Ṛuḥ ɣer wayen yellan deg-s

Aṭerjem di Miksik akk-d Marikan talemmast

Aṭerjem di Miksik akk-d Marikan talemmast

Di Miksik akk-d Marikan talemmast, llan wazal n 290 ṭrejmanat, yeţεicen di seţţa tmura, sṭerjimen tizmamin ireṣṣan ɣef Wedlis Iqedsen deg wakteṛ n 60 lluɣat. Ayɣer annect-agi meṛṛa? Axaṭer win iwumi ara teţţunefk kra n tezmamt ireṣṣan ɣef Wedlis Iqedsen di lluɣa i gfehhem s sshala, yezmer a s-yeεǧeb akteṛ wayen yuran deg-s.—1 Ikurintiyen 14:9.

Iwakken ad wennεen ṭrejma-nsen, kra n ṭrejmanat i gellan qeddcen di lbiru aɣelnaw n Inagan n Yahwa n Miksiku, ţţuceggεen ɣer lbiruwat yellan deg imeḍqan anda i ţwahdaṛent lluɣat-nsen. Yewwi-d nnfeε ubeddel-agi? Mebla ccekk. Imi ṭrejmanat-agi ţmeslayen akteṛ akk-d lεibad iheddṛen lluɣat ideg i sṭerjimen, ayagi yeţεawan-iten a d-ssufɣen tizmamin i gsehlen i lefhama.

Amek i ţwalin ṭrejmanat-a abeddel-agi? Federico, i gesṭerjimen ɣer tnahwatlit n Girriru yenna-d: “Di εecṛa iseggasen i sεeddaɣ di Miksiku, ḥaca yiwet n twacult i ufiɣ theddeṛ lluɣa-w. Ma d ass-a, qrib imezdaɣ meṛṛa n temdinin i d-yezzin i lbiru n uṭerjem heddṛen-ţ!”

Karin, i gesṭerjimen s tlalmanit n ukessar di lbiru n uṭerjem yellan di Čiwawa (Miksik), tenna-d: “Tamεict ger iminuniyen teţεawan-iyi ad ẓreɣ amek i teţbeddil tutlayt-nsen. Neţεic yerna nxeddem deg yiwet temdint ţ-ţamecṭuḥt; m’ara ḍilleɣ si ṭṭaq, ţwaliɣ imdanen ara yesfaydin si ṭrejma-nneɣ.”

Neyfi, i gzedɣen tura di lbiru n uṭerjem yellan di Mirida (Miksik), tenna-d: “M’ara nesselmad Adlis Iqedsen s tmayaţ, neţţarra-d s lexbaṛ belli yewεeṛ i cceεb n Maya ad fehmen kra n imeslayen. Ihi, nuɣal neţnadi a d-nesṭerjem s imeslayen i wulfen heddṛen-ten akteṛ.”

D acu i ţḥussun wid i geqqaren ṭrejmat-agi? A d-nebder di lemtel Elena i gheddṛen tatlabanikt seg wasmi i tella ţ-ţamecṭuḥt. Ṛebεin n sna neţţat tḥeddeṛ i inejmuεen n Inagan n Yahwa. Imi inejmuεen-agi ţwaxdamen s tesbenyulit, ur tfehhem acemma. Tenna-d: “Ẓriɣ kan belli ilaq-iyi ad ṛuḥeɣ ɣer inejmuεen.” Meεna, mbeεd mi tessexdem kra n tezmamin s tetlabanikt bac aţ-ţɣer Adlis Iqedsen, tuɣal tḥemmel Ṛebbi akteṛ, tbudd-as tudert-is terna teţwaɣḍeṣ di 2013. Tenna-d ɣer taggara: “Ţcekkiṛeɣ Yahwa imi i y-ifka tagniţ ad fehmeɣ Adlis Iqedsen.”