გამოსვლა 31:1—18
31 იეჰოვამ მოსეს უთხრა:
2 „შევარჩიე ბეცალელი,+ ურის ვაჟი, ხურის შვილიშვილი, იუდას ტომიდან.+
3 ავავსებ მას ჩემი სულით, მივცემ სიბრძნესა და გონიერებას, აგრეთვე ცოდნას, რომ ფლობდეს ნებისმიერ ხელობას,
4 მოუხმოს შემოქმედებით უნარს და იმუშაოს ოქროზე, ვერცხლზე, სპილენძზე,
5 ქვების დამუშავებასა და ჩასმაზე,+ და დაამზადოს ხის ყოველგვარი ნაკეთობა.+
6 დამხმარედ ეყოლება ოჰოლიაბი,+ ახისამაქის ვაჟი დანის ტომიდან. ყველას, ვისაც მარჯვე ხელი აქვს*, გულში ჩავუდებ სიბრძნეს, რათა გააკეთონ ყველაფერი, რაც გითხარი:+
7 შეხვედრის კარავი,+ მოწმობის კიდობანი+ და მისი სახურავი,+ კარვის მთელი მოწყობილობა,
8 მაგიდა+ და მისი მოწყობილობა, ხალასი ოქროს სალამპრე და მთელი მისი მოწყობილობა,+ საკმევლის სამსხვერპლო,+
9 დასაწვავი შესაწირავის სამსხვერპლო+ და მთელი მისი მოწყობილობა, აუზი და მისი სადგამი,+
10 ნაქსოვი სამოსელი, აარონ მღვდლის წმინდა სამოსელი, მისი ვაჟების სამღვდელო სამოსელი,+
11 საცხები ზეთი და სურნელოვანი საკმეველი წმინდა ადგილისთვის.+ ყველაფერი ისე უნდა გააკეთონ, როგორც გითხარი“.
12 შემდეგ იეჰოვამ მოსეს უთხრა:
13 «გადაეცი ისრაელებს: „ზედმიწევნით დაიცავით ჩემი შაბათები,+ რადგან ეს არის ნიშანი თქვენ და ჩემ შორის თაობიდან თაობამდე, რათა იცოდეთ, რომ მე, იეჰოვა, თქვენი განმწმენდელი ვარ.
14 დაიცავით შაბათი, რადგან ის წმინდაა თქვენთვის.+ ვინც შაბათს შებღალავს, არ აცოცხლოთ. თუ იმ დღეს ვინმე იმუშავებს, უნდა მოკვდეს.+
15 ექვსი დღე შეგიძლიათ აკეთოთ საქმე, მეშვიდე დღე კი დასვენების შაბათია.+ ის წმინდაა იეჰოვასთვის. ვინც შაბათ დღეს იმუშავებს, უნდა მოკვდეს.
16 დაიცვან ისრაელებმა შაბათი; მათ შაბათი თაობიდან თაობამდე უნდა დაიცვან. ეს არის მარადიული შეთანხმება.
17 ეს არის სამარადისო ნიშანი ისრაელებსა და ჩემ შორის,+ რადგან ექვს დღეში შექმნა იეჰოვამ ცა და დედამიწა, მეშვიდე დღეს კი დაასრულა მუშაობა და დაისვენა“».+
18 დაამთავრა თუ არა ღმერთმა მოსესთან ლაპარაკი სინაის მთაზე, მისცა მას ქვის ფილები, მოწმობის ორი ფილა,+ რომლებზეც ღვთის თითით იყო ნაწერი.+
სქოლიოები
^ სიტყვასიტყვით — „ვინც გულით ბრძენია“.
