Acḥal n lesnin aya i ţεayaren medden Inagan n Yahwa imi ur qebblen ara timerna n idammen. Inagan ţţagin timerna n idammen εlaǧal n lameṛ n Wedlis Iqedsen i d-yennan: “Aţ-ţexḍum [...] i idammen.” (Lecɣal 15:29) Leqrar-agi i ṭṭfen ur t-qebblen ara tikwal kra n imejjayen (ṭṭebba) axaṭer ɣilen ayagi ur yenfiε ara imuḍan-nsen.

Acu kan, ger wid ixeddmen deg wayen icudden ɣer ṣṣeḥḥa, simmal ţţilin ṭṭebba yessnen i geţweṣṣin wiyaḍ ad rren ddehn-nsen ɣer ssebbat iɣef i glaq ad ssexdmen ţţawilat n udawi mebla timerna n idammen.

Di tefsut 2013, Aɣerbaz n imejjayen n tesdawit n Sṭanfurd (Stanford Medicine Magazine) yessefhem-ed, deg yiwet si tesɣunin i d-issufuɣ, aṭas n leḥwayeǧ ɣef idammen. Yiwen weḥric seg-s yeţţusemma: “Uɣalen waman d asawen: Ayɣer i la tneqqes tmerna n idammen?” Tin i d-yuran ayagi, Sarah Williams, tenna-d: “Di εecṛa iseggasen-a ineggura, xilla seg imusnawen i d-ibeggnen belli di ssbiṭarat n ddunit meṛṛa, zgan ssexdamen idammen yerna akteṛ n wayen i glaqen bac ad dawin imuḍan, ama di tzeqqa n ubaṛasyun ama di texxamin n imuḍan.”

Tamyarut-agi tebder-ed imeslayen n tmusnawt Patricia Ford, i gesbedden yerna i geţwellihen lbiru i gqeddcen i lmend n udawi mebla timerna n idammen di ssbiṭar n Bansilbanya, i d-yennan: “Axemmim-agi i d-yeqqaren belli lεibad ad mmten ma yella xuṣṣen-ten kra n idammen neɣ idammen d ţţawil ifazen bac ad menεen lεibad si lmut, d axemmim i gesεan aẓar lqayen deg wayen i lemmden imejjayen. [...] Ayagi yezmer a d-iban d ṣṣeḥ di kra n liḥalat; * meεna, deg wayen yeεnan amur ameqran n imuḍan akk-d umur ameqran n liḥalat, annect-a d lekdeb.”

Tamusnawt Ford, i geţdawin azal n 700 Inagan n Yahwa mkul aseggas, terna tenna-d ayagi: “Xilla n ṭṭebba umi i hedṛeɣ [...] ɣilen belli aṭas n imuḍan ur neţţizmir ara ad ddren ma yella ur sen-ţţunefken ara idammen; deg wannect-a ɣelḍen. Nekk s yiman-iw akka i lliɣ ţxemmimeɣ kra n lweqt. Meεna, ur εeṭṭleɣ ara rriɣ-d s lexbaṛ belli nezmer a ndawi imuḍan-agi s kra n ţţawilat nniḍen isehlen i usexdem.”

Di ɣuct 2012, tasɣunt yeţţusemman Archives of Internal Medicine tehdeṛ-ed ɣef wayen i d-ufan imusnawen, di lmudda n 28 n sna, ɣef imuḍan i gxedmen abaṛasyun n wul deg yiwen n ssbiṭar. Inagan n Yahwa ḥellun bihfih, xiṛ n imuḍan i gesεan lehlak am nutni, iwumi i ţţunefken idammen. Inagan ur nṭerren ara mi llan di ssbiṭar annect n wid iwumi i rnan idammen. Leḥsab n Inagan i gselken si lmut ama mbeεd kan abaṛasyun ama 20 n sna ɣer zdat, yugar s waṭas leḥsab n wid umi ţţunefken idammen.

Yura deg weɣmis yeţţusemman Wall Street Journal n 8 yebrir 2013: “Abaṛasyun mebla timerna n idammen yesεa xilla n lesnin aya segmi yeţwaxdam i imuḍan yugin ad rnun idammen εlaǧal n ddin-nsen. Ass-a, ccɣel-agi simmal yeţwaxdam di ssbiṭarat [...]. Ṭṭebba i gextaṛen ad xeddmen abaṛasyun mebla timerna n idammen qqaren-d belli ccɣel-agi yessenqas ameṣruf n tiɣin n idammen, n usexzen-nsen, n udawi yis-sen, n uεeyyeṛ akk-d tmerna-nsen [i umuḍin]; yessenqas daɣen lemḍerra i tezmer a d-tawi tmerna n idammen, am lehlakat nniḍen, i gteṭṭfen imuḍan di ssbiṭar xilla n lweqt.”

Robert Lorenz d amḍebber ɣef usexdem n idammen deg yiwen wexxam n udawi n temdint n Klibland. Ur ilaq ara a newhem imi d-yenna: “Di tazwara, yeţban-aɣ-d amzun la neţεawan amuḍin-nni mi s-neţţarra idammen [...] meεna ɣer zdat, neţţaf belli d lemḍerra i s-nerna.”

^ § 5 Bac aţ-ţeẓreḍ acu i ţxemmimen Inagan n Yahwa ɣef idammen, wali amagrad yeţţusemman “Isteqsiyen i d-iţţuɣalen dima: Acuɣer i teţţagim timerna n idammen?