Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Meyyat sna n lmusiqa yeţţarran lεaḍima i Ṛebbi

Meyyat sna n lmusiqa yeţţarran lεaḍima i Ṛebbi

“Bɣiɣ aţ-ţṛuḥeḍ ɣer yexxamen n useǧǧel Kulumbya di Nuyuṛk w’a d-tɣenniḍ yiwen si ccnawi-nneɣ bac a t-seǧǧlen. Ur qqar ula i yiwen ayen akka ara txedmeḍ.”

William Mockridge

Di taggara n useggas 1913, William Mockridge yexdem ccɣel-agi, ur iwulef ara, iɣef i t-iwekkel Charles Russell. * Ccna-yagi, i ssnen kra n medden s usentel “The Sweet By-and-By”, yeţţuseǧǧel deg iḍebsiyen n 78 tdewwiṛin. Γer zdat, William yesla belli ccna-yagi a t-ssexdmen ţ-ţazwart i “Photo-Drame de la Création.” Ayen akka iwumi qqaren “Photo-Drame de la Création”, deg-s lxeṭbat ireṣṣan ɣef Wedlis Iqedsen yeţţuseǧǧlen yakan, lmusiqa akk-d kra n bidyuwat tigugamin (mebla lhedṛa) akk-d ţţeswiṛat iţţuweṣṣfen ɣef zzǧaǧ. Feṛṛǧen “Photo-Drame de la Création” i tikkelt tamezwarut di Nuyuṛk, di yennayer 1914.

Ccna-yagi i gseǧǧel William, yella d yiwen ger wakteṛ n 50 ccnawi i d-sεeddan wid yesselḥayen afunugṛaf m’ara d-iţεeddi “Photo-Drame de la Création” s teglizit. Amur ameqran si leḥwayeǧ yeţţuseǧǧlen mačči d Inelmaden n Wedlis Iqedsen i tent-ixedmen. Meεna, llant kra d nutni i tent-iḍelben i yexxamen n useǧǧel, am ccna-yagi n William. Imeslayen n ccna-ya ţwakksen-d si tektabt yeţţusemman Hymnes de l’Aurore du Millénium, yiwet si tektabin-nsen n ccnawi.

Ţţaken azal i imeslayen

Inagan n Yahwa ssexdmen deg waṭas n lesnin, i leεbada-nsen, ccnawi ur ktiben ara nutni. Daymi, m’ara iwalem, ţbeddilen imeslayen n ccnawi-yagi bac ad εedlen akk-d wamek i fehmen Tira Iqedsen.

Di lemtel, yiwen si ccnawi i ssexdmen i “Photo-Drame de la Création” yella yeţţusemma “Our King Is Marching On”, yeεni “Agellid-nneɣ iţeddu-d.” D ccna yeţţusemman “Battle Hymn of the Republic”, yeεni “Ccna n ṭṭrad n Tigduda”, iwumi i εawden. Asefru amezwaru n ccna-yagi ibeddu s imeslayen-a: “Allen-iw walant lεaḍima n tisin n Ssid.” Acu kan, Inelmaden n Wedlis Iqedsen beddlen imeslayen-agi akka: “Allen-iw zemrent ad walint lεaḍima n Ssid m’ara d-yeḥdeṛ.” Ayen akka i beddlen di ccna-yagi ibeggen-ed ayen is i ţţamnen: yeεni leḥkem n Σisa Lmasiḥ ur icudd ara kan ɣer tisin-is meεna icudd ula ɣer weḥdaṛ ara yeḥdeṛ deg yiwen n lweqt amxalef.—Matta 24:3.

Taktabt n ccnawi “Chantant et vous accompagnant de musique dans votre cœur” teffeɣ-ed di tazwara s teglizit di 1966. Lmusiqat meṛṛa i d-xedmen wid ur nelli ara d Inagan neɣ i d-snulfant ddyanat nniḍen ţwakksent. Deg useggas-nni yakan, Inagan xedmen-d yiwet n terbaεt tamecṭuḥt n wid ileεεben lmusiqa, seǧǧlen yal yiwen si 119 ccnawi yellan di tektabt-nni. Tijemmuyaε n Inagan ssexdamen lmusiqat-agi yeţţuseǧǧlen bac ad ɣennin ccnawi deg inejmuεen-nsen, yerna kra n Inagan stummunen yis-sent deg yexxamen-nsen.

Deg useggas 2009, Inagan n Yahwa ssufɣen-d yiwet n tektabt n Ccnawi tajdiṭ: Chantons à Jéhovah. Inagan ɣennan ccnawi-yagi yerna seǧǧlen-ten deg waṭas n lluɣat. Di 2013, Inagan ssufɣen-d bidyuwat n lmusiqa timezwura i imecṭaḥ. Yiwet seg-sent isem-is: Prie Dieu. Asmel jw.org yufa-d belli mkul ccheṛ xilla n imelyan n tikkal i d-ţwazdamen ccnawi.

Xilla i d-ibeggnen ccekṛan-nsen ɣef ccnawi-yagi. Yiwet n tmeṭṭut yeţţusemman Julie tura-d ɣef wayen yeεnan taktabt Chantons à Jéhovah: “Acḥal i lhan ccnawi-yagi ijdiden! M’ara iliɣ weḥd-i, ţḥessiseɣ i wid i d-iheddṛen ɣef wayen i ţḥussuɣ s ṣṣeḥ. S wannect-a, ţḥussuɣ belli lεalaqat-iw d Yahwa ţţiǧhident, yerna qesdeɣ a s-fkeɣ ayen akk umi i zemreɣ.”

Tameṭṭut nniḍen iţţusemman Heather teḥka-d ɣef lateṛ i d-teǧǧa bidyu Prie Dieu di sin warraw-is, yiwen yesεa sebε snin wayeḍ tesε snin. Tura-d: “[Bidyu-yagi] tεawen-iten ad ẓẓallen, mačči kan ṣṣbeḥ neɣ m’ara ilin yid-neɣ, meεna yal tikkelt ideg ara bɣun ad hedṛen i Yahwa.”

^ § 3 Charles Russell (1852–1916) yella d amwellah n Inelmaden n Wedlis Iqedsen, isem is i ţwassnen Inagan n Yahwa di teswiεt-nni.