არჩეულ მასალაზე გადასვლა

დამატებით მენიუზე გადასვლა

სარჩევზე გადასვლა

იეჰოვას მოწმეები

ქართული

თქვენი ოჯახის ბედნიერება თქვენს ხელთაა!

 ნაწილი 4

როგორ ვხარჯოთ ყაირათიანად

როგორ ვხარჯოთ ყაირათიანად

„გეგმები რჩევით განმტკიცდება“ (იგავები 20:18).

ოჯახური საჭიროებებისთვის ფული ყველას გვჭირდება (იგავები 30:8). ბიბლიაშიც ვკითხულობთ, რომ ფული იცავს კაცს (ეკლესიასტე 7:12). შეიძლება გიჭირთ ფინანსებზე საუბარი, მაგრამ არ დაუშვათ, რომ ფულის გამო ოჯახში პრობლემები შეგექმნათ (ეფესოელები 4:32). ცოლ-ქმარი ერთმანეთს უნდა ენდობოდეს და ფულის ხარჯვისას ერთმანეთთან თანამშრომლობდეს.

 1 დაგეგმეთ

ბიბლიის თვალსაზრისი: „რომელიმე თქვენგანმა კოშკის აშენება რომ მოისურვოს, განა ჯერ არ დაჯდება და არ გამოთვლის ხარჯებს, რომ ნახოს, აქვს თუ არა საკმარისი სახსრები მის დასამთავრებლად?“ (ლუკა 14:28). ძალიან მნიშვნელოვანია, ერთად დაგეგმოთ, რაში დახარჯავთ ფულს (ამოსი 3:3). ერთად გადაწყვიტეთ, რა გჭირდებათ და რამდენის დახარჯვა შეგიძლიათ (იგავები 31:16). თუ ჯიბეში ფული გაქვთ, ეს იმას არ ნიშნავს, რომ მაინცდამაინც უნდა დახარჯოთ. ვალი არ დაიდოთ; მხოლოდ ის თანხა დახარჯეთ, რაც ხელთ გაქვთ (იგავები 21:5; 22:7).

როგორ უნდა მოიქცეთ:

  • თუ თვის ბოლოს თანხა მოგრჩებათ, ერთად იმსჯელეთ, რაში გამოიყენებთ.

  • თუ ფინანსურად გიჭირთ, ხარჯების შესამცირებლად კონკრეტული გეგმა შეადგინეთ. მაგალითად, კაფეში ან რესტორანში ჭამის ნაცვლად, სახლში მომზადებული კერძები მიირთვით.

 2 იყავით გულწრფელი და რეალისტი

ბიბლიის თვალსაზრისი: „მხოლოდ იეჰოვას წინაშე კი არ ვაკეთებთ ყველაფერს პატიოსნად, არამედ ადამიანთა წინაშეც“ (2 კორინთელები 8:21). იყავით გულწრფელი და არ დაუმალოთ თქვენს მეორე ნახევარს, თუ რამდენს გამოიმუშავებთ და რამდენს ხარჯავთ.

სანამ რაიმე მნიშვნელოვანს შეიძენთ, გაიგეთ მეუღლის აზრი (იგავები 13:10). თუ ბიუჯეტს ერთად განკარგავთ, მეუღლესთან მშვიდობას შეინარჩუნებთ. გახსოვდეთ, რომ თქვენი შემოსავალი არა მხოლოდ პირადი, არამედ ოჯახის შემოსავალია (1 ტიმოთე 5:8).

როგორ უნდა მოიქცეთ:

  • შეთანხმდით, რა რაოდენობის თანხის დახარჯვა შეგიძლიათ წინასწარი შეთანხმების გარეშე.

  • ფულზე მანამდე ისაუბრეთ, ვიდრე პრობლემა იჩენს თავს.