მოციქულთა საქმეები 3:1—26
3 ერთხელ პეტრე და იოანე მეცხრე საათისთვის*, ლოცვის საათისთვის, ტაძარში წავიდნენ.
2 იმ დროს იქ ერთი კაცი მიიყვანეს, დაბადებიდან წელსქვემოთ მოწყვეტილი. მას მოწყალების სათხოვნელად ყოველდღე სვამდნენ ტაძრის იმ კარიბჭესთან, რომელსაც „მშვენიერი“ ეწოდება.
3 მან თვალი მოჰკრა პეტრესა და იოანეს, რომლებიც ტაძარში შედიოდნენ, და სთხოვა, მოწყალება გაეღოთ.
4 პეტრემ და იოანემ შეხედეს მას; პეტრემ უთხრა: „შემოგვხედე“.
5 მანაც იმ იმედით შეხედა მათ, რომ რამეს მისცემდნენ.
6 პეტრემ უთხრა: „ვერცხლი და ოქრო არა მაქვს, მაგრამ რაც მაქვს, იმას მოგცემ; ნაზარეთელი იესო ქრისტეს სახელით გეუბნები: იარე!“+
7 მერე პეტრემ ხელი მარჯვენა ხელზე ჩასჭიდა და წამოაყენა.+ კაცს უეცრად გაუმაგრდა ტერფები და კოჭები;+
8 წამოხტა,+ სიარული დაიწყო და მათთან ერთად შევიდა ტაძარში. დადიოდა, ხტოდა და ღმერთს ხოტბას ასხამდა.
9 ყველამ დაინახა, რომ დადიოდა და ღმერთს განადიდებდა.
10 მიხვდნენ, რომ ეს ის კაცი იყო, რომელიც ტაძრის იმ კარიბჭესთან იჯდა, „მშვენიერი“ რომ ეწოდება,+ და მოწყალებას ითხოვდა ხოლმე. განცვიფრებულნი იყვნენ მისი გამოჯანმრთელებით და აღტაცებას ვერ მალავდნენ.
11 რაკი ის კაცი პეტრესა და იოანეს არ სცილდებოდა, განცვიფრებული ხალხი მათკენ გაიქცა, სოლომონის სვეტებიანი დერეფნისკენ.+
12 პეტრემ ხალხი რომ დაინახა, მიმართა: «ისრაელებო, რა გიკვირთ ან რატომ გვიყურებთ ასე? გგონიათ, მან სიარული ჩვენი ძალით ან ღვთისადმი ჩვენი ერთგულების გამო დაიწყო?!
13 აბრაამის, ისაკისა და იაკობის ღმერთმა,+ ჩვენი მამა-პაპის ღმერთმა, განადიდა თავისი მსახური+ იესო,+ რომელიც თქვენ მოსაკლავად გაიმეტეთ+ და პილატეს წინაშე უარყავით, არადა, მას მისი გათავისუფლება ჰქონდა გადაწყვეტილი.
14 თქვენ უარყავით წმინდა და მართალი კაცი; მკვლელის გათავისუფლება მოითხოვეთ,+
15 სიცოცხლის მეთაური კი მოკალით,+ მაგრამ ღმერთმა მკვდრეთით აღადგინა იგი, რისი მოწმენიც ვართ.+
16 ეს კაცი, რომელსაც ხედავთ და იცნობთ, იესოს სახელმა და ამ სახელისადმი ჩვენმა რწმენამ გააძლიერა და ამავე რწმენამ გამოაჯანმრთელა თქვენ თვალწინ.
17 ძმებო, ვიცი, რომ არც თქვენ და არც თქვენმა მმართველებმა არ იცოდით,+ რას აკეთებდით,+
18 მაგრამ ამით ღმერთმა შეასრულა ის, რაც წინასწარმეტყველთა პირით ჰქონდა ნათქვამი, რომ მისი ცხებული* დაიტანჯებოდა.+
19 ამიტომ მოინანიეთ+ და მობრუნდით,+ რათა წაიშალოს თქვენი ცოდვები,+ გამოგაცოცხლოთ იეჰოვამ*
20 და გამოგზავნოს თქვენთვის დანიშნული ქრისტე, იესო.
21 მან, ზეცაში მყოფმა, უნდა მოიცადოს, სანამ არ აღდგება ყველაფერი, რაზეც ღმერთი ძველ დროს თავის წმინდა წინასწარმეტყველთა პირით ლაპარაკობდა.
22 მოსემ თქვა: „იეჰოვა*, თქვენი ღმერთი, თქვენს მოძმეთაგან მოგივლენთ ჩემნაირ წინასწარმეტყველს;+ ყურად იღეთ ყველაფერი, რასაც ის გეტყვით.+
23 ვინც იმ წინასწარმეტყველს არ მოუსმენს, ამოიძირკვება თავისი ხალხიდან“.+
24 სამუელიდან მოყოლებული ყველა წინასწარმეტყველი, ვინც წინასწარმეტყველებდა, ცხადად აუწყებდა ამ დროის შესახებ.+
25 თქვენ ხართ წინასწარმეტყველთა და იმ შეთანხმების მემკვიდრეები, რომელიც ღმერთმა თქვენს მამა-პაპას დაუდო;+ მან აბრაამს უთხრა: „შენი შთამომავლის მეშვეობით იკურთხება დედამიწაზე ყველა ოჯახი“.+
26 როცა ღმერთმა თავისი მსახური დანიშნა, პირველად ის თქვენ გამოგიგზავნათ,+ რომ ეკურთხებინა თითოეული თქვენგანი და მოებრუნებინა ბოროტი გზიდან».
