Hanenty ty anatiny ao

Ho amy fizarà anatiny any

Vavolombelo Jehovah

Vezo

Video Mahafalifaly Fo

Video Mahafalifaly Fo

Lafa baka nanenty ty video hoe “Minamà Amy Jehovah” ty baba raiky, le hoy ty asany: “Hita Jehovah vatany ty raha am-po ty baba noho reny ao.”

Nampiboaky video maromaro mikasiky any Kaleba noho ty fianakaviany ty Vavolombelo Jehovah, tafara ty niboaha video voalohany rey. Fa amy jw.org atoa henanizao, video mampianatsy ty ajà ho soa toetsy noho hanao raha tea Ndranahary reo. Ampianary mba tsy hangalatsy noho hahay hivavaky ohatsy ty ajà amy video sisany.

Fa misy amy safà 131 video roe voalohany rey henanizao, ka mahasoa ajà maro amy tany toy iaby.

Maro ty olo tea azy

Ho zao ty nisoraty ty ampela raiky mana anaky limy: “Vo herinandro zay ty nahazoanay video hoe Ze Mijanjy Noho Maneky, ho Sambatsy Iha Laha Mety, fe fa in-50 teo ho eo zay ty nanenteanay azy.”

Mipetraky an’Angletera any Millie, 12 tao. Nana anadahy 15 tao kaihy hoe Thomas ie, le tsy salama say zokiny io. Hoy Millie: “Mana iPad misy videony Kaleba rey Thomas, ka azony atoro ty namany an-dakilasy any raha zay. Teany biby hira amy video ao rey le anoviny. Soasoa ty mijanjy azy mihira any raha rey. Tseriky avao aho manenty azy. Latsa-dranomaso rahavavy raiky zay lafa nijanjy azy nihira.”

Nivola Ava hoe 8 tao, noho 9 vola, voho 25 andro ie. Hoy ty asany: “Mahay mampianatsy ajà vatany Kaleba noho anabaviny iny.”

Nanoratsy koa Mikaylah hoe: “Eny tao aho. Misaotsy anareo nnome ty video hoe Ze Mijanjy Noho Maneky, ho Sambatsy Iha Laha Mety. Mampianatsy ahy video iny hoe mila manoriky ty safà babako amy reniko aho, satria zay ty tea Jehovah.”

Misy Ventiny

Nisy mpamaraky raiky tsy Vavolombelo Jehovah sady mpanao sary miay zay nanenty ty raiky amy video iny hoe Raty ty Mangalatsy. Tseriky ie nahita any video iny, sady vomaiky nitombo tsy hatserehany lafa nihainy hoe ekipa kelikely raiky misy olo vitsivitsy avao ro nampiboaky raha io. Hoy ty asany: ‘Mahay olo miasa amy trano famokara sary miay aho. Mieritseritsy aho kindraiky hoe mba olo manao akory loatsy miasa amy raha rey ao, raha mampihehy olo anaty ty lera vitsivitsy amy andro raiky avao ro iasàn-drozy mafy, le ie zay! Fa ty video aboakinareo, manova fiaina ty ajà, mampianatsy an-drozy hahay hanavaky ty soa noho ty raty, sady manampy azy handramby fanapahan-kevitsy soa. Misy ventiny ty raha ataonareo satria manampy olo.’

Maneky raha zay ty baba noho reny amy tany toy iaby. Nanoratsy ho zao ty ampela raiky: “Nanenty any video hoe Miezaha mba ho Nama Jehovah, Quinn, anakilahiko telo tao. Niandra nanenty ahy ie lafa nisasaky hira tamy video ao iny, sady nataony tan-tratrany eo ty tanany le hoe ty asany: ‘Mama a, falifaly ty foko manenty raha io.’ ”