Atmaten ţ-​ţyessetmatin εzizen,

Di lqern wis 7 qb.Σ., yeţţunefk-​as-​d i nnbi Ḥizqiyal yiwen uweḥḥi yessewhamen. Iwala yiwen ukeṛṛus d ameqran nezzeh, akeṛṛus n igenwan, i gessenhaṛ Ugellid n igenwan d lqaεa. Ayen yessewhamen akteṛ, d ṣṣenf n tikli i gleḥḥu. Yeţţazzal am lebraq; ula m’ara ibeddel lǧiha iɣer ara yerr, ur yessenqas ara di tazzla yerna ur yeţdewwiṛ ara!​—Ḥizq. 1:4, 9, 12, 14, 16-27.

Aweḥḥi-​yagi yesmektay-​aɣ-​d belli aḥric yellan deg igenwan si tuddsa n Yahwa ur iḥebbes ara tikli. Acu ara d-​nini ɣef weḥric yellan ɣef lqaεa? Aseggas-​agi n leqdic iεeddan ibeggen-​ed belli Yahwa yesselḥa daɣen aḥric-​a s yiwet n tikli yessewhamen!

Dagi di Marikan, kra n iεeggalen n twacult n Bitil gguǧen si Bruklin ɣer lbiru amaḍlan ajdid, yellan di Waṛwik (Nuyuṛk), neɣ ɣer lbaṭimat nniḍen; wiyaḍ ṛuḥen ɣer imeḍqan yemxallafen. Xilla n iεeggalen n twaculin n Bitilat n ddunit meṛṛa i gellan ceɣlen daɣen di lebni, deg ureqqeε, deg ugaǧi ɣer imukan ijdiden d wayen nniḍen. I kenwi? Γas ur tṛuḥem ara seg wemkan ɣer wayeḍ, mebla ccekk tellam tceɣlem aṭas.

Asqamu amwellah yufa lfeṛḥ yerna yeţţunefk-​as lǧehd mi gwala belli agdud n Ṛebbi di ddunit yella yecɣel akteṛ akk n zik: yeţnadi ad yelḥu εlaḥsab n wakken i tleḥḥu tuddsa n Yahwa. Xilla i gṛuḥen ad qedcen deg imeḍqan anda i tlaq lemεawna. Wiyaḍ, fkan xilla seg yiman-​nsen di ṣṣenf nniḍen n leqdic; di lemtel, berrḥen deg wemḍiq anda i heddṛen lεibad lluɣa tabeṛṛanit. Aṭas i gjeṛṛben kra n ṣṣenf n leqdic n uberreḥ ur wulfen ara. Xilla nniḍen daɣen i gefkan akteṛ n lweqt di leqdic. Imasiḥiyen unṣiḥen meṛṛa, gar-​asen wid meqqren di leεmeṛ d wid yesεan kra n lεib, ţţazzalen s nnṣaḥa di temzizzelt n tudert: qqimen ceɣlen di leqdic ɣef Yahwa yerna beggnen-​d, s wannect-​a, belli Cciṭan d akeddab!​—1 Kur. 9:24.

Tḥeqqet belli lεeqliya-​nwen, is i d-​teţbegginem belli tebɣam aţ-​ţqedcem, yeţwali-​ţ-​id Yahwa. (Iεeb. 6:10) Lεeqliya-​yagi tesmektay-​aɣ-​d Abṛaham d Ṣara. Mi geǧǧa Abṛaham tamdint n Ikaldiyen umi qqaren Ur, yella iεedda i 70 n sna di leεmeṛ-​is. Yewwi tawacult-​is ɣer tmurt ibeεden n Kanεan anda ara yezdeɣ deg iqiḍunen di meyyat sna i s-​d-​yegran a tent-​iεic. Abṛaham ţ-​ţmeṭṭut-​is tameεzuzt beggnen-​d s ṣṣeḥ belli sεan lεeqliya n lεali imi s lebɣi-​nsen i xedmen annect-​a.​—Laṣel 11:31; Lec. 7:2, 3.

I kenwi, teţbegginem-​d lεeqliya am tagi? Wid akk seg-​wen i geqqimen d unṣiḥen di lewqat-​agi iweεṛen xeddmen ayen i ɣ-​d-​yenna  Σisa a t-​nexdem. Yenna-​d: “Ṛuḥet, rret leǧnas meṛṛa d inelmaden; sɣeḍṣet-​ţen s yisem n Ubabat, n Umemmit akw-​d Ṛṛuḥ Iqedsen.”​—Matta 28:19.

Ula d awal i gessexdem Σisa, “ṛuḥet”, yesmekta-​yaɣ-​d belli ilaq a nili necɣel, a nili nqeddec. Nfeṛṛeḥ s ṣṣeḥ m’ara nẓerr ayen akk i xedmen inelmaden n Lmasiḥ s leḥṛaṛa deg useggas-​agi! Mebla ccekk, afus anezmar n Yahwa akk-​d lbaṛaka-​ines ţbanen-​d di leqdic-​agi n uberreḥ n lexbaṛ n lxiṛ n Tgelda i leǧnas meṛṛa.​—Mar. 13:10.

Xilla iwumi yeεǧeb lexbaṛ i neţberriḥ. Aseggas-​agi, newweḍ ɣer 8 340 847 yid-​neɣ d iberraḥen yerna nesselmad yal ccheṛ Adlis Iqedsen i wazal n 10 115 264 yemdanen. Iban-​ed ihi s waya belli akeṛṛus n igenwan la ileḥḥu; kenwi daɣen! Kemmlet lxedma-​yagi-​nwen ifazen di cwiṭ-​agi n lweqt uqbel a d-​yeɣleq Yahwa tawwurt yeţţawin ɣer leslak.

Iwulem mliḥ ad yili wafir n useggas 2017 akka: ‘Ţkel ɣef Yahwa txedmeḍ lxiṛ.’ (Ahel. 37:3) M’ara teţţaɣem awal i imeslayen-​agi yerna txeddmem lxiṛ, s leqdic-​agi imqeddes i teţţakem i Yahwa, teţbegginem-​as-​d belli tţeklem fell-​as. Ur teţţut ara maḍi belli d lmuḥal aţ-​ţilim weḥḥed-​wen. Imeslayen-​agi n Σisa ad qqimen dima ṣeḥḥan: “Nekk, aql-​i yid-​wen mkul ass, alamma tefna ddunit.”​—Matta 28:20.

Tḥeqqet belli Yahwa ad ikemmel ad ibarek leqdic i txeddmem s nnṣaḥa. Ama cwiṭ i txedmem ama aṭas, Yahwa yebɣa a s-​tefkem lemxeyyeṛ yerna seg wul; d ayagi i gesεan azal ɣur-​es. Tukciwin-​agi meṛṛa ţḥazent ul-​is yerna ţţexlaqent-​ed lfeṛḥ ɣef wudem-​is, ayen i d-​iţbegginen belli iqbel-​itent. (2 Ikur. 9:6, 7) Sseǧhdet akteṛ lεalaqat-​nwen d Baba-​twen i ken-​iḥemmlen: ţẓallat dima, qqaret Awal-​is, ḥeddṛet i inejmuεen yerna ţcaraket s leḥṛaṛa deg uberreḥ.

Skud akka ur ifukk ara ‘cwiṭ n lweqt’ i s-​d-​yegran i Iblis, amcum-​agi amεaṣi yeqsed s ṣṣeḥ ad yessexdem ţţawilat meṛṛa yellan ger ifassen-​is bac a ɣ-​yessedhu iwakken ur neţkemmil ara tazzla swayes i neqsed a neṭṭef di ṣṣfawa-​nneɣ zdat n Yahwa. (Aweḥ. 12:12) Qqimet tqerbem ɣer Yahwa, swakka tiḥila meṛṛa n Iblis ad xabent. (Ahel. 16:8) Σelmet belli nḥemmel-​iken aṭas yerna neţmuddu azal i lemεawna i tefkam deg wussan-​agi ineggura i Ssid-​nneɣ akk-​d nnfeε n Tgelda-​ines.

Atmaten-​nwen,

Asqamu amwellah n Inagan n Yahwa