ბიბლია გვპასუხობს

იმისათვის, რომ ვიცოდეთ, როდის მოვა ქვეყნიერების აღსასრული, აუცილებელია გვესმოდეს, რა იგულისხმება „ქვეყნიერებაში“, რომელზეც ბიბლია საუბრობს. ბერძნული სიტყვა კოსმოს,  ჩვეულებრივ, ქვეყნიერებად ითარგმნება; მასში უმეტესწილად იგულისხმება კაცობრიობა, რომელიც არ ცხოვრობს ღვთის ნების თანახმად (იოანე 15:18, 19; 2 პეტრე 2:5). ზოგ შემთხვევაში სიტყვა კოსმოს შეიძლება გულისხმობდეს გარკვეულ სისტემას ან წყობას (1 კორინთელები 7:31; 1 იოანე 2:15, 16). *

რა არის „ქვეყნიერების აღსასრული“?

ფრაზა „ქვეყნიერების აღსასრული“, რომელიც ბიბლიის სხვადასხვა თარგმანებში გვხვდება, შეიძლება აგრეთვე ითარგმნოს, როგორც „ქვეყნიერების წყობის აღსასრული“ ან „საუკუნის დასასრული“ (მათე 24:3, სსგ). მასში დედამიწისა და ყველა ადამიანის განადგურება კი არ იგულისხმება, არამედ გარკვეული სისტემისა და წყობის (1 იოანე 2:17).

ბიბლიიდან ვიგებთ, რომ „ბოროტმოქმედნი მოისპობიან“, რაც საშუალებას მისცემს მართლებს, გაიხარონ დედამიწაზე ცხოვრებით (ფსალმუნი 37:9—11). ბოროტები განადგურდებიან არმაგედონში, რომელიც „დიდი გასაჭირის“ კულმინაცია იქნება (მათე 24:21, 22; გამოცხადება 16:14, 16).

როდის განადგურდება ქვეყნიერება?

ამის შესახებ იესომ თქვა: „იმ დღესა და საათზე კი მამის გარდა არავინ იცის: არც ზეციერმა ანგელოზებმა და არც ძემ“ (მათე 24:36, 42). იესომ ისიც აღნიშნა, რომ ეს დღე მოულოდნელად დადგებოდა. მან თქვა: „რომელ საათზეც არ ფიქრობთ, სწორედ მაშინ მოვა კაცის ძე“ (მათე 24:44).

მართალია, არ ვიცით ზუსტი დღე და საათი, მაგრამ იესომ აღწერა „ნიშანი“, რომელიც ერთდროულად ბევრ მოვლენას მოიცავს და ქვეყნიერების აღსასრულის მოახლოებაზე მიუთითებს (მათე 24:3, 7—14). ბიბლია დროის ამ მონაკვეთს „უკანასკნელ დროს“ და „ბოლო დღეებს“ უწოდებს (დანიელი 12:4; 2 ტიმოთე 3:1—5).

გადაურჩება რამე ქვეყნიერების აღსასრულს?

დიახ. დედამიწა არ განადგურდება, რადგან ბიბლია ამბობს, რომ ის „არ მოირყევა მარადიულად, სამარადისოდ“ (ფსალმუნი 104:5). ის ადამიანებით აივსება, როგორც ამას ბიბლია გვპირდება: „მართლები დაიმკვიდრებენ დედამიწას და მარადიულად იცხოვრებენ მასზე“ (ფსალმუნი 37:29). ღმერთი შეასრულებს თავის განზრახვას და ხალხს ისეთ პირობებს შეუქმნის, როგორშიც პირველი ადამიანები ცხოვრობდნენ:

^ აბზ. 3 ბერძნული სიტყვა ეონ ბიბლიის ზოგიერთ თარგმანში „ქვეყნიერებად“ არის გადმოტანილი. ასეთ შემთხვევებში ეონ ძალიან ჰგავს ბერძნულ სიტყვა კოსმოსს და ნიშნავს გარკვეულ სისტემას ან წყობას.