţ-​ţagi i ţ-​ţudert n dayem: a k-​issinen, kečč, weḥdek, d Illu n ṣṣeḥḥ, akw-​d win i d-​tceggεeḍ, Yasuε Lmasiḥ.” (Yuḥenna 17:3) D ṣṣeḥ, tamusni n tideţ yeεnan Yahwa Ṛebbi akk-​d Σisa Lmasiḥ tezmer a ɣ-​tessiweḍ ɣer tudert n dayem ɣef lqaεa ara yuɣalen d lǧennet. (Yuḥenna 14:6) Yerna, Σisa  d win i d-​ibeggnen akteṛ n wiyaḍ amek i glaq a nεic d wamek i glaq a sen-​nelḥu i medden. (Yuḥenna 13:34, 35) Deg yixef amezwaru n tektabt-​agi, nelmed-​ed d acu i ţ-​ţideţ ɣef Ṛebbi. Tura, a nerr ddehn-​nneɣ ɣer wayen i gesselmad s ṣṣeḥ Wedlis Iqedsen ɣef Σisa Lmasiḥ.

LMASIḤ I D-​IWΣED ṚEBBI

4. Acu i d lmeεna n umeslay “Lmasiḥ”?

4 Xilla n lweqt uqbel a d-​ilal Σisa, Adlis Iqedsen icar-​ed ɣef tisin n Lmasiḥ ara d-​iceggeε Ṛebbi. Ameslay Lmasiḥ (i d-​yekkan si tεibṛanit) lmeεna-​s “Win iţwadehnen.” Lmasiḥ-​agi i d-​iwεed Ṛebbi ad iţwadhen, yeεni a t-​yextiṛ Ṛebbi akken a s-​yefk amkan amxalef.  Deg yixfawen nniḍen, a d-​neḥfeḍ akteṛ ɣef ccɣel ameqran i gesεa Lmasiḥ di lewεud n Ṛebbi. A d-​nehdeṛ daɣen ɣef lbaṛakat i gezmer a ɣ-​d-​yawi Σisa si tura. Acu kan, uqbel a d-​ilal Σisa, aṭas ahat i gesteqsayen iman-​nsen, qqaren: ‘Anwa ara yilin d Lmasiḥ?’

5. Deg wayen yeεnan Σisa, s wacu i ţţuqennεen mliḥ inelmaden-​is?

5 Di lqern amezwaru, inelmaden n Σisa llan ţţuqennεen mliḥ belli d neţţa i d Lmasiḥ i d-​iwεed Ṛebbi. (Yuḥenna 1:41) Yiwen seg-​sen, win yeţţusemman Cimεun Buṭrus, yenna-​yas εinani: “Kečč, d Lmasiḥ.” (Matta 16:16) Meεna, amek i zemren inelmaden-​agi ad ilin tḥeqqen belli Σisa d Lmasiḥ i d-​iwεed Ṛebbi, yerna amek i nezmer a netḥeqqeq ula d nekni s wayagi?

6. Ssefhem-​ed s yiwen n lemtel amek i gεawen Yahwa lεibad unṣiḥen ad εeqlen Lmasiḥ.

6 Lanbeyya n Ṛebbi i gεacen uqbel Σisa fkan-​d xilla n ţfaṣil ɣef Lmasiḥ. Ţfaṣil-​agi ad semmḥen i lεibad akken a t-εeqlen. Nezmer a d-​nefk lemtel ɣef temsalt-​agi: Xayel-​ed lukan a k-​iceggeε ḥedd akken aţ-​ţemmagreḍ albeεḍ ur tessineḍ, ara d-​yasen di lkaṛ, di tamacint neɣ di tmesrifegt. A k-​iṣleḥ mliḥ ma yella yefka-​yak-​d kra n ţfaṣil fell-​as, neɣ ala? Kifkif daɣen, s yimi n lanbeyya n Wedlis Iqedsen, Yahwa iweṣṣef-​ed akken ilaq ayen ara yexdem Lmasiḥ d wayen ara iεic. Mi d-​ḍrant licaṛat-​agi meṛṛa, ayagi iεawen lεibad unṣiḥen akken a t-εeqlen bla ma ɣelḍen.

7. Efk-​ed snat ger licaṛat i d-​yeḍran di Σisa.

7 A d-​nefk kan sin lemtul ger xilla n licaṛat-​agi. Amezwaru: Nnbi Mixa icar-​ed belli Lmasiḥ i d-​iwεed Ṛebbi a d-​ilal di Bit-​Liḥim i gellan ţ-​ţamdint tamecṭuḥt di tmurt n Yahuda. Ayagi yenna-​t-​id akteṛ n 700 sna uqbel a d-​iḍru. (Mixa 5:1) Anda i d-​ilul Σisa? Swaswa di temdint-​agi! (Matta 2:1, 3-9) Lemtel wis sin: Licaṛa n Danyil 9:25 tessenεet-​ed aseggas swaswa ideg ara d-​iban Lmasiḥ, yeεni  aseggas n 29 mbeεd Σisa. Licaṛa-​yagi teţţunefk-​ed i Danyil d leqrun uqbel a d-​teḍru. * Licaṛat-​agi akk-​d waṭas nniḍen i d-​yeḍran, d ţţbut belli d Σisa i d Lmasiḥ i d-​iwεed Ṛebbi.

Σisa yuɣal d Lmasiḥ asmi yeţwaɣḍeṣ.

8, 9. Asmi i geţwaɣḍeṣ Σisa, acu n ţţbut i d-​ibeggnen belli d neţţa i d Lmasiḥ?

8 Ţţbut nniḍen belli d Σisa i d Lmasiḥ yeţţunefk-​ed εinani ɣer taggara n useggas n 29 mbeεd Σisa. D aseggas ideg i gṛuḥ Σisa ɣer Yuḥenna (Yeḥya) Aɣeṭṭaṣ akken ad iţwaɣḍeṣ deg wasif n Uṛdun. Yahwa yella iwεed i Yuḥenna a s-​d-​yefk limaṛa swayes ara yeεqel Lmasiḥ. Yuḥenna iwala limaṛa-​yagi mi gesseɣḍeṣ Σisa. Σlaḥsab n Wedlis Iqedsen, atan wayen yeḍran: “Akken yeţwaɣḍeṣ, Yasuε iffeɣ-​ed seg waman; igenwan ldin-​as-​d, dɣa iwala Ṛṛuḥ n Yillu iṣubb-​ed am yetbir; irs-​ed fell-​as. Imiren, tneṭq-​ed yiwet n taɣect seg igenwan, tenna-​d: ‘Wagi, d Mmi amaεzuz, yis i feṛḥeɣ.’” (Matta 3:16, 17) Mi gwala yerna yesla Yuḥenna i wayagi, yeţţuqenneε belli Σisa iceggeε-​it-​id Ṛebbi. (Yuḥenna 1:32-34) Ass-​nni, ṛṛuḥ n Ṛebbi, yeεni lqewwa i gessexdam, yers-​ed ɣef Σisa, dɣa yuɣal d Lmasiḥ, win i geţwaxtaṛen akken ad yili d Amwellah yerna d Agellid.—Icεaya 55:4.

9 Licaṛat n Wedlis Iqedsen akk-​d cchada n Yahwa Ṛebbi s timmad-​is ţbegginent-​ed belli Σisa d Lmasiḥ i d-​iwεed Ṛebbi. Meεna, Adlis Iqedsen iţţarra-​d leǧwab ɣef sin yesteqsiyen nniḍen yesεan azal, yeεnan Σisa Lmasiḥ: Ansi i d-​yusa? Anti ṣṣifat i gesεa?

ANSI I D-​YUSA ΣISA?

10. Acu yesselmad Wedlis Iqedsen ɣef tudert n Σisa uqbel a d-​yas ɣer lqaεa?

10 Adlis Iqedsen yesselmad belli Σisa yella yeţεici deg  igenni uqbel a d-​yas ɣer lqaεa. Asmi i d-​icar Mixa ɣef Lmasiḥ ara d-​ilalen di Bit-​Liḥim, inna-​d belli laṣel-​is “si leqdim n zzman.” (Mixa 5:1) Σisa s yiman-​is yenna-​d aṭas n tikkal belli iεac deg igenni uqbel a d-​ilal d amdan. (Γer-​ed Yuḥenna 3:13; 6:38, 62; 17:4, 5) Asmi yella Σisa d ṛṛuḥ yeţεicin deg igenni, yesεa lεalaqat ifazen akk-​d Yahwa.

11. Amek i d-​iţwerri Wedlis Iqedsen belli Σisa d Amemmit εzizen akteṛ ɣer Yahwa?

11 Σisa d Amemmit εzizen akteṛ ɣer Yahwa; ayagi ɣef kra n ssebbat. Yeţţusemma “amenzu n txelqit meṛṛa,” axaṭer d neţţa i d-​yexleq Ṛebbi d amezwaru. * (Ikulusiyen 1:15) Amemmit-​agi daɣen d amxalef axaṭer d “Mmi-​s awḥid” n Ṛebbi. (Yuḥenna 3:16) Lmeεna-​s d neţţa kan i d-​yexleq Ṛebbi s timmad-​is. Uyerna ḥaca Σisa i gessexdem Ṛebbi asmi i d-​yexleq leḥwayeǧ nniḍen meṛṛa. (Ikulusiyen 1:16) Σisa yeţţusemma daɣen “Awal.” (Yuḥenna 1:14) Ayagi yeţbeggin-​ed belli iheddeṛ-​ed s yisem n Ṛebbi. Bla ccekk, yella yessawaḍ lewṣayat akk-​d lexbaṛat i warraw nniḍen n Ṛebbi, ama i lmalayekkat ama i lεibad.

12. Amek i neẓra belli Amemmit amenzu mačči ţ-​ţimitelt n Ṛebbi?

12 Eεni ţ-​ţimitelt n Ṛebbi Umemmit-​agi amenzu, am wakken i t-ɣilen kra? Wagi mačči d ayen yesselmad Wedlis Iqedsen. Akken i t-​nwala di tseddaṛt iεeddan, Amemmit yeţwaxleq-​ed. Ihi, yesεa tazwara, ma d Yahwa Ṛebbi ur yesεi la tazwara la taggara. (Ahellil 90:2) Leεmeṛ yeεriḍ Mmi-​s-​agi awḥid ad yerr iman-​is ţ-​ţimitelt n Baba-​s; d ayen ur s-​d-​nεedda ara yakk di lbal-​is! Adlis Iqedsen yesselmad  bla tuffra belli Ababat yugar Mmi-​s. (Γer-​ed Yuḥenna 14:28; 1 Ikurintiyen 11:3) Ala Yahwa i ‘d Ṛebbi Anezmar.’ (Laṣel n ddunit 17:1) Γef wayagi ur yesεi ara timitelt. *

13. Acu i d-​iqsed Wedlis Iqedsen mi d-​yenna belli Amemmit “d ţţeswiṛa n Yillu ur neţwali ara”?

13 Yahwa akk-​d Mmi-​s amenzu sεeddan imelyaṛen n iseggasen jmiε, xilla n lweqt uqbel a d-​ţwaxelqen yetran n igenni akk-​d lqaεa. Ad ilin myeḥmalen aṭas! (Yuḥenna 3:35; 14:31) Mmi-​s-​agi εzizen yella swaswa am Baba-​s. Γef wayagi i d-​yeqqar Wedlis Iqedsen belli Amemmit “d ţţeswiṛa n Yillu ur neţwali ara.” (Ikulusiyen 1:15) Akken i gezmer wemdan ad icabi mliḥ ɣer baba-​s deg waṭas n leḥwayeǧ, akken daɣen i d-​ibeggen Umemmit-​agi, yeţεicin deg igenwan, ṣṣifat akk-​d ccexṣiyya n Baba-​s.

14. Amek i d-​ilul Mmi-​s awḥid n Yahwa d amdan?

14 Mmi-​s awḥid n Yahwa yeǧǧa igenni s lebɣi-​s iwakken a d-​yas ɣer lqaεa w’ad iεic am wemdan. Meεna, ahat teqqareḍ-​as: ‘Amek armi win yellan d ṛṛuḥ yezmer a d-​ilal d amdan?’ Akken a d-​yeḍru wannect-​a, Yahwa yexdem lmuεǧiza. Yewwi-​d tudert n Mmi-​s amenzu ɣer tεebbuṭ n yiwet tεezrit tayahudit iţţusemman Meryem. Mebla ma innul-​iţ wergaz, Meryem tesεa-​d aqcic ikemlen, tsemma-​yas Σisa.—Luqa 1:30-35.

ANTI ṢṢIFAT I GESΣA ΣISA?

15. Ayɣer i nezmer a d-​nini belli, s Σisa, nezmer a nissin akteṛ Yahwa?

15 Ayen i d-​yenna Σisa d wayen i gexdem asmi yella ɣef lqaεa iţεawan-​aɣ a t-​nissin akken ilaq. Nnig n waya, s Σisa nezmer a nissin akteṛ Yahwa. Ayɣer? Mmekti-​d belli Amemmit-​agi d ccbiha ikemlen n Baba-​s. Ihi, yesεa lḥeqq Σisa i gennan i yiwen seg inelmaden-​is:  “Win i y-​iwalan iwala Ababat.” (Yuḥenna 14:9) Ṛebεa tektabin i geţţusemman Linǧil (Matta, Marqus, Luqa akk-​d Yuḥenna), yellan deg Wedlis Iqedsen, sselmadent-​aɣ xilla n leḥwayeǧ ɣef tudert, ccɣel akk-​d ṣṣifat n Σisa Lmasiḥ.

16. Uqbel kulci d acu i gella yeţberriḥ Σisa, yerna ansi i d-​yekka wayen yesselmad?

16 Σisa yella yeţwassen mliḥ belli d “Ccix” (aselmad). (Yuḥenna 1:38; 13:13) Acu i gella yesselmad? Uqbel kulci, yella yeţberriḥ “Linǧil n tgelda,” yeεni “lexbaṛ n lxiṛ” n Tgelda n Ṛebbi. Tagelda-​yagi d lḥukuma n igenwan ara iḥekmen ɣef lqaεa kamel, ara d-​yawin lbaṛakat ur nfennu i lεibad yeţţaɣen awal. (Matta 4:23) Sɣur menhu i d-​yekka lexbaṛ-​agi? Σisa yenna-​d: “Aselmed-​iw mačči sɣur-​i i d-​ikka, sɣur win i y-​id-​iceggεen”, yeεni sɣur Yahwa. (Yuḥenna 7:16) Σisa yeẓra d acu i d lebɣi n Baba-​s, yeεlem belli yebɣa ad slen yemdanen i lexbaṛ n lxiṛ n Tgelda. Deg yixef wis 8, a nẓer swaswa d acu i ţ-​ţagelda n Ṛebbi d wayen ara texdem.

17. Anda i gella yesselmad Σisa, yerna acuɣer yeţεeţţib iman-​is akken ad isselmed?

17 Anda i gella yesselmad Σisa? Di yal amkan anda yufa lɣaci: di leεzayeb, di temdinin, di tuddar, di leswaq neɣ deg yexxamen. Ur yeţṛaǧu ara a d-​asen ɣur-​es medden; d neţţa i geţṛuḥun ɣur-​sen. (Marqus 6:56; Luqa 19:5, 6) Ayɣer i gella yeţεeţţib iman-​is yerna yeţţak xilla si lweqt-​is akken ad iberreḥ w’ad isselmed? Axaṭer d wagi i d lebɣi n Baba-​s. Σisa ixeddem dima lebɣi n Baba-​s. (Yuḥenna 8:28, 29) Yella daɣen yeţberriḥ ɣef ssebba nniḍen: ţɣiḍen-​t nezzeh lɣaci i d-​iţţasen a t-​ẓren. (Γer-​ed Matta 9:35, 36.) Lukan d lebɣi, d lεulama n ddin iɣef i gelzem ad sselmden tideţ ɣef Ṛebbi akk-​d lmeqsud-​is i lɣaci-​yagi meṛṛa, lameεna nutni stehzan (ferrṭen) deg-​sen. Σisa yella yeεlem acḥal i geḥwaǧ wegdud ad isel i lexbaṛ n Tgelda.

18. Acu-​tent ṣṣifat n Σisa i k-​iεeǧben?

 18 Σisa yella d argaz yeččuṛen d leḥnana. Lεibad ufan-​t yelha yerna zemren ad qerrben ɣur-​es. Ula d arrac imecṭaḥ ţţafen iman-​nsen m’ara ilin yid-​es. (Marqus 10:13-16) Σisa ur yelli ara d win ixeddmen maḥyaf (lxilaf). Yekṛeh lefsad akk-​d lbaṭel. (Matta 21:12, 13) Di zzman ideg tulawin ur ţţuqadarent ara yerna ur sεint ara lemzeyya, neţţa yeţţak-​asent lḥeṛma. (Yuḥenna 4:9, 27) Σisa yella d win yesεan s ṣṣeḥ annuz. Yiwen wass, yessared iḍarren i inelmaden-​is, ɣas akken ccɣel-​agi ţţaken-​t i iqeddacen.

Σisa yella yeţberriḥ di yal amkan anda yufa lɣaci.

19. Acu n lemtel i d-​isskanayen belli Σisa yeţxemmim i lmeḥwiǧat n wiyaḍ?

19 Σisa yella yeţxemmim i lmeḥwiǧat n wiyaḍ. Ayagi yeţban-​ed abeεda di lbeṛhanat i gxeddem m’ara yesseḥlay imuḍan s lemεawna n ṛṛuḥ n Ṛebbi. (Matta 14:14) Γef lemtel, yiwen n wemdan ihelken lbeṛs (nnejdam) yusa-​d ɣur-​es yenna-​yas: “Ma tebɣiḍ, tzemreḍ a yi-​terreḍ ṣfiɣ.”  Σisa iḥuss i lqerḥ n wergaz-​agi. Tegzem tasa-​s, dɣa yeẓẓel afus-​is imusa-​t, yerra-​yas: “Bɣiɣ, ili-​k teṣfiḍ!” Ssyin yeḥla wergaz-​nni! (Marqus 1:40-42) Xayel kan acḥal i gefṛeḥ wergaz-​agi!

D UNṢIḤ ARMI Ţ-​ŢAGGARA

20, 21. Amek i d-​iban Σisa d lemtel deg wayen yeεnan tiɣin n wawal i Ṛebbi armi ţ-​ţaggara?

20 Σisa yeǧǧa-​d lemtel igerrzen akk mi guɣ awal i Ṛebbi armi ţ-​ţaggara. Yeqqim d unṣiḥ i Baba-​s n igenwan di yal liḥala ɣas immuger-​ed kul ṣṣenf n leqher akk-​d leεtab. Iqubel akken ilaq ajeṛṛeb n Cciṭan. (Matta 4:1-11) Deg yiwen n lweqt, kra n iεeggalen si twacult-​is ur uminen ara yis; yerna qqaren-​d belli “isleb.” (Marqus 3:21) Lameεna, ur yeǧǧi ara annect-​a a t-​yeɣleb; ikemmel ixeddem ccɣel i s-​ifka Ṛebbi. Γas akken yeţwargem yerna yeţţwet, yeṭṭef iman-​is, ur inuda ara ad yexdem cceṛ i yeεdawen-​is.—1 Buṭrus 2:21-23.

 21 Σisa yeqqim d unṣiḥ armi d lmut, lmut qessiḥen yerna qerriḥen ger ifassen n yeεdawen-​is. (Γer-​ed 1 Buṭrus 2:24.) Xemmem ɣer wayen i gesεedda ass aneggaru n tudert-​is mi gella d amdan. Ḥebsen-​t, sɣamen-​as-​d inagan n lekdeb akken a d-​cehhden fell-​as s ẓẓur, ḥekmen fell-​as leqwaḍi ifesden, ḍṣan fell-​as lɣaci yerna qehren-​t yeεsekṛiwen. Mi geţwaεelleq ɣef tgejdit (wejgu), iger-​ed nnehta taneggarut, yenna: “Kullec iḍra-​d!” (Yuḥenna 19:30) Acu kan, deg wass wis tlata mbeεd lmut-​is, Baba-​s n igenwan yeḥya-​t-​id d ṛṛuḥ. (1 Buṭrus 3:18) Kra n smanat ɣer zdat, yuɣal ɣer igenni, “iqqim i dayem ɣer tama tayeffust n Yillu”, si leεḍil a s-​iţţunefk leḥkem n Tgelda.—Iεebṛaniyen 10:12, 13.

22. Acu i ɣ-​d-​yewwi Σisa imi yeqqim d unṣiḥ armi d lmut?

22 Acu i ɣ-​d-​yewwi Σisa imi yeqqim d unṣiḥ armi yemmut? Lmut-​is teldi-​yaɣ-​d abrid n tudert n dayem ɣef lqaεa ara yuɣalen d lǧennet, akken yella di lmeqsud n Yahwa si tazwara. Deg yixef ara d-​itebεen, a d-​nẓer amek ara tessiweḍ lmut n Σisa ɣer wannect-​a.

^ § 7 Akken aţ-​ţfehmeḍ licaṛat n Danyil i d-​iḍran di Σisa, ẓer timerna yeţţusemman: “Danyil icar-​ed melmi ara d-​yaweḍ Lmasiḥ.”

^ § 11 Yahwa iţţusemma Ababat axaṭer d neţţa i d Axellaq. (Icεaya 64:7) Imi i d-​ixleq Σisa, Σisa yeţţusemma Mmi-​s n Ṛebbi. Ula d wid nniḍen i d-​yeţwaxelqen ad εicen deg igenwan ţţusemman arraw n Ṛebbi. Γef ssebba-​yagi daɣen i geţţusemma Adam mmi-​s n Ṛebbi.—Yub 1:6; Luqa 3:38.

^ § 12 Akken aţ-​ţesεuḍ ţţbut nniḍen belli Amemmit amenzu mačči ţ-​ţimitelt n Ṛebbi, ẓer timerna yeţţusemman: “Tideţ ɣef Ubabat, ɣef Umemmit akk-​d Ṛṛuḥ Iqedsen.”