„დიდი ქალაქის მაცხოვრებლები უფრო აგრესიულად რეაგირებენ სტრესულ სიტუაციებზე, ვიდრე პატარა ქალაქში მცხოვრებნი,“ — ნათქვამია პოლონეთში გამომავალ ჟურნალ „პშეკრუიში“. „დიდ ქალაქებში სტრესის გამომწვევი უამრავი მიზეზი არსებობს, — ამბობს ვარშავის ფსიქო-ლაბორატორიული კვლევის ფსიქოთერაპევტი მიეჟისლავ ჟასკულსკი. — გარეუბნებთან შედარებით დიდ ქალაქებში 21%-ით მეტია ნერვული შეტევების რიცხვი, ემოციური მოშლილობა კი 39%-ით მეტს აღენიშნება“. რის გაკეთება შეუძლიათ ქალაქში მცხოვრებლებს სტრესის შესამცირებლად? ჟურნალი „პშეკრუი“ გვირჩევს: „ნუ გაღიზიანდები იმაზე, რასაც ვეღარ შეცვლი“, „სახლში მოსული, ისევ სამუშაოზე ნუღარ იფიქრებ“, „ისეირნე“, „შვებულების აღების ნუ მოგერიდება“.

ავსტრიაში მცხოვრები იურიდიული ფაკულტეტის ერთი სტუდენტი უკვე სამი წელია, რაც „ფეისბუქზეა“ დარეგისტრირებული. მას აინტერესებდა, ამ დროის განმავლობაში, რა რაოდენობის ინფორმაცია იყო დაგროვილი მასზე მსოფლიოში ამ უმსხვილეს სოციალურ ქსელში. ამიტომ მოითხოვა მის მიერ შეტანილი ინფორმაციის მონაცემები. მან „ფეისბუქისგან“ მიიღო CD-დისკი, რომელიც შეიცავდა 1 222-გვერდიან მონაცემებს. გერმანიაში გამომავალ ერთ-ერთ გაზეთში ეს სტუდენტი აღნიშნავს: „ყველაფერი — ყოველი მესიჯი, ყოველი საუბარი, მეგობრებზე საიდუმლო ინფორმაციაც კი შენახული იყო“. მათ შორის იყო ინფორმაციაც, რომელიც მისი აზრით განადგურებული უნდა ყოფილიყო.