Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Yiwen wedlis iqedsen yeţwaxedmen bac ad yeṭṭef aṭas

Yiwen wedlis iqedsen yeţwaxedmen bac ad yeṭṭef aṭas

Γur Inagan n Yahwa ulac adlis yesεan azal akteṛ n Wedlis Iqedsen. Ssenqaden-t dima yerna ssexdamen-t bac ad sselmden i wiyaḍ lexbaṛ n lxiṛ n Tgelda n Ṛebbi. (Matta 24:14) Daymi i ţţeɣraṣen bihfih yedlisen-nsen. Γef ddemma n wannect-a, xedmen ayen akk ilaqen iwakken adlis, Tira Iqedsen, ṭrejma n ddunit tajdiṭ umi i εawden aṭerjem i d-iffɣen di 2013, ad yili yecbeḥ yerna yeǧhed.

Ilaq ad yeţwaxdem wedlis-agi ajdid akken ara yeṭṭef aṭas. Kra seg wid i gxeddmen di lemṭabεa n Inagan yellan di Wulkil, di Marikan, hedṛen ɣef leqsed-agi-nsen akk-d wemḍebber n yiwet tkebbanit yesselsaqen tiktabin. Amḍebber-agi yenna-yasen-d: “Adlis-agi Iqedsen iɣef i teţnadim, ulac-it. [...] D ayen yesseḥzanen, meεna azgen ameqran seg yedlisen-agi ţwaxedmen i ucebbeḥ n ṭṭwabel [...], mačči bac ad ṭṭfen aṭas n lweqt.”

Kra n yedlisen Traduction du monde nouveau i d-yeffɣen ayagi iεeddan, ur ǧhiden ara mliḥ. Tikwal, m’ara yeḥmu mliḥ lḥal, ţţeɣraṣent-ed kra n tewriqin seg-sen. Bac ad ssiwḍen a d-ssufɣen Adlis Iqedsen ara yeṭṭfen ɣas a t-issexdem walbeεḍ aṭas, ama d anebdu ama d ccetwa, tarbaεt n wid ixeddmen di lemṭabεa nudan a d-afen ṣṣenf n llesqa, n ţţawilat akk-d dduzan n welsaq iwulmen i teɣlaft. Mi d-ufan ayen i ḥwaǧen, ḍebεen-d kra kan n yedlisen bac a ten-jeṛṛben Inagan di tmura yemxallafen mliḥ di liḥala n tegnawt; xedmen ayagi ama di tmura yellan di leǧwahi yeḥman mliḥ ama di tid yellan di leǧwahi semmḍen mliḥ, am Alaṣka.

Seţţ cchuṛ mbeεd, εawden rran-d idlisen-agi bac a ten-walin wid ixeddmen di lemṭabεa. Tarbaεt-nni n wid ixeddmen di lemṭabεa xedmen ayen ilaqen bac ad wennεen idlisen-a, mbeεd εawden ceggεen kra akken ad ţţujeṛṛben am imezwura. Leḥsab n wayen i jeṛṛben yewweḍ ɣer 1 697 yedlisen. Kra seg yedlisen-agi tḥuza-ten twaɣit tameqrant mebla lebɣi n wid i ten-ijeṛṛben. Di lemtel, yiwen wedlis iqedsen ţţun-t di beṛṛa, yewwet fell-as ugeffur (lehwa) iḍ kamel. Yiwen wedlis nniḍen yeddem-it uḥemmal n waman mi d-tεedda yiwet tbuciḍant. Ajeṛṛeb-nni i ţţujeṛṛben yedlisen-a di beṛṛa akk-d twaɣiyin i ten-iḥuzan, fkan-d lexbaṛ iṣelḥen mliḥ ɣef wacḥal i zemren ad ṭṭfen.

Di 2011, di lweqt ideg i llan ţjeṛṛiben idlisen-agi, Inagan uɣen-d i lemṭabεat-nsen n Wulkil akk-d Ibina, di Jabun, timacinin tijdidin i glessqen tiktabin s lemɣawla tameqrant. Leqsed n wannect-a mačči kan bac a d-xedmen leḥsab iwulmen n yedlisen, meεna bac a d-xedmen daɣen, di sin imukan-agi, idlisen iqedsen yeţţemcabin.

Ugur: tiɣlafin ţţeεwajent

Mi gebda useggas 2012, snat lemṭabεat-agi bdant xeddment-ed Ṭrejma n ddunit tajdiṭ yellan yakan si zik, yeεni taberkant ţ-ţzeggaɣt; nessexdem i teɣlaft-is ţţawil ajdid i d-nufa, i gṣenεen s wayen umi i qqaren polyuréthane. Meεna timacinin-agi tijdidin ssexdment llesqa akk-d teɣlaft n daxel ur neţţujeṛṛeb ara uqbel; dɣa nufa belli εewjent teɣlafin-nni n ufella. Nnuda din din a d-naf tifrat i wugur-a... ur d-nufi acemma. Nuɣal neḥbes asufeɣ n yedlisen-agi.

Win i d-iṣenεen yiwen si ţţawilat i nessexdem yenna-d belli aεwaj n teɣlafin-agi yeţleɣwayen yeţwassen mliḥ, yerna yezga yewεeṛ i useggem. Acu kan, Inagan ur bɣin ara a d-xedmen Adlis Iqedsen yesεan taɣlaft taqurant, ihi ṭṭfen di leqsed-nsen a d-xedmen adlis ara yesεun taɣlaft yeţleɣwayen yerna ara yeqqimen tecbeḥ. Ṛbeε cchuṛ nekni neţjeṛṛib yerna neţţeεraḍ leṣnaf n llesqa akk-d leṣnaf n dduzan ajdid i d-nufa i teɣlaft n daxel. Nessaweḍ a d-naf ayen iwulmen bac a d-nexdem taɣlaft ur neţţeεwaj ara. Akka nkemmel asufeɣ n yedlisen...

Iεawed yeḥbes usufeɣ n yedlisen

Di ctambeṛ 2012, yeţwaḍleb i wid ixeddmen di lemṭabεat ad ḥebsen asufeɣ n Ṭrejma n ddunit tajdiṭ yellan yakan si zik, ad fakken qbel ayen yellan di lemxazen w’ad heggin iman-nsen akken a d-xedmen Ṭrejma n ddunit tajdiṭ umi i d-εawden aṭerjem. Llan qesden a ţ-id-ssufɣen di 5 tubeṛ 2013, m’ara yeţwaxdem wegraw n useggas n Watch Tower Bible and Tract Society of Pennsylvania.

Di 9 ɣuct 2013, yelḥeq ɣer lemṭabεat weḍris n Wedlis Iqedsen ajdid yeţwaketben s luṛdinatur. Azekka-nni bdan aḍbaε. Di 15 ɣuct, yeffeɣ-ed Wedlis Iqedsen amezwaru s lekmal-is si tmacint n welsaq. Di sebεa smanat i d-itebεen, tirebbaε ixeddmen di lemṭabεa n Wulkil akk-d tin n Ibina xedment iḍ d wass bac a d-ssufɣent w’ad ceggεent akteṛ n 1 600 000 yedlisen, ayen ilaqen bac yal yiwen seg wid ara iḥedṛen i wegraw n useggas a t-id-iṣaḥ wedlis.

Adlis-agi iqedsen ajdid yecbeḥ yerna yeţwaxdem akken ad iṭṭef aṭas. Acu kan, lexbaṛ yellan deg-s yesεa lqima akteṛ, axaṭer yeţţawi-d tudert. Yiwen wass, di Marikan, yiwet tmeṭṭut umi i geţţunefk wedlis-agi tura-d imeslayen-a: “S tektabt-agi tajdiṭ umi i d-εawden asufeɣ, uɣaleɣ fehmeɣ akteṛ Adlis Iqedsen.”