მატიანე — წიგნი პირველი 14:1—17
14 ტვიროსის მეფე ხირამმა+ მაცნეები გაუგზავნა დავითს, აგრეთვე კედრის მორები, კალატოზები და დურგლები მისთვის სასახლის ასაშენებლად.+
2 მიხვდა დავითი, რომ იეჰოვამ განამტკიცა მისი მეფობა ისრაელში,+ რადგან დიდად აღაზევა იგი თავისი ხალხის, ისრაელის გულისთვის.+
3 იერუსალიმშიც მოიყვანა დავითმა ცოლები+ და კიდევ შეეძინა ვაჟები და ასულები.+
4 იერუსალიმში მას შეეძინა:+ შამუა, შობაბი, ნათანი,+ სოლომონი,+
5 იბხარი, ელიშუა, ელფელეტი,
6 ნოგა, ნეფეგი, იაფია,
7 ელიშამა, ბეელიადა და ელიფელეტი.
8 გაიგეს ფილისტიმელებმა, რომ ისრაელის მეფედ სცხეს დავითი+ და წავიდნენ მასთან შესაბრძოლებლად.+ როცა დავითმა ეს ამბავი შეიტყო, მათთან საბრძოლველად გაემართა.
9 მოვიდნენ ფილისტიმელები და რეფაიმის ველზე დაიწყეს თარეში.+
10 დაეკითხა დავითი ღმერთს: „შევებრძოლო ფილისტიმელებს? ჩამიგდებ მათ ხელში?“ იეჰოვამ მიუგო: „შეებრძოლე, ხელში ჩაგიგდებ მათ!“+
11 მივიდა დავითი ბაალ-ფერაციმში+ და გაანადგურა ისინი. მაშინ თქვა დავითმა, ღმერთმა ისე გაარღვია ჩემი ხელით ჩემი მტრის რიგები, როგორც წყალი არღვევსო ზღუდეს. ამიტომაც უწოდეს იმ ადგილს ბაალ-ფერაციმი*.
12 იქ დატოვეს ფილისტიმელებმა თავიანთი კერპები, დავითის ხალხმა კი მისი ბრძანებით ცეცხლს მისცა ისინი.+
13 მოგვიანებით კვლავ გავიდნენ ფილისტიმელები სათარეშოდ იმავე ველზე.+
14 ისევ დაეკითხა დავითი ღმერთს, ღმერთმა კი მიუგო: „პირისპირ ნუ შეებმები, ზურგიდან მოუარე და ბაქა-ბუჩქებთან* დაესხი თავს.+
15 როცა ბაქა-ბუჩქების კენწეროებიდან ისეთი ხმა შემოგესმება, თითქოს ლაშქარი მოდისო, მაშინვე შეუტიე, რადგან ღმერთი წაგიძღვება ფილისტიმელთა ლაშქრის გასანადგურებლად“.+
16 დავითიც ღვთის ბრძანებისამებრ მოიქცა+ და გაბაონიდან გეზერამდე+ მუსრავდა ფილისტიმელთა ჯარს.
17 საქვეყნოდ გაითქვა სახელი დავითმა და იეჰოვამ ყველა ერს მისი შიში მოჰგვარა.+
