Ṛuḥ ɣer wayen yellan deg-s

Acuɣer i teţţagim timerna n idammen?

Acuɣer i teţţagim timerna n idammen?

Ayen i ţxemmimen waṭas n medden

Qqaren-d: Inagan n Yahwa ur ţţamnen ara s ṭṭebba yerna ur ţdawin ara iman-nsen.

Di tin n ṣṣeḥ: Neţnadi leṣnaf n udawi ifazen, ama i nekni ama i warraw-nneɣ. M’ara nesεu ugur di ṣṣeḥḥa-nneɣ, nẓerr-ed ṭṭebba yessnen mliḥ ad dawin w’ad xedmen abaṛasyun mebla ma rnan idammen. Nesteεṛef s lmeǧhudat yeţwaxedmen bac ad yennerni udawi yerna iεǧeb-aɣ wayagi. Yerna, ṣṣenf-agi n udawi mebla timerna n idammen, yeţţuheggan di tazwara i Inagan, sfaydayen seg-s aṭas n medden ass-a. Deg waṭas n tmura, yal amuḍin yezmer tura ad yeḍleb a t-dawin mebla timerna n idammen bac ad yemneε si lemḍerra i d-teţţawi. Lemḍerra-yagi tezmer aţ-ţili d lehlakat yeţţenṭaḍen s idammen, d lǧeţţa n umuḍin ur neqbil ara idammen-nni, neɣ d lɣelṭa n walbeεḍ.

Qqaren-d: Inagan n Yahwa ţţamnen belli d liman i gesseḥlayen.

Di tin n ṣṣeḥ: Ur nxeddem ara lbeṛhanat bac a nesseḥlu.

Qqaren-d: Adawi mebla timerna n idammen yesqamay-ed ɣlay mliḥ.

Di tin n ṣṣeḥ: Adawi mebla timerna n idammen yeṛxes akteṛ. *

Qqaren-d: Aṭas n Inagan, ula d imecṭaḥ, i geţmeţţaten yal aseggas imi ur qebblen ara timerna n idammen.

Di tin n ṣṣeḥ: Ayen akka i d-qqaren ur yesεi ara yakk lsas. Kra n ṭṭebba xeddmen ibaṛasyunen iweεṛen (am ubaṛasyun n wul, n yeɣsan, n uεiwed n lejwareḥ, d wayen nniḍen) mebla ma rnan idammen. * Imuḍan, ula d imecṭaḥ, iwumi ur rennun ara idammen ḥellun am nutni am wigad i gqebblen a sen-rnun idammen, tikwal ahat xiṛ-nsen. * Akken yebɣu yili lḥal, ulac win i gzemren a d-yini belli ad yemmet umuḍin ma yugi a s-rnun idammen neɣ ad yidir ma yella yeqbel-iten.

Acuɣer i ţţagin Inagan n Yahwa timerna n idammen?

Tamsalt-agi tcudd ɣer ddin, mačči ɣer udawi. Ama d Lεahd Aqdim ama d Lεahd Ajdid, ţweṣṣin-aɣ a nexḍu i idammen. (Laṣel n ddunit 9:4; At Lewwi 17:10; Asmekti 12:23; Lecɣal 15:28, 29) Yerna, ɣer Ṛebbi idammen ţmettilen-d tudert. (At Lewwi 17:14) Ihi, imi neţţaɣ awal i Ṛebbi, i d-yefkan tudert, yerna neţqadar-it, ur nteţţ idammen ur ten-neţţarra di lǧeţţa-nneɣ.

Yeţbeddil wayen i ţxemmimen medden

Kra n ibaṛasyunen iweεṛen zemren ad ţwaxedmen mebla timerna n idammen yerna ad neǧḥen.

Yiwen n lweqt akken, wid ixeddmen di ssbiṭarat llan ḥesben adawi mebla timerna n idammen yewεeṛ mliḥ, am win ara yenɣen iman-is. Meεna, deg iseggasen-agi ineggura, ṛṛay-nsen la yeţbeddil. Γef lemtel, di 2004, kra n imusnawen n udawi uran-d deg yiwet n tesɣunt: “Xilla si ţţawilat yeţwaxedmen i udawi n imuḍan yellan d Inagan n Yahwa ad uɣalen ad ţdawin yis-sen medden meṛṛa di kra n iseggasen i d-iteddun.” * Di 2010, yura deg yiwen weḥric si tesɣunt yeţţusemman Heart, Lung and Circulation: “‘Abaṛasyun mebla timerna n idammen’ ur ilaq ara a d-iṣaḥ kan i Inagan n Yahwa. Ilaq ad iţekki deg ibaṛasyunen i nxeddem i medden meṛṛa.”

Ass-agi, di ddunit, luluf n ṭṭebba ssexdamen ţţawilat ilaqen bac ur ţḍeggiεen ara idammen deg ibaṛasyunen iweεṛen iwakken ur ţţarran ara idammen. Ssexdamen ţţawilat-agi ula di tmura yeţqeddimen ɣer zdat yerna xilla seg wid ur nelli ara d Inagan i ten-id-iṭṭalaben.

^ § 8 Ẓer Transfusion and Apheresis Science, vol. 33, no 3, p. 349.

^ § 10 Ẓer The Journal of Thoracic and Cardiovascular Surgery, vol. 134, no 2, p. 287-288 ; Texas Heart Institute Journal, vol. 38, no 5, p. 563 ; Basics of Blood Management, p. 2 ; akk-d Continuing Education in Anaesthesia, Critical Care & Pain, vol. 4, no 2, p. 39.

^ § 10 Ẓer The Journal of Thoracic and Cardiovascular Surgery, vol. 89, no 6, p. 918 ; akk-d Heart, Lung and Circulation, vol. 19, p. 658.

^ § 14 Continuing Education in Anaesthesia, Critical Care & Pain, vol. 4, no 2, p. 39.