Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Tiqsiḍin n Wedlis Iqedsen di llakul

Tiqsiḍin n Wedlis Iqedsen di llakul

Di 2012, teffeɣ-ed tektabt yeţţusemman Tiqsiḍin n Wedlis Iqedsen s tbangasinant, yiwet n tutlayt i ţmeslayen di Filibin. Taktabt-agi teṣleḥ i warrac n llakul yeţmeslayen tutlayt-a. Teffeɣ-ed di lweqt ideg i d-ifka weɣlif n Usedwel (Ţṛebga) yiwen lameṛ i d-iqqaren belli, di llakul n imecṭaḥ, ilaq ad ɣren warrac s lluɣa-nsen.

Kteṛ n 100 lluɣat i gellan di Filibin. Seg waṭas aya i ţnadin di tmurt-agi ad ẓren anta tutlayt swayes ara sɣarayen di llakul. Di 2012, atan wayen yuran deg yiwen ṛṛabul n weɣlif n Usedwel: “M’ara nessexdam [di llakul] tutlayt i ţmeslayen medden deg yexxamen [...] arrac ḥeffḍen s sshala yerna bihfih.” Daymi i d-iţţuhegga wahil i lmend n uselmed s waṭas n tutlayin iwakken yal aqcic ad iɣer s lluɣa i geţmeslay seg wasmi i gella d amecṭuḥ.

Tabangasinant tella ger tutlayin i d-yeţwaxtaṛen. Acu kan, yella yiwen wugur: εlaḥsab n yiwen wemḍebber n llakul, ulac aṭas n tektabin n leqraya s tutlayt tabangasinant. Taktabt yeţţusemman Tiqsiḍin n Wedlis Iqedsen tusa-d di lweqt-is. Ssufɣen-ţ-id Inagan n Yahwa di wambeṛ 2012, deg inejmuεen-nsen imeqranen.

Ḍebεen-d seg-s azal n 10 000 n tektabin yerna ferqen-tent deg inejmuεen-agi. Am warrac am imawlan-nsen feṛḥen aṭas imi yal yiwen tṣaḥ-it-id tektabt di lluɣa-ines. Atan d acu i d-nnan kra n imawlan: “Arraw-nneɣ ḥemmlen-ţ mliḥ axaṭer fehmen-ţ akken ilaq.”

Akken kan yekfa unejmuε iwumi ḥedṛen, kra n Inagan wwin taktabt-agi n Teqsiḍin ɣer llakul, di temdint n Daguban. Inelmaden, iwumi yewεeṛ a d-afen tizmamin yuran s tbangasinant, tekcem-asen ɣer wul tektabt-agi. Kteṛ n 340 n tektabin i geţwaferqen. Iselmaden bdan din din ssexdamen taktabt-agi n Teqsiḍin bac ad sselmden i warrac ad ɣren s tutlayt-nsen.

Inagan n Yahwa feṛḥen imi ẓran belli taktabt-agi teṣleḥ i uselmed n imecṭaḥ di llakulat. Yiwen seg wid yesṭerjmen Tiqsiḍin n Wedlis Iqedsen yenna-d: “Neẓra seg waṭas aya belli aṭerjem ɣer tutlayin i heddṛen medden si temẓi d ayen iwulmen mliḥ bac a nḥaz ulawen-nsen. Γef waya i xeddmen Inagan lmeǧhudat iwakken ad sṭerjimen Adlis Iqedsen akk-d tezmamin ireṣṣan fell-as s tmeyyatin n lluɣat.”