Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Tarbaεt n uṭerjem n tesbenyulit tegguǧ ɣer Sbenyul

Tarbaεt n uṭerjem n tesbenyulit tegguǧ ɣer Sbenyul

Yenna-d Σisa belli lexbaṛ n lxiṛ n Tgelda ad iţţubecceṛ di ddunit meṛṛa. (Matta 24:14) Si 1909 ar da, xilla si tezmamin ireṣṣan ɣef Wedlis Iqedsen i d-ssufɣen Inagan n Yahwa ţwaṭerjment-ed ɣer tesbenyulit; ayagi yeǧǧa lεibad n mkul lǧiha di ddunit ad slen i lexbaṛ n lxiṛ n Tgelda di lluɣa-nsen. Tasbenyulit d lluɣa tis snat i ţmeslayen akteṛ medden di ddunit mbeεd tacinwaţ. Azgen n umelyaṛ n yemdanen i gheddṛen tasbenyulit di ddunit.

William, yiwen si terbaεt n uṭerjem n tesbenyulit yenna-d: “Tasbenyulit d lluɣa tagraɣlant i ţmeslayen deg waṭas n tmura yemxallafen mliḥ di leεwayed. Neqsed a nḥaz ulawen n wid ara yeɣren ayen i d-nesṭerjim, ɣas ma yemxallaf wansi i d-kkan, sani i tessaweḍ tmusni-nsen d wamek i ţεicin.” Bac a d-yeḍru leqsed-a, tarbaεt-agi n uṭerjem llan deg-s ṭrejmanat i d-ikkan si Aṛjuntin, Kulumbya, Marikan, Gwatimala, Miksik, Burtu Riku, Ṣalbaduṛ, Urugway, Binizwila akk-d Sbenyul.

Deg waṭas n iseggasen, aṭerjem n tezmamin n Inagan n Yahwa ɣer tesbenyulit yella yeţwaxdam di Marikan, s lemεawna n ṭrejmanat yellan d Inagan yeţεicin di Aṛjuntin, di Miksik akk-d Sbenyul. Meεna di 1993 iεeggalen n terbaεt-agi n uṭerjem mlalen meṛṛa ɣer yiwen wemkan di Burtu Riku, bac ad xedmen jmiε.

Di meɣres 2012, yeţwaṭṭef leqrar d akken tarbaεt-agi n uṭerjem n tesbenyulit aţ-ţeggaǧ. Tikkelt-agi aţ-ţṛuḥ ɣer lbiru aɣelnaw n Inagan n Yahwa yellan di Sbenyul. Edward yeḥka-d: “Mačči kan d iεeggalen n terbaεt-agi iɣef i glaq ad ggaǧen. Newwi yid-neɣ daɣen lqecc-nneɣ akk-d dduzan n lbiru-nneɣ. Yerna mačči d aya kan. Negla ula s yiwen n “uεeggal” nniḍen yesεan amkan-is di leqdic: tamkarḍit-nneɣ.” Llant di temkarḍit-agi wazal n 2 500 n tektabin yesεan azal d ameqran, gar-asent timeyyatin n ṭrejmat n Wedlis Iqedsen s tesbenyulit.

Tarbaεt n uṭerjem steṛḥben yis akken ilaq di Sbenyul.

Ass n 29 maggu 2013, wwḍen iεeggalen n leqdic n uṭerjem n tesbenyulit ɣer wexxam-nsen ajdid yerna steṛḥben yis-sen s leḥṛaṛa iεeggalen n lbiru aɣelnaw n Inagan n Sbenyul. Am ṭrejmanat, am tektabin am dduzan nniḍen zegren-d meṛṛa i lebḥeṛ n Aṭlantik. Meεna imi iεeggalen n terbaεt-agi ssewǧden iman-nsen akken ilaq yerna fkan leεtab i yiman-nsen, wid i geqqaren tizmamin i d-ssufuɣen Inagan s tesbenyulit ur faqen ara belli yeḥbes uṭerjem. Yenna-d daɣen Edward: “Ayen akk yesεan azal d lexbaṛ n Tgelda. Nebɣa ad yaweḍ lexbaṛ-agi amur ameqran n wid yeţmeslayen tasbenyulit.”