არჩეულ მასალაზე გადასვლა

დამატებით მენიუზე გადასვლა

სარჩევზე გადასვლა

იეჰოვას მოწმეები

ქართული

ბიბლიური მოთხრობები

 მოთხრობა 85

იესო ბოსელში დაიბადა

იესო ბოსელში დაიბადა

იცი, ვინ არის ეს პატარა? მართალია, იესოა. ის ბოსელში დაიბადა. ბოსელი ცხოველების სადგომია. მარიამმა იესო ბაგაში ჩააწვინა. ეს ის ადგილია, სადაც ცხოველებს საჭმელს უყრიან. მაგრამ რატომ არიან მარიამი და იოსები ცხოველების სადგომში? იქ ხომ ბავშვის გაჩენა არ შეიძლება!

მაშ, რატომ იყვნენ ისინი ბოსელში? რომის მმართველმა, კეისარმა ავგუსტუსმა ბრძანება გამოსცა, რომ აღწერის გამო ყველა იმ ქალაქში წასულიყო, სადაც დაიბადნენ. იოსები ბეთლემში იყო დაბადებული. მაგრამ იოსებმა და მარიამმა იქ ღამის გასათევი ვერ იპოვეს. ამიტომ ბოსელს შეაფარეს თავი. სწორედ ამ დღეს ეყოლა მარიამს იესო! მაგრამ, როგორც სურათზე ხედავ, ბავშვი კარგად არის.

შეხედე სურათს, მწყემსები იესოს სანახავად მივიდნენ. ღამით ისინი მინდორში ფარას დარაჯობდნენ, როცა იქაურობა განათდა. ეს ანგელოზი იყო. მწყემსებს ძალიან შეეშინდათ. ანგელოზმა დაამშვიდა ისინი: ‘ნუ გეშინიათ, კარგი ამბავი უნდა გითხრათ. დღეს ბეთლემში უფალი ქრისტე დაიბადა. ის გადაარჩენს ხალხს! ჩვილს სახვევებში გახვეულსა და ბაგაში მწოლიარეს იპოვით’. უეცრად გამოჩნდა უამრავი ანგელოზი, რომლებიც ღმერთს განადიდებდნენ. მწყემსები მაშინვე გაეშურნენ იესოს სანახავად და იპოვეს კიდეც ის.

იცი, რატომ არის იესო განსაკუთრებული? იცი, სინამდვილეში ვინ არის ის? გახსოვს, ამ წიგნის პირველ მოთხრობაში ღვთის პირველ ძეზე ვისაუბრეთ. ის იეჰოვასთან ერთად ქმნიდა ზეცას, დედამიწასა და ყოველივეს. ახლა შენ უკვე იცი, ვინ არის იესო.

იეჰოვამ იესოს სიცოცხლე ზეციდან მარიამის საშვილოსნოში გადაიტანა. თუმცა ის ღვთის ძე იყო, მისი განვითარება სწორედ ისე მიმდინარეობდა, როგორც ეს სხვა ჩვეულებრივი ბავშვის შემთხვევაში ხდება. ბოლოს იესო ბეთლემში დაიბადა. ხვდები, რატომ უხაროდა ანგელოზს, როცა ხალხს იესოს დაბადების შესახებ აუწყებდა?

გაიგეთ მეტი

პასუხები ბიბლიურ კითხვებზე

როდის დაიბადა იესო?

გაიგეთ, რატომ აღნიშნავენ შობას 25 დეკემბერს.