წვდომის პარამეტრები

Search

აირჩიეთ ენა

დამატებით მენიუზე გადასვლა

სარჩევზე გადასვლა

არჩეულ მასალაზე გადასვლა

იეჰოვას მოწმეები

ქართული

ბიბლიური მოთხრობები

 მოთხრობა 30

ცეცხლმოკიდებული ბუჩქი

ცეცხლმოკიდებული ბუჩქი

ცხვრისთვის საძოვრების ძებნისას მოსე ხორების მთას მიადგა. მან დაინახა ცეცხლმოკიდებული ბუჩქი, რომელიც არ იწვოდა!

‘უცნაურია, — გაიფიქრა მოსემ. — მივალ და ახლოდან ვნახავ’. როცა ბუჩქს მიუახლოვდა, ხმა მოესმა: ‘ახლოს ნუ მოხვალ. ფეხზე გაიხადე სანდლები, რადგან წმინდა მიწაზე დგახარ’. ღმერთი ანგელოზის მეშვეობით ელაპარაკებოდა მოსეს, ამიტომ მან სახე დაიფარა.

ღმერთმა უთხრა: ‘ვიხილე ჩემი ხალხის ჩაგვრა ეგვიპტეში. გავათავისუფლებ მათ მონობიდან და შენ გგზავნი ეგვიპტიდან მათ გამოსაყვანად’. იეჰოვას სურდა, თავისი ხალხი ქანაანის მშვენიერ მიწაზე დაესახლებინა.

მოსემ მიუგო: ‘მე ვინა ვარ, რომ ეს გავაკეთო?! მაგრამ დავუშვათ, წავედი. როცა ისრაელები მკითხავენ, ვინ გამოგგზავნაო, რა ვუპასუხო?’

‘აი რა უნდა უპასუხო, — უთხრა ღმერთმა. — იეჰოვამ, აბრაამის, ისაკისა და იაკობის ღმერთმა გამომგზავნა-თქო თქვენთან’. შემდეგ დასძინა: ‘ეს არის ჩემი სახელი მარადიულად’.

‘დავუშვათ, არ დამიჯერეს, რომ შენ გამაგზავნე’, — მიუგო მოსემ.

‘რა გიჭირავს ხელში?’ — ჰკითხა ღმერთმა.

‘ჯოხი’, — უპასუხა მოსემ.

‘დააგდე მიწაზე’, — უთხრა ღმერთმა. მიწაზე დაგდებული ჯოხი გველად იქცა. იეჰოვამ სხვა სასწაულიც უჩვენა მოსეს. ‘უბეში ჩაიყავი ხელი’, — უთხრა ღმერთმა. მოსე ასეც მოიქცა და, როცა უბიდან ხელი ამოიღო, თოვლივით თეთრი ჰქონდა! ხელზე კეთრი მოსდებოდა. იეჰოვამ მესამე სასწაულის მოხდენის ძალაც მისცა მოსეს. ბოლოს კი უთხრა: ‘როცა ისრაელები ამ სასწაულებს ნახავენ, დაგიჯერებენ, რომ მე გაგაგზავნე’.

მოსე სახლში დაბრუნდა და ითროს უთხრა: ‘წავალ, ნათესავებს მოვინახულებ ეგვიპტეში’. ითრო დაემშვიდობა მოსეს და ისიც ეგვიპტის გზას დაადგა.