Hanenty ty anatiny ao

Ho amy fizarà anatiny any

Vavolombelo Jehovah

Vezo

Baiboly Nalà Feo Misy Feon’olo Maro

Baiboly Nalà Feo Misy Feon’olo Maro

“Tena mahakinto raha io. Mampieritseritsy sady velombelo.”

“Atao raha tena ie mihintsy tantara resahini-Baiboly iny.”

“Soasoa biby! Fa reko avao ty tantara amy Baiboly ao, fa henanizao raha rey vo tena atao raha iainako mihintsy.”

Raha vitsivitsy amy raha volanin’olo mikasiky ty bokini-Matio nalà feo eo reo. Amy safà anglisy raha io, sady fa amy jw.org ao.

Tamy 1978 ty Vavolombeloni-Jehovah ro nanomboky nampiboaky Baiboly nalà feo. Naboaky tamy safà 20 ty iaby na ty tampany amy Baiboly nalà feo io, tafara tatoy.

Nampiboaky ty Fandikan-tenin’ny Tontolo Vaovao nihavaozy ty Vavolombeloni-Jehovah tamy 2013, ka nila nampoly nalà feo ndraiky ty Baiboly. Fe tsy olo telo manahaky ty taloha ro nalà feo tamy toy, fa olo maro biby. Manao ty feon’olo 1 000 mahery amy Baiboly ao reo rozy.

Tena soa ie misy feon’olo maro io, satria manjary azoni-mpijanjy an’eritseritsy ty tantara amy Baiboly ao. Marina aloha fa tsy manahaky ty tantara baka amy Baiboly janjiny raha io ka hoe misy moziky noho feon-draha hafa, fe sahala tena ie mihintsy raha io lafa misy feon’olo samby hafa.

Mila fandamina soa ty fanaova ani-asa io satria maro biby ty olo alà feo amy raha io. Mila ilà soa tse hoe ia ty mivola amy andinin-teny kiraidraiky, bakeo hentea ty hevitsy mila miboaky amy raha iny noho ty fihetseham-po teany haseho. Laha apostoly, ohatsy, ro mivola kanefa tsy voatono amy tantara iny ao ty anarany, le mila atao hay hoe feon’ia raha zay. Laha hita amy raha volaniny ohatsy hoe olo misalasala ro mivola, le mety hoe ze olo mpanao ty feoni-Tomasy ro ampanovy azy. Laha fivolanan’olo taitaitsy ie, le mety ze olo mpanao ty feoni-Petera ro ampanovy azy.

Mila hentea soa koa ty taon’olo mivola iny. Feon’olo tanora, ohatsy, ro ilà tamy apostoly Jaona mbo nitanora, fa feon’olo fa antitsy ro ampanovy azy lafa antitsy ie.

Olo mahay mamaky soa koa ro ilà. Tamy bironi-Sampani-Vavolombeloni-Jehovah a Etazonia any ro nifiliana ty ankamaroan-drozy. Nampanovy fanandrama tse rozy, le nivolany hanoma noho hamaky fehintsoratsy tamy gazety Mifohaza! Nampamakỳ safàn’olo mifampiresaky amy Baiboly ao koa rozy, ka nihentea laha tafaboakiny soa ty fihetseham-po amy raha iny, ohatsy hoe meloky, na malahelo, na falifaly, na kivy. Zay ro nahaiza hoe manao akory ty fahaizan’olo nampanovy fanandrama iny, le feon’ia ro tena mety aminy.

Alà feo amy studio a Brooklyn na Patterson na Wallkill any amy zay olo iny, lafa baka namea ty anjarany. Misy olo raiky fa natao ho mpanoro hevitsy, ka ie ro manenty laha mety soa ty feon’olo alà feo iny, sady laha tafaboakiny ty fihetseham-po amy raha iny. Samby mana ani-raha hovakỳ iny ty mpanoro hevitsy noho ty olo alà feo, sady misy toromariky amy raha iny ao hoe aia ro mieny noho ino ty mila hamafisy amy andinin-teny kiraidraiky. Mampiasa ani-Baiboly Fandikan-tenin’ny Tontolo Vaovao nalà feo taloha iny koa mpanoro hevitsy iny mba hahitany ty fomba fanaova ani-raha iny.

Amy fotoa fangalà feo iny avao ro anafaha ze feo tsy ilà. Mety hampolimpoly alà avao ty safà na fehezanteny sisany, ka ze soa marè ro tanjahy le atambatambatsy, mba hahavy ani-raha alà feo iny ho tena soa.

Mbo tsy hay hoe mbia vo ho vita iaby ty fangalà feo ani-Fandikan-tenin’ny Tontolo Vaovao nihavaozy tamy 2013 iny. Fe hatao amy jw.org ao ze boky vita, sady hisy sarini-fitaova fijanjina feo ty anilani-anarani-boky iny eo, amy pejy hoe “Books of the Bible.”