Xaṭi, mačči akka i gella lḥal. Di tin n ṣṣeḥ, m’ara d-nerr s lexbaṛ belli leḥwayeǧ is i neţţamen ur ɛdilent ara d Wedlis Iqedsen, neţbeddil-itent.

Nessenqed Adlis Iqedsen acḥal n lweqt uqbel a d-nessufeɣ Tira Iqedsen, Ṭrejma n ddunit tajdiṭ, di 1950. Nessexdem ṭrejmat yellan imiren yerna nekkes-ed ayen is i neţţamen si ṭrejmat-agi. Atentah kra n leḥwayeǧ swayes i ţţamnen Inagan n Yahwa acḥal n lesnin aya. Wali s yiman-ik ma yella ɛedlent akk-d wayen yesselmad s ṣṣeḥ Wedlis Iqedsen.

  1. Ayen swayes i neţţamen: Ṛebbi mačči d talut. Yeţwakteb di tesɣunt Le Phare de la Tour de Sion n 15 bujambeṛ 1905: “Neţţamen [...] s Yahwa d Ɛisa akk-d Ṛṛuḥ iqedsen [...] yerna ur neqbil ara (imi ur yeɛdil ara d wayen yesselmad Wedlis Iqedsen) aselmed i d-yeqqaren belli tlata n Iṛebbiten ddukklen deg yiwen, neɣ yiwen n Ṛebbi yebḍa ɣef tlata.”

    Ayen i d-yeqqar Wedlis Iqedsen: “Ameɣlal, Illu-nneɣ, d neţţa kan i d Ameɣlal.” (Asmekti 6:4) “Yiwen kan n Ṛebbi i gellan, d baba-tneɣ Ṛebbi i d-ixelqen kullec, ula d nukni d ayla-s. Anagar yiwen n Ssid i gellan: d Ɛisa Lmasiḥ, yis i d-yella kullec, yis daɣen i nedder ula d nukni.” (1 Ikurintiyen 8:6, Awal n tudert, 2001) Ɛisa s yiman-is yenna-d: “Baba yugar-iyi.”—Yuḥenna 14:28, Awal n tudert.

  2. Ayen swayes i neţţamen: Ulac ǧahennama n tmes ideg ara nenɛeţţab i lebda. Tasɣunt Le Phare de la Tour de Sion n yunyu 1882 (s teglizit) tessexdem, d asentel n yiwen seg imagraden-ines, imeslayen-agi: “Lexlaṣ n ddnub, d lmut.” Imeslayen-a ţwakksen-d seg Iṛumaniyen 6:23 n ṭrejma yeţţusemman King James Version. Atan d acu yeţwaketben deg umagrad-agi: “Imeslayen-agi tban lmeɛna-nsen yerna sehlen i lefhama. D lewhayem amek acḥal n lɛibad i d-iqqaren belli Adlis Iqedsen d Awal n Ṛebbi, nutni mazal-iten la ţqamaren imeslayen-agi isehlen i lefhama; qqaren-d daɣen belli ţţamnen, yerna ula d Adlis Iqedsen yesselmad, belli lexlaṣ n ddnub ţ-ţudert n dayem di lɛiqab.”

    Ayen i d-yeqqar Wedlis Iqedsen: “Taṛwiḥt idenben aţ-ţemmet.” (Ḥizqiyal 18:20) Lɛiqab ara yeţţunefken i wid yeţxaṣamen Ṛebbi, mačči d leɛtab i lebda, meɛna d “lɛiqab n nnger n dayem.”—2 Itisalunikiyen 1:9.

  3. Ayen swayes i neţţamen: Tagelda n Ṛebbi d yiwet n lḥukuma yellan s ṣṣeḥ, mačči d liḥala n wul. Tasɣunt Le Phare de la Tour de Sion n bujambeṛ 1881 (s teglizit) tura-d ɣef Tgelda n Ṛebbi ayagi: “Asbeddi n tgelda-yagi, meɛlum, a d-yeglu s nnger n tgeldiwin meṛṛa n lqaɛa.”

    Ayen i d-yeqqar Wedlis Iqedsen: “Di zzman n igelliden agi, Illu n igenwan a d-issker yiwet n tgelda ur nɣelli ara, i dayem; tageldit-is ur teţţuɣal ara i wegdud nniḍen. Aţ-ţemḥeq, aţ-ţessenger tigeldiwin agi meṛṛa, ma d neţţat aţ-ţdum i dayem.”—Danyil 2:44.

Inagan n Yahwa ssexdamen kan Ṭrejma n ddunit tajdiṭ bac ad dafɛen ɣef wayen is i ţţamnen?

Ala. Mazal-aɣ nessexdam aṭas n ṭrejmat m’ara neţberriḥ lexbaṛ n lxiṛ. D ṣṣeḥ, neţmuddu baṭel yiwet n Ṭrejma n ddunit tajdiṭ i wid yeqqaren yid-neɣ Adlis Iqedsen. Meɛna, kra seg wid yeqqaren yid-neɣ bɣan ad ssexdmen ṭrejmat nniḍen.