Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Tarbaεt n inelmaden tis 136 n Uɣerbaz n Gilεad ţţunefken-asen diblumat

Tarbaεt n inelmaden tis 136 n Uɣerbaz n Gilεad ţţunefken-asen diblumat

Ass n ssebt 8 meɣres 2014, mbeεd xemsa wagguren n leqraya lqayen ireṣṣan ɣef usenqed n Wedlis Iqedsen, ţţunefken diblumat i inelmaden n terbaεt tis 136 n Uɣerbaz n Gilεad. Aɣerbaz-agi yesseḥfaḍ kra n iqeddacen di ddin ger Inagan n Yahwa i gesεan xilla n lweqt di leqdic iwakken ad ṣelḥen akteṛ di leqdic-nsen i Ṛebbi akk-d useǧhed n liman n yerfiqen-nsen di ddin. Ḥedṛen 11 548 lεibad i temlilit-agi, ama dinna di Baṭirṣun, amḍiq ideg yeţţili uɣerbaz-agi, ama s ţţawil n usiweḍ n bidyu s Internet ɣer imeḍqan yemxallafen am Kanada, Jamayka akk-d Burtu Riku.

“Ḥerzet lεeqliya-yagi.” David Splane, yiwen uεeggal seg Wesqamu amwellah n Inagan n Yahwa, yella d aselway n temlilit-agi. Imeslayen-is imezwura reṣṣan ɣef Ifilibiyen 2:5-7: “Myelḥut gar-awen akken yelḥa daɣen Lmasiḥ Yasuε.” Asmi yella Σisa ɣef lqaεa, ur yelli ara yeţḥebbiṛ ɣef wemkan i s-yeţţunefken. Yefka leεtab i yiman-is s wannuz di leqdic n Ṛebbi.

Di lemtel, Σisa iqubel Cciṭan mi t-ijeṛṛeb; mkul tikkelt yeqqar-as “yura”, yerna iţţader-ed aḥric seg wayen yesselmed Musa i wegdud n Isṛayil. (Matta 4:4, 7, 10; Asmekti 6:13, 16; 8:3) Γas akken Σisa yella yezmer a d-yini ayen i geţxemmim kan neţţa imi d Mmi-s n Ṛebbi yerna yeţwadhen s ṛṛuḥ iqedsen, s wannuz, yefka lqima tameqrant i wayen i gexdem Musa. Akken ula d nekni, ilaq a nesteεṛif s wayen umi i zemren a t-xedmen wiyaḍ yerna a ten-neţcekkiṛ aṭas.

Gma-tneɣ Splane ihdeṛ-ed daɣen ɣef lεeqliya n lεali i d-ikseb Σisa seg wayen i s-tesseḥfeḍ tudert-is ɣef lqaεa. Σisa yenna deg yiwet n tẓallit: “Nekk, εuzzeɣ-k di ddunit agi. Kfiɣ ccɣwel i yi-d-tefkiḍ a t-xedmeɣ. Tura, kečč, a Baba, εuzz-iyi ɣur-ek, s lεezz nni i sεiɣ ɣur-ek uqbel a d-texleq ddunit.” (Yuḥenna 17:4, 5) Σisa ur yelli ara yeţnadi ad yesεu lemzeyyat nniḍen. Yella yeţmenni kan, m’ara yuɣal s igenni, ad yaf amkan-nni i gesεa uqbel, yeεni “lxedma-ines n zik.” Inelmaden n Gilεad yelha-yasen ad εanden Σisa, yeεni ad reṣṣin axemmem-nsen ɣef ccɣel ara xedmen mačči ɣef wemkan ara ten-id-iṣaḥen; ilaq-asen ad feṛḥen ɣas ur ten-id-ṣaḥent ara lemzeyyat nniḍen m’ara ṛuḥen ɣer wanda ara qedcen.

Ur neddmet ara ɣef iseflawen-nwen.” William Malenfant, yiwen wemεiwen n terbaεt yeţwellihen aselmed, yiwet si trebbaε iqeddcen d Wesqamu amwellah, iweṣṣa inelmaden. Yenna-yasen ad tebεen lemtel i d-yeǧǧa wemceggeε Bulus, i d-iţbegginen belli yeqbel ad isebbel iman-is. Bulus ur yelli ara yeţxemmim ɣef wayen i geǧǧa bac ad yeqdec ɣef Ṛebbi. Yenna-d imeslayen-agi: “Teţţuɣ ayen iεeddan, ţmuquleɣ s ayen yellan ɣer zdat. Ţţazzaleɣ ɣer lmeqsud.”—Ifilibiyen 3:13, 14.

Inelmaden-agi ad cbun iqeddacen unṣiḥen n Ṛebbi n zik-nni akk-d wid n wass-a ma yella ur ndimen ara ɣef iseflawen-nsen. Gma-tneɣ Malenfant ibder-ed Clara Gerber Moyer, i gebdan tqeddec ɣef Yahwa mi tella ţ-ţamecṭuḥt. Tura-d ayagi: “Acḥal i feṛṛḥeɣ m’ara meyyzeɣ ɣef wakteṛ n 80 n sna i sεeddaɣ di leqdic i Ṛebbi, mebla nndama! Lukan d ayen umi ara εiwdeɣ, ad xtiṛeɣ tudert am tagi.”

“Berrḥet Tagelda kenwi d lmuluk yerna amzun d lmuluk i tellam.” Gerrit Lösch, yiwen seg iεeggalen n Wesqamu amwellah, iεawen inelmaden ad fken azal i lemzeyyat timxulaf i geţţunefken i iberraḥen. Tamezwarut, inelmaden teţţunefk-asen lemzeyya ad qedcen i Ṛebbi amzun d lmuluk m’ara ţberriḥen lexbaṛ n lxiṛ n Tgelda, axaṭer imeslayen n tεibṛanit akk-d tegrikit i d-yeţwaṭerjmen deg Wedlis Iqedsen “lmelk” zemren daɣen ad ţwaṭerjmen “amceggeε.” Tis snat, teţţunefk-asen lemzeyya ad berrḥen lexbaṛ n lxiṛ seddaw n lwelha n lmuluk, am unelmad Filibus.—Lecɣal 8:26-35.

Gma-tneɣ Lösch yefka-d mbeεd kra n liḥalat i d-mmugren kra n Inagan n Yahwa mi llan ţberriḥen Tagelda. Di tmurt n Miksik, yiwen n Inigi isem-is Gabino yennum yesṭebṭub ɣer tewwura yiwet neɣ snat tikkal kan. Meεna, yiwen wass, yesṭebṭeb ɣer yiwet tewwurt ṛebεa tikkal. Argaz i d-yeldin tawwurt yella akken kan iteddu ad ineɣ iman-is. Yenna-yas-d: “Mi d-tesṭebṭbeḍ tikkelt tis ṛebεa, [amrar-agi] yella yezzi-d i temgerṭ-iw. Meεna kkseɣ-t bac a d-ldiɣ tawwurt. Ṣaḥḥit imi i d-tkettṛeḍ asṭebṭeb, axaṭer lukan ur texdimeḍ ara akka, tili εellqeɣ iman-iw.”

Tikwal, liḥalat am tigi ḍerrunt-ed kan akka weḥḥed-sent. Meεna neẓra belli xilla seg-sent mačči weḥḥed-sent i d-ḍerrunt. Liḥalat-agi ţbegginent-ed belli lmuluk n Ṛebbi ţwellihen-aɣ di leqdic n uberreḥ yeţwaxdamen di ddunit meṛṛa.—Aweḥḥi 14:6.

“Win yeṭṭfen di ccan-is ad yeţţubarek.” Michael Burnett, yiwen uselmad deg Uɣerbaz n Gilεad, ireṣṣa lxeṭba-ines ɣef usentel-agi yerna yessexdem lemtel n Yaεbiṣ, yiwen si tarwa n Yahuda i gellan “isεa ccan akteṛ n watmaten-is”. Yaεbiṣ yeḍleb i Ṛebbi: “Ma yella dɣa tburkeḍ-iyi, ssewseε tilisa-w, afus-ik ad yili yid-i, aţ-ţesbeεdeḍ fell-i cceṛ, dɣa ad ikfu fell-i lḥif!”—1 Amezruy 4:9, 10.

Ma qqaren inelmaden i Yahwa di tẓilla-nsen ayen swaswa i ḥwaǧen, ad εanden Yaεbiṣ. Zemren di lemtel a s-ḍelben i Ṛebbi a ten-iεiwen akken ad leḥqen ɣer leqsed n wayen i d-ḥefḍen di Gilεad. Sεan lḥeqq daɣen a s-ḍelben a ten-yesseṛ di twaɣit: mačči bac a ten-yesseṛ seg wayen akk i tezmer a d-tawi, meεna a ten-iεiwen bac ur ten-issefcal ara leḥzen neɣ lemḍerra is ara d-teglu. Ṛebbi yeqbel taẓallit n Yaεbiṣ; ihi a d-iqbel ula ţ-ţid n inelmaden n Gilεad.

“Smendget times ireqqen deg-wen.Mark Noumair, yiwen uselmad nniḍen n Gilεad yerna d amεawen n terbaεt yeţwellihen aselmed, ireṣṣa lxeṭba-ines ɣef 1 Itisalunikiyen 5:16-19. Times teḥwaǧ ayen ara tesserɣ, lhawa akk-d lḥamu bac aţ-ţeqqim treqq. Kifkif daɣen, inelmaden zemren ad ssexdmen tlata n leḥwayeǧ ara yesmendgen acṛah-nsen bac ad yeqqim “ireqq” i uberreḥ.

Lḥaǧa tamezwarut: “Ilit dayem tfeṛḥem.” (1 Itisalunikiyen 5:16) Lfeṛḥ d ayen ara yeṭṭfen acṛah n inelmaden yecεel, am wesɣar i tmes. Ad yennerni lfeṛḥ-nsen ma ţmeyyizen ɣef nnfeε ara afen m’ara ten-yeqbel Yahwa. Lḥaǧa tis snat: “Ţẓallat mebla aḥbas.” (1 Itisalunikiyen 5:17) Taẓallit am lhawa yessaɣayen times. Ilaq a nessiɣzif tiẓilla-nneɣ w’a nleddi ulawen-nneɣ i Ṛebbi. Lḥaǧa tis tlata: “Ţḥemmidet ɣef kullec.” (1 Itisalunikiyen 5:18) Asteεṛef yesnernay akteṛ leḥṛaṛa di lεalaqat yellan gar-aneɣ d Yahwa akk-d tid yellan gar-aneɣ d watmaten ţ-ţyessetmatin-nneɣ. Gma-tneɣ Noumair iweṣṣa-ten s imeslayen-agi: “Kesbet lεeqliya ireqqen n wid yesteεṛifen, mačči lεeqliya semmḍen n wid yeţqejjimen.”

“Ḥemden Yahwa nutni akk-d igenwan.” Sam Roberson, yiwen uselmad n llakulat iṛebbaniyen, yebda lxeṭba-ines s kra n imeslayen yellan deg Wedlis Iqedsen i d-yesskanayen belli iṭij, aggur d yetran ţḥemmiden Yahwa. (Ahellil 19:2; 89:38; 148:3) Yenna-yasen i inelmaden belli ula d nutni yeţţunefk-asen ccan ad ḥemden Yahwa, mbeεd iqeddem-ed kra n tmeskanin ireṣṣan ɣef liḥalat iseg i d-εeddan inelmaden deg uberreḥ n lexbaṛ n lxiṛ. Di lemtel, yiwen unelmad yellan inehheṛ ṭṭumubil, yeḥbes bac ad yeǧǧ yiwen wergaz ileḥḥun s tkeṛṛust (akersi bu ṛṛwadi) ad yezger abrid. Argaz-nni yerra-yas tajmilt. Gma-tneɣ icekkeṛ-it ɣef waya. Swakka i bdan aqeṣṣer gar-asen, mbeεd argaz-nni yeqbel ad iɣer Adlis Iqedsen mebla lexlaṣ. Di smanat i d-itebεen, iṛuḥ unelmad-nni n Gilεad s axxam n wergaz-nni bac a t-isɣer. Teţţunefk-as ihi tegniţ ad yehdeṛ ɣef lexbaṛ n lxiṛ i waṭas n medden i d-yusan ad ẓren argaz-nni. Γer taggara, sebεa n yemdanen i gqeblen ad ɣren Adlis Iqedsen, ayagi meṛṛa yeḍra-d imi d-yella uqeṣṣer-nni n tazwara.

“Iǧhidet akteṛ s uselmed aṛebbani.” Donald Gordon, yellan d amεawen n Terbaεt n usufeɣ n tezmamin, yesteqsa seg inelmaden sin watmaten ţ-ţlawin-nsen. Yiwen seg watmaten yenna-d belli ifyar yellan deg Ifasusiyen 3:16-20 uɣalen-d acḥal ţ-ţikkelt deg wayen i ɣran. Ayagi iεawen inelmaden ‘ad iǧhiden’, ad sεun annuz w’ad ilin d wid isehlen ad qerrben ɣur-sen medden, yerna ad steεṛfen belli Yahwa ihegga-d xilla n ccɣel i yal yiwen seg Inagan-is. Yiwet si tyessetmatin tenna-d belli iεǧeb-as lemtel i gessexdem yiwen seg iselmaden: ur ilaq ara a nili am uḥutiw ameqran deg ubuqal amecṭuḥ ideg ur yeţţaf ara liţţeε bac ad yimɣur, meεna am uḥutiw amecṭuḥ di lebḥeṛ. Tenna-d daɣen: “Lemdeɣ-d belli, ma lliɣ ţ-ţamecṭuḥt di tuddsa n Yahwa, a y-iεiwen ad uɣaleɣ ţ-ţameqrant di leḥwayeǧ n ṛṛuḥ.”

“A ken-id-yemmekti Yahwa di lxiṛ!” Mark Sanderson, yiwen seg iεeggalen n Wesqamu amwellah yefka-d lxeṭba tigejdit di tmeɣra-yagi n wefraq n diblumat. Ireṣṣa asentel-ines ɣef tẓallit n Naḥamya ideg yenna: “Mmekti-yi-d di lxiṛ, ay Illu-yiw.” (Naḥamya 5:19; 13:31) Naḥamya ur yenwi ara belli Yahwa a t-yeţţu neţţa neɣ ad yeţţu ayen i gexdem ɣef ddemma-s. Iḍleb-as i Ṛebbi a t-id-yemmekti s leḥnana w’a t-ibarek.

Inelmaden zemren ad tḥeqqen belli, ma yella ssexdmen lewṣayat i sen-d-iţţunefken di Gilεad, Yahwa a ten-id-yemmekti “di lxiṛ.” Ilaq-asen abeεda ad εebden Yahwa uqbel kulci axaṭer ḥemmlen-t seg wul-nsen meṛṛa. (Marqus 12:30) Abṛaham yella iḥemmel Yahwa seg wul-is meṛṛa, Yahwa yemmekta-t-id s leḥnana. Γas akken Abṛaham εeddan fell-as wazal n walef iseggasen segmi yemmut, Ṛebbi yeqqar-as “Abṛaham i y-iḥemmlen”—Icεaya 41:8.

Gma-tneɣ Sanderson yesmekta-d mbeεd inelmaden belli ilaq-asen ad ḥemmlen lɣir-nsen, abeεda imdukkal-nsen imasiḥiyen. (Marqus 12:31) Ilaq-asen ad ţṛuḥun ɣer wid yeḥwaǧen lemεawna, akken i gexdem wergaz-nni n lεali n wat Cumrun, i d-ibeggnen iman-is belli “d neţţa i d lɣir n wergaz nni i d-iɣlin deg ufus n iqeṭṭaεen.” (Luqa 10:36) Ibder-ed lemtel n Nicholas Kovalak, yiwen seg wid yeɣran di Gilεad i guɣalen mbeεd d aneqqad n temnaṭ. Gma-tneɣ Kovalak yella yeţwassen belli d aḥnin yerna yesεa leḥmala. Yiwen wass, iweṣṣa yiwen uberraḥ amsebrid akk-d tmeṭṭut-is bac ad sεun leḥṛaṛa di leqdic-nsen i Ṛebbi, yessexdem lemtel-nni i d-yeqqaren: “Akken ara yebdu wass, akken ara tebdu smana, akken ara yebdu ccheṛ, akken ara yebdu useggas.” Meεna, kra n wussan mbeεd, imi i gwala ayen i txeddem weltma-tneɣ-nni, yefka-yas ṭṭmana s imeslayen-agi: “Ţţu ayen i d-nniɣ. Txeddmeḍ yakan akteṛ n wayen ilaqen. Ma tebɣiḍ aţ-ţdumeḍ [di ccɣel-agi], ssenqes aɣiwel.” Lewṣaya-yagi-ines yelhan yerna yeččuṛen d leḥnana tεawen-iţ aţ-ţdum di leqdic lweqt kamel acḥal d aseggas.

Γer taggara, gma-tneɣ Sanderson iḥawet inelmaden ad awḍen ɣer leqsed n wayen i d-lemden, yeεni ad sselmden w’ad sseḥfḍen wiyaḍ. (2 Timutawus 2:2) M’ara awḍen ɣer wanda ara ţţuceggεen, ad izmiren ad sseǧhden tajmaεt tamasiḥit w’a ţ-εiwnen bac aţ-ţreṣṣi, yerna ad sεun ṭṭmana belli Yahwa a ten-id-immekti di lxiṛ.—Ahellil 20:1-5.

Taggara. Mbeεd mi ţţunefken diblumat i inelmaden, yiwen seg-sen yeɣra-d yiwet tebṛaţ n ccekṛan i d-uran wid yeɣran deg uɣerbaz-agi. Mbeεd, 15 inelmaden fukken ahil n wegraw mi d-ɣennan, mebla lmusiqa, ccna wis 123 yeţţusemman “Les bergers, des dons en hommes” si tektabt Chantons à Jéhovah.