Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Berrḥen lexbaṛ n lxiṛ rrif rrif n wasif n Xingu

Berrḥen lexbaṛ n lxiṛ rrif rrif n wasif n Xingu

Deg wussan imezwura n yulyu 2013, 28 Inagan n Yahwa ffɣen si temdint n Saw Filiks du Xingu, yellan di Brizil, bac ad ṛuḥen ɣer wemḍiq anda i zedɣen Ihendiyen kayabu akk-d yuruna. Rekben yiwet n teflukt yesεan 15 lmitrat di teɣzi, ddan deg wasif n Xingu; asif-agi yesεan 2 092 kilumitrat yessufuɣ ɣer wasif ameqran n Amaẓun di tama ufella.

Inagan-agi qesden ad sεeddin lweqt-nsen kamel deg uberreḥ n Tagelda n Ṛebbi di tudrin yellan rrif n wasif-agi. Ass wis tlata, tewweḍ terbaεt-agi ɣer taddart umi qqaren Kukraymuru. Mmugren-ten-id s lfeṛḥ kra n lεibad yesteṛḥiben. Mlalen-d yiwet tmeṭṭut yeţwehhin s ifassen-is ɣer yal tama. Amsaεef i geţwellihen tarbaεt-agi laṣel-is n lǧiha-ya; yessefhem-asen-d acu i tebɣa a d-tini tmeṭṭut-nni i sen-d-iţwehhin, lmeεna-s: “Aset-ed akken ma tellam. Nebɣa a ken-nissin meṛṛa!”

Inagan hedṛen i wid akk i ufan dinna ama s tburtugit ama s uwehhi. Ţţeswiṛat yeččuṛen d lelwan yellan ɣef tezmamin ireṣṣan ɣef Wedlis Iqedsen i wwin yid-sen ṣelḥent-asen mliḥ. Aṭas seg wat taddart-agi i gqeblen ad awin yiwet n tezmamt. Tareẓẓit yeţţusemman Ḥess i Ṛebbi teεǧeb-asen kteṛ n tiyaḍ.

Gerson, yellan d aberraḥ amxalef n lweqt kamel di Saw Filiks du Xingu, yeḥka-d ɣef yiwen wergaz umi teţţunefk tektabt Tiqsiḍin n Wedlis Iqedsen: “Yeṭṭef taktabt-agi s sin ifassen-is yeţmuqul-iţ yerna izmeḍ-iţ ger ifassen-is. Yeggumma a s-iserreḥ.”

Inagan n Yahwa ǧǧan 500 n treẓẓiyin, tektabin, akk-d tesɣunin i kra n imezdaɣ n tudrin-agi i d-isbeggnen asteεṛef. Imezdaɣ n Kawatir fkan-d tameẓẓuɣt mi sen-d-ssefhmen Inagan lweεd n Wedlis Iqedsen yeεnan lǧennet ɣef lqaεa. “Di Lǧennet, lεibad ad εicen am nekni”; akka i s-yenwa Tonjaikwa, yiwen uhendi kayabu i gesteṛḥben yis-sen.

Di Saw Filiks du Xingu, aṭas n lɣaci i gεelmen s ccɣel-agi i xedmen Inagan. Simone, yiwet ger Inagan-agi, teḥka-d belli, di temdint ansi i d-tekka, kra n lɣaci nwan-as ur ten-ţţaǧǧan ara ad kecmen ɣer tudrin-agi. Meεna ur d-mlalen ula d yiwen wugur. Tenna-d Simone: “Steṛḥben akk yis-neɣ yerna nberreḥ-asen meṛṛa lexbaṛ n lxiṛ.”