Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Yiwet n Tzeqqa n yegrawen tajdiṭ di tlemmast n teẓgi n Amaẓun

Yiwet n Tzeqqa n yegrawen tajdiṭ di tlemmast n teẓgi n Amaẓun

Di tlemmast n teẓgi n Amaẓun tbedd yiwet n Tzeqqa n yegrawen tajdiṭ n Inagan n Yahwa; Tazeqqa-yagi tessewham s ṣṣeḥ. Tebna deg yiwen n lmelk (akal) n 52 yegṭaren i d-yezgan di tama n ufella n temdint n Manawus, di Brizil. Amur ameqran si lmelk-agi tɣumm-it teẓgi n Amaẓun. Xilla n leṣnaf n yefṛax ireqmen ţɣennin sufella n ttjuṛ tiεlayanin n lǧuz n Brizil akk-d ttjuṛ nniḍen. Ayɣer i tebna Tzeqqa n yegrawen deg wemḍiq-agi?

Tamdint n Manawus i gbeεden s wazal n 1 450 kilumitrat ɣef wanda i geţfakka wasif n Amaẓun, tesεa qrib 2 imelyunen n imezdaɣ. Tazeqqa-yagi tajdiṭ aţ-ţeṣleḥ abeεda i 7 000 Inagan n Yahwa n Manawus akk-d leǧwayeh i s-d-yezzin; aţ-ţeṣleḥ ula i wid n tudrin yellan rrif n wasif n Amaẓun akk-d isaffen i d-icudden ɣur-es. Tamdint i gbeεden akteṛ, yeεni Saw Gabriyil da Kacwayra, tezga-d azal n 800 kilumitrat ɣer lǧiha n lɣerb n Manawus. Kra n Inagan sεeddayen tlata wussan di lbabuṛ bac a d-asen ɣer Tzeqqa n yegrawen!

Lebni n Tzeqqa n yegrawen di tlemmast n teẓgi n Amaẓun mačči d ccɣel isehlen. Ayagi laqen-as xilla n dduzan n lebni, azal n 13 isendyaq-nni imeqranen i ţεebbin i lbabuṛat. Wwin-ten-id si lmerṣa n Ṣantus (di Saw Bawlu), sεeddan-ten-id rrif rrif n lebḥeṛ n Brizil akk-d wasif n Amaẓun armi d amkan ideg ara tebnu tzeqqa.

Tazeqqa-yagi n yegrawen, ţ-ţis 27 i gebnan di Brizil. Ass n 4 maggu 2014, 1 956 n yemdanen i gḥedṛen mi teldi tzeqqa-ya. Xilla seg-sen ţrun si lfeṛḥ, axaṭer ţ-ţikkelt tamezwarut i ḥedṛen i unejmuε di Tzeqqa n yegrawen.

Wid meṛṛa iḥedṛen zemren tura ad slen i umennay yerna a t-ẓren. Ayen akka i gbeddlen deg wayen yeεnan inejmuεen yeεǧeb i imeḥdaṛ, axaṭer inejmuεen n zik llan ţwaxdamen deg imukan n baylek, ideg xilla ur ẓerren la dekkan wala amennay. Yiwen Inigi yenna-d: “Acḥal n lesnin aya i ḥeddṛeɣ i yegrawen. Leεmeṛ i ssawḍeɣ ad waliɣ akken ilaq timεayin i d-iţwaleεben; lliɣ selleɣ-asent kan.” Ass-a, imeḥdaṛ meṛṛa ţwalin dekkan.