Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Ṭayland: teţţunefk lemεawna yesεan azal i warrac n llakul

Ṭayland: teţţunefk lemεawna yesεan azal i warrac n llakul

Di bujambeṛ 2012, Inagan n Yahwa n tmurt n Ṭayland bdan xeddmen yiwen n ccɣel d amxalef bac ad εiwnen arrac imecṭaḥ akken ad ḥeṛcen di leqraya-nsen. Σecrin Inagan ṛuḥen ɣer iɣerbazen (llakulat) yellan di leǧwayeh n temdint n Bankuk. Mlalen anemhal, yeεni amḍebber amezwaru, n yal aɣerbaz yerna ferqen i lecyux akk-d warrac xilla si tesɣunt Aki-d! i d-iffɣen di tubeṛ 2012, asentel-ines: “Réussir sa scolarité

Ccɣel-agi i xedmen yewwi-d lfayda s ṣṣeḥ; ihi Inagan ssukken-t-id (ssawḍen-t) i tmurt meṛṛa. Di 18 n lechuṛ i d-itebεen, εnan 830 iɣerbazen, yerna ufan din arrac akk-d lecyux i gebɣan nezzeh a sen-teţţunefk tesɣunt-agi Aki-d! Γef ddemma n wannect-a, Inagan εawden ḍebεen-d tlata tikkal tasɣunt-agi bac ad yili wayen ara d-iqidden i yemdanen-agi meṛṛa i ţ-id-iḍelben. Tikkelt tamezwarut ssufɣen-d seg-s 30 000 tesɣunin. Lameεna, imi yeεǧeb mliḥ wayen yuran deg-s i lɣaci, ufan ɣer taggara belli ferqen 650 000 tesɣunin.

Inemhalen n iɣerbazen akk-d lecyux rran-d din din s lexbaṛ acḥal i teṣleḥ tesɣunt Aki-d! Yiwen si lecyux yenna-d: “Tasɣunt-agi aţ-ţεiwen arrac ad sεun lεalaqat yelhan akk-d imawlan-nsen yerna ad sεun lmeqsudat n lεali.” Kra n iɣerbazen ssekcmen ayen yellan di tesɣunt-agi deg wahil n wayen i qqaren warrac. Wiyaḍ ssexdamen-ţ m’ara sseḥfaḍen i warrac a d-ɣren. Deg yiwen seg iɣerbazen-agi, lecyux fkan i warrac yiwet n lxedma ideg ara d-ketben ayen i d-fehmen si tesɣunt-agi Aki-d! Wid akk i d-issewǧden lxedma yelhan ţţuǧazan.

Yiwet n teqcict iεǧeb-as weḥric yeţţusemman: “Jeunesse et obésité — La guerre est déclarée !” i gellan di tesɣunt-agi. Tessefhem-ed belli tuzert tuɣal d aɣbel i gḥuzan aṭas n lεibad yerna imdukkal-is ţsetḥin a d-hedṛen ɣef temsalt-a. Tenna-d imeslayen-agi: “A ken-cekkṛeɣ imi i d-teţţakem lewṣayat i gsehlen mliḥ a tent-nefhem w’a tent-nṭebbeq.”

Imawlan daɣen beggnen-d belli teεǧeb-asen tesɣunt-agi n tubeṛ 2012. Yiwet n tyemmaţ tcekkeṛ kra n Inagan i d-yusan aţ-ţeẓren deg wexxam-is, tenna-yasen: “Tasɣunt-agi llan deg-s kra n ţţawilat iṣelḥen mliḥ ara iεiwnen yelli bac aţ-ţeḥṛec di llakul.”

Mass Pichai Petratyotin, i d-iţmettilen Inagan n Yahwa n Ṭayland, yenna-d: “[Tasɣunt] Aki-d! tesbeggin-ed lekyasa taḥeqqanit n Wedlis Iqedsen, i gṣelḥen s ṣṣeḥ i lεibad ass-a. Inagan n Yahwa ţţaken azal ameqran i ţṛebga. Nefṛeḥ ihi mliḥ imi i nferreq baṭel tasɣunt-agi i medden meṛṛa.”