Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Acu yesselmad s ṣṣeḥ Wedlis Iqedsen?

 IXEF WIS SEŢŢA

Anda i llan wid yemmuten?

Anda i llan wid yemmuten?
  • Amek i tḍerru yid-​neɣ m’ara nemmet?

  • Acuɣer i neţmeţţat?

  • A nethedden ma yella nessen tideţ ɣef lmut?

1-3. Anwi isteqsiyen yeεnan lmut iɣef i ţmeyyizen medden? Acu n leǧwab i d-​ţţarrant kra n ddyanat?

WIGI d isteqsiyen iɣef i ţmeyyizen medden d luluf n lesnin aya. D isteqsiyen yesεan azal ameqran. Akken nebɣu nili neɣ anda nebɣu nezdeɣ, leǧwab ɣef yesteqsiyen-​a yeεna-​yaɣ.

2 Deg yixef iεeddan, nwala-​d belli asfel n leslak n Σisa Lmasiḥ yeldi abrid i tudert n dayem. Nelmed-​ed daɣen belli Adlis Iqedsen icar-​ed ɣef yiwen n zzman ideg “ur teţţuɣal ara a d-​tili lmut.” (Aweḥḥi 21:4) Acu kan, tura neţmeţţat irkelli. Akken i t-​id-​yenna ugellid ukyis Sliman: ‘Wid yeddren ẓran belli ad mmten.’ (Amusnaw 9:5) Γas akken neţnadi ad yiɣzif leεmeṛ-​nneɣ akteṛ, nebɣa daɣen a nefhem amek i tḍerru yid-​neɣ m’ara nemmet.

3 M’ara mmten wid i nḥemmel, neţru fell-​asen; yerna nesteqsay ahat iman-​nneɣ, neqqar-​as: ‘Amek i teḍra yid-​sen? Ţţenεeţţaben? Ţḥaraben fell-​aneɣ? Nezmer a ten-​nεiwen? A nuɣal a ten-​nẓer yiwen wass?’ Ddyanat n ddunit mačči yiwen leǧwab i d-​ţţarrant. Kra sselmadent belli ma yella nexdem lxiṛ di temεict-​nneɣ, a nṛuḥ s igenni; ma yella nexdem cceṛ, a nreɣ di tmes. Tiyaḍ qqarent belli m’ara nemmet, nettabaε lejdud-​nneɣ ɣer wemkan iɣer ţṛuḥun leṛwaḥ. Tiyaḍ daɣen sɣarayent belli lmeggtin ţṛuḥun ɣer ddaw n wakal iwakken ad ţţuḥasben, ssyin a d-εiwden talalit di lǧeţţa nniḍen.

4. Acu n uselmed yeεnan lmut i gcudden xilla n ddyanat?

 4 Leḥwayeǧ-​agi meṛṛa i sselmadent ddyanat yella d acu i tent-​icudden: εlaḥsab-​nsent yella wayen i d-​yeţɣaman yedder ɣas temmut lǧeţţa-​nneɣ. Azgen ameqran n ddyanat, ama ţ-​ţid n zik ama ţ-​ţid n tura, qqarent-​ed belli ɣas temmut lǧeţţa-​yagi, neţkemmil neţεici i lebda; neţwali, nsell yerna neţxemmim. Meεna amek i gezmer ad yili wayagi? Siwa ma yella lmux-​nneɣ ixeddem i nezmer a nsel, a nwali neɣ a nxemmem. M’ara nemmet, lmux-​nneɣ iḥebbes. Ihi, mebla lmux-​nneɣ, ur nezmir ara a d-​nemmekti, a nḥuss, a nsel, neɣ a nwali.

AMEK I TḌERRU S ṢṢEḤ YID-​NEΓ M’ARA NEMMET?

5, 6. Acu yesselmad Wedlis Iqedsen ɣef liḥala ideg i llan wid yemmuten?

5 Ayen i gḍerrun mbeεd lmut mačči d ayen yeffren ɣef Yahwa, i d-​ixelqen lmux. Yessen tideţ, yerna yessefham-​ed deg Wawal-​is, Adlis Iqedsen, anta liḥala ideg i llan wid yemmuten. Aselmed-​ines ishel maḍi: m’ara yemmet ḥedd, teţfakka fell-​as temεict. Lmut d lemxalfa n tudert. Lmeggtin ur ţwalin, ur sellen, ur ţxemmimen. Ulac d acu i d-​yeţɣimin yedder m’ara temmet lǧeţţa-​nneɣ. Ur nesεi ara taṛwiḥt ur neţmeţţat ara neɣ ṛṛuḥ ur neţmeţţat ara. *

Sani i tṛuḥ tmes n tcemmaεt-​agi?

6 Mbeεd mi d-​yenna Sliman belli wid yeddren ẓran ad mmten, yerna-​d lehduṛ-​agi: “Ma d wid yemmuten ur ẓrin acemma.” Issefhem-​ed daɣen belli wid yemmuten ur zmiren ad ḥemmlen wala ad keṛhen, yerna “ulac la ccɣwel, la leḥsab, la tamusni, la lekyasa [deg uẓekka].” (Γer-​ed Amusnaw 9:5, 6, 10.) Ula d Ahellil 146:4 yenna-​d belli ass ideg ara yemmet walbeεḍ “leεzayem-​is meṛṛa ad ɣaben.” Neţmeţţat yerna ulac d acu ara d-​iqqimen seg-​neɣ  yedder m’ara temmet lǧeţţa-​nneɣ. Tudert-​nneɣ teţţemcabi ɣer tmes n tcemmaεt. M’ara ţ-​nessexsi, ulac saniɣer i tṛuḥ. Tɣab, d aya kan.

AYEN I D-​YENNA ΣISA ΓEF LMUT

7. Γer wacu i gmettel Σisa lmut?

7 Σisa Lmasiḥ immeslay-​ed ɣef liḥala ideg i llan wid yemmuten. Ihdeṛ-​ed ɣef waya di temsalt n Ilεazar (Laεẓar), yiwen wergaz i gemmuten, i gella yessen mliḥ. Yenna i inelmaden-​is: “Aḥbib-​nneɣ Ilεazar iṭṭeṣ.” Inelmaden-​is ɣilen belli Ilεazar igen akken ad isteεfu w’ad yeḥlu si lehlak-​is. Meεna ɣelṭen. Σisa issefhem-​asen: “Ilεazar immut.” (Γer-​ed Yuḥenna 11:11-14.) Σisa imettel lmut ɣer yiḍeṣ. Ilεazar ur yelli la deg igenni la di ǧahennama n tmes. Ur iṛuḥ ara ɣer lejdud-​is neɣ ɣer lmalayekkat. Ur d-​yuɣal ara ɣer tudert di lǧeţţa nniḍen. Yella amzun yesteεfuy di lmut, am win ara iɣemqen di tnafa mebla tirga. Llan yefyar nniḍen n Wedlis Iqedsen i geţmettilen lmut ɣer yiḍeṣ. Di lemtel, yiwen wafir yenna-​d belli anelmad Stifanus “iṭṭeṣ”, yuɣ lḥal neţţa yeţwaṛjem armi yemmut. (Lecɣal 7:60) Taswiεt nniḍen, Σisa imettel daɣen lmut ɣer tguni. Asmi i d-​issker si lmut yelli-​s n Yayir (Jayṛus), yenna-​d: “Mačči d lmut i temmut, d iḍeṣ i teṭṭeṣ!”—Luqa 8:52, 53.

Yahwa ixleq-​ed imdanen iwakken ad εicen i dima ɣef lqaεa.

8. Amek i neεlem belli Ṛebbi ur sen-​yebɣi ara lmut i yemdanen?

8 Ṛebbi yebɣa-​yasen lmut i yemdanen di tazwara? Ala. Ixleq-​ed amdan bac ad iεic i lebda ɣef lqaεa. Akken i t-​nwala yakan, Ṛebbi yessers argaz amezwaru ţ-​ţmeṭṭut tamezwarut deg yiwet lǧennet itεeddan. Yefka-​yasen ṣṣeḥḥa ikemlen. D ayen yelhan kan i sen-​yebɣa. Ababat  (neɣ tayemmaţ) i geţḥibbin arraw-​is ad yebɣu ad uɣalen d imɣaren yerna ad mmten? Awwah, xaṭi! Yahwa iḥemmel arraw-​is; yebɣa ad ilin d iseεdiyen i dima ɣef lqaεa. Adlis Iqedsen yenna-​d belli Yahwa “yerra-​d deg wul n wemdan ad iţxemmim ɣef lebda.” (Amusnaw 3:11) Lmeεna-​s, mi ɣ-​d-​yexleq Ṛebbi, ixleq-​ed deg wulawen-​nneɣ lebɣi a nεic i dima. Uyerna yexdem ţţawil akken a ɣ-​yessiweḍ ɣer lebɣi-​yagi.

 AYΓER I ŢMEŢŢATEN YEMDANEN

9. Acu i gḥeṛṛem Yahwa i Adam? Iwacu ur sen-​yewεiṛ ara i Adam d Ḥewwa ad ṭebbqen lameṛ-​agi?

9 Acuɣer ihi i ţmeţţaten yemdanen? Akken a d-​naf lǧawab, ilaq a nẓer d acu yeḍran di zzman ideg yella kan yiwen wergaz d yiwet tmeṭṭut ɣef lqaεa. Atan wayen i d-​yeḥka Wedlis Iqedsen: Yahwa Ṛebbi “yessemɣi-​d si lqaεa, mkul ṣṣenf n ttjuṛ iεeǧben i tmuɣli, yelhan i wučči.” (Laṣel n ddunit 2:9) Acu kan, tella lḥaǧa i sen-​iḥeṛṛem. Yahwa yenna i Adam: “Tzemreḍ aţ-​ţeččeḍ si ttjuṛ meṛṛa n leǧnan agi; lameεna si ttejṛa n tmusni n lxiṛ akw-​d cceṛ, ur tţeţţeḍ ara, axaṭer asm’ara teččeḍ seg-​s, aţ-​ţemmteḍ.” (Laṣel n ddunit 2:16, 17) Lameṛ-​agi ur yewεiṛ ara, axaṭer ttjuṛ iseg i zemren ad ččen Adam d Ḥewwa mačči d ayen i gxuṣṣen. Lameεna yefka-​yasen tagniţ akken a d-​beggnen belli steεṛfen s Win i sen-​d-​yefkan kulci, s Win i sen-​d-​yefkan ula ţ-​ţudert n dayem. Ma yella uɣen awal, a d-​sseknen daɣen belli ţqadaren leḥkem n baba-​tsen n igenwan, yerna qeblen leḥkem-​agi-​ines yeččuṛen d leḥnana.

10, 11. a) Amek i εuṣan Ṛebbi Adam d Ḥewwa? b) Iwacu lmeεṣegga n Adam d Ḥewwa ţ-​ţamsalt meqqren?

10 Acu kan, Adam d Ḥewwa xtaṛen ad εaṣin Yahwa. Cciṭan yenna i Ḥewwa s yiwen wezrem: “Akka ihi, inna-​d Yillu: ‘Ur tţeţţem ara si ttjuṛ meṛṛa n leǧnan’...” Ḥewwa terra-​yas: “Nezmer an-​nečč si lfakya n ttjuṛ meṛṛa n leǧnan, lameεna, ɣef lfakya n ttejṛa yellan di tlemmast n leǧnan, Illu yenna-​d: ‘Ur teţţet ara seg-​s, ur ţ-​ţnalet ara, neɣ m’ulac aţ-​ţemmtem.’”—Laṣel n ddunit 3:1-3.

11 Cciṭan yenna: “Xaṭi! Ur teţmeţţatem ara! Illu yeẓra belli, asm’ara teččem seg-​s, allen-​nwen ad ldint, yerna aţ-​ţilim am Yillu, aţ-​ţissinem lxiṛ akw-​d cceṛ.” (Laṣel n ddunit 3:4, 5) Cciṭan yebɣa ad yessimen Ḥewwa belli aţ-​ţaf lfayda ma tečča si lfakya-​nni yeţţuḥeṛṛmen. Amzun yenna-​d belli tezmer aţ-​ţextiṛ s timmad-​is d acu yelhan  d acu i diri, belli tezmer aţ-​ţexdem ayen i s-​yehwan. Iger-​ed daɣen lekdeb ɣef Yahwa; iqsed-​ed belli Yahwa iskaddeb deg wayen ara sen-​d-​yessis wučči n lfakya-​nni. Ḥewwa tumen Cciṭan. Tekkes-​ed lfakya, tečča-​ţ. Umbeεd, tefka i wergaz-​is, yečča ula d neţţa. Mačči am win ur neẓri ara d acu i gxeddem. Nutni εelmen belli la xeddmen swaswa ayen akken i sen-​yenna Ṛebbi ur t-​xeddmen ara. Imi ččan si lfakya-​nni, εuṣan s ţţεemda lameṛ-​nni isehlen yerna ur neẓẓay ara. Beggnen-​d belli ḥeqren Baba-​tsen n igenwan akk-​d leḥkem-​ines. Mačči d ayen ara sen-​iţwasemmḥen imi kksen leqder ɣef Uxellaq-​nsen yeččuṛen d leḥmala!

12. Acu i gzemren a ɣ-​iεiwen a nefhem ayen i gḥuss Yahwa asmi t-εuṣan Adam d Ḥewwa?

 12 A d-​nefk lemtel: acu ara tḥusseḍ lukan yiwen wass mmi-​k (neɣ yelli-​k), i d-​tṛebbaḍ s leḥnana, a k-​iεaṣi w’a d-​ibeggen s lmeεṣegga-​yagi belli ur k-​iţqadar ara yerna ur k-​iḥemmel ara? A k-​iqreḥ mliḥ lḥal, neɣ ala? Xayel ihi acḥal i geḥzen Yahwa asmi t-εuṣan Adam d Ḥewwa di sin.

Adam yekka-​d seg uɣebbar, yuɣal s aɣebbar.

13. Γur Yahwa, amek ara teḍru d Adam m’ara yemmet, yerna acu i d lmeεna n wayagi?

13 Ulac ssebba ara yeǧǧen Yahwa ad iεemmed i Adam d Ḥewwa i t-​iεuṣan akken ad εicen i lebda. Akken i t-​id-​yenna, mmuten. Tekfa fell-​asen temεict. Ur ṛuḥen ara ɣer wemkan-​nni ideg ţţilin leṛwaḥ. Nefhem-​ed annect-​a seg wayen i genna Yahwa i Adam asmi i t-​iḥuseb ɣef lmeεṣegga-​ines. Ṛebbi yenna-​yas: “[Aţ-​ţuɣaleḍ] s akal, ansi akken i d-​teţwakkseḍ; axaṭer, kečč d aɣebbar, aţ-​ţuɣaleḍ alamma d aɣebbar.” (Laṣel n ddunit 3:19) Ṛebbi ixleq-​ed Adam seg uɣebbar n wakal. (Laṣel n ddunit 2:7) Uqbel a d-​iţwaxleq, Adam ulac-​it. Ihi, m’akken i s-​yenna Yahwa belli ad yuɣal s aɣebbar, lmeεna-​s ad yuɣal ɣer wulac. Adam ur iseεεu ara tudert, am uɣebbar iseg i d-​yeţwaxleq.

14. Ayɣer i neţmeţţat?

14 Lukan Adam d Ḥewwa uɣen awal, tili mazal ţεicin ar ass-​a. Lameεna, mmuten axaṭer denben imi xtaṛen ad εaṣin Ṛebbi. Neţmeţţat axaṭer Adam yeǧǧa-​d i tarwa-​s meṛṛa ddnub akk-​d lmut. (Γer-​ed Iṛumaniyen 5:12.) Ddnub icuba lehlak iṣeεben i d-​nweṛṛet, iseg ur yezmir ḥedd ad yemneε. Lmut, i d-​yeţţawi ddnub-​agi, d deεwessu. Lmut ţ-​ţaεdawt mačči ţ-​ţaḥbibt. (1 Ikurintiyen 15:26) Nezmer a ncekkeṛ mliḥ Yahwa imi d-​yefka lefdiya akken a ɣ-​d-​isellek si teεdawt-​agi tamcumt!

TAMUSNI N TIDEŢ ΓEF LMUT DEG-​S NNFEΣ

15. Acuɣer tamusni n tideţ ɣef lmut d ayen yeţṣebbiren?

15 Aselmed n Wedlis Iqedsen i d-​iheddṛen ɣef liḥala  ideg i llan wid yemmuten yeţṣebbir. Akken i t-​nwala, lmeggtin ur ţḥussun la s lqerḥ la s leḥzen. Ulayɣer akk a ten-​nagad, axaṭer ur zmiren ara a ɣ-​ḍurren. Ur ḥwaǧen ara a ten-​nεiwen yerna ur zmiren ara a ɣ-εiwnen. Ur nezmir a sen-​nehdeṛ, ur zmiren a ɣ-​d-​hedṛen. Xilla n lεulama n ddin i d-​iqqaren belli zemren ad εiwnen lmeggtin, lameεna ayagi d lekdeb. Wid i geţţamnen s waya ţţaken iṣurdiyen i lεulama-​yagi. Meεna, nekni, imi nessen tideţ, ur neţεemmid ara a ɣ-​kellxen wid yesselmaden lekdubat am wigi.

16. Menhu i d-​yeǧǧan lateṛ-​is deg uselmed n waṭas n ddyanat, yerna amek i gxeddem?

16 Yeεdel ddin-​inek d wayen yesselmad Wedlis Iqedsen ɣef wid yemmuten? Amur ameqran n ddyanat ur εdilent ara d uselmed-​agi. Iwacu? Axaṭer yella lateṛ n Cciṭan deg wayen i sselmadent. Cciṭan yessexdam ddin n lekdeb akken ad ɣilen lɣaci belli ɣas temmut lǧeţţa-​nneɣ, neţkemmil neţεic deg wemkan-​nni iɣer ţṛuḥun leṛwaḥ. D lekdeb i geţcuddu ɣer lekdubat nniḍen akken ad yessebεed lεibad ɣef Yahwa Ṛebbi. Amek yeεni?

17. Ayɣer aselmed n lεiqab di tmes i lebda d aselmed iţekksen ccan i Yahwa?

17 Akken i t-​id-​nwala, kra n ddyanat sselmadent belli ma yella yiwen yexdem cceṛ di ddunit-​is, asm’ara yemmet ad iṛuḥ s anda ara yenεeţţab di tmes i lebda. Aselmed-​agi iţekkes ccan i Ṛebbi. Yahwa d Ṛebbi n leḥmala; d lmuḥal ad imeḥḥen albeεḍ akkagi. (Γer-​ed 1 Yuḥenna 4:8.) Acu ara tiniḍ ɣef wergaz ara yegren afus n mmi-​s ɣer tmes bac a t-​iεaqeb axaṭer ur s-​yeţţaɣ ara awal? Aţ-​ţqadreḍ argaz am wagi? Aţ-​ţebɣuḍ a t-​tissineḍ alukan ţ-​ţamusni? Xaṭi! Ahat a k-​d-​iban d uqsiḥ almi dayen. Acu kan, Cciṭan yebɣa a nɣil belli Yahwa yeţεaqab lɣaci di tmes i lebda, yeεni d imelyaṛen iseggasen!

18. Anwa aselmed n lekdeb i geţţawin kra ad εebden lmeggtin?

 18 Cciṭan yessexdam daɣen kra n ddyanat akken ad yesselmed belli m’ara mmten lεibad, ţţuɣalen d leṛwaḥ i glaq ad qadren w’ad εuzzen wid yeddren. Σlaḥsab n uselmed-​agi, leṛwaḥ n wid yemmuten zemren ad qqlen d leḥbab yesεan tazmert neɣ d iεdawen yesserhaben. Aṭas i geţţamnen lekdeb-​agi. Ţţagaden lmeggtin, dɣa ţεuzzun-​ten yerna ţεebbiden-​ten. Ma d Adlis Iqedsen yesselmad belli wid yemmuten ṭṭṣen yerna yewwi-​d a neεbed ḥaca Ṛebbi n ṣṣeḥ Yahwa, Axellaq-​nneɣ.—Aweḥḥi 4:11.

19. M’ara nissin tideţ ɣef lmeggtin, anwa aselmed nniḍen n Wedlis Iqedsen i nfehhem akteṛ?

19 Ma yella tessneḍ tideţ ɣef lmeggtin, aţ-​ţmenεeḍ si lekdubat n ddyanat. Tamusni-​yagi a k-​tεiwen daɣen akken aţ-​ţfehmeḍ leḥwayeǧ nniḍen i gesselmad Wedlis Iqedsen. Γef lemtel, m’ara teẓreḍ belli wid yemmuten ur ţṛuḥun ara ɣer laxeṛt, aţ-​ţfehmeḍ akteṛ lweεd i d-​yefka Ṛebbi yeεnan tamεict n lebda ɣef lqaεa ara yuɣalen d lǧennet.

20. Anwa asteqsi iwumi ara d-​nerr lǧawab deg yixef ara d-​itebεen?

20 Zik-​nni, Yub yellan d aḥeqqi, imeyyez d yiman-​is, yenna: “Lemmer i d-​iḥeggu wemdan m’ara yemmet, ad ṣebreɣ.” (Yub 14:14) Win yegnen di lmut yezmer a d-​yuɣal ɣer tudert? Ayen yesselmad Wedlis Iqedsen ɣef temsalt-​agi yeţṣebbir mliḥ. D ayen ara nẓer deg yixef ara d-​itebεen.

^ § 5 Bac akken aţ-​ţfehmeḍ imeslayen-​agi “taṛwiḥt” akk-​d “ṛṛuḥ”, ẓer timerna yeţţusemman: “Acu i d lmeεna n imeslayen ‘taṛwiḥt’ akk-d ‘ṛṛuḥ’?