Hanenty ty anatiny ao

Ho amy fizarà anatiny any

Vavolombelo Jehovah

Vezo

Bokikely amy Safà Maro Sady Feno Sary

Bokikely amy Safà Maro Sady Feno Sary

Mipetraky a Mongolia any ty ampela raiky kaihy hoe Odval. Tsy hainy soa ty tena taony, fe sabosabony tamy 1921 hoy ie ro nateraky. Mbo kelikely ie le fa nihary, sady tao raiky avao ty nandiany lakilasy ka tsy mahay mamaky teny ie. Fe vo tsiela zay, le nisy bokikely feno sary nanampy azy hahay a Ndranahary sady nahaizany hoe hisy raha soa biby hamea ze olo mijanjy a Ndranahary amy hoavy. Niazony tavy raha nianarany zay.

Ty Vavolombelo Jehovah ro nampiboaky bokikely io tamy 2011. Misy karazany roe bokikely io. Samby misy sary soasoa iaby rozy roe, fe ty raiky aminy tsy maro soratsy.

Fa ho amy safà 583 henanizao azy somary feno soratsy iny, na hoe bokikely Janjino Ndranahary le ho Velo Tsy Misy Farany Iha. Le amy safà 483 raiky tsy maro soratsy iny, na hoe bokikely Janjino Ndranahary. Mba ampitovizo amy Fanambarà Iharoam-pirenena mikasiky ty Zo ty Olombelo moa raha zay! Ty Firenena Mikamba ro nampiboaky raha io, le voadika tamy safà 413 ie tamy 2013. Laha atambatsy koa ty natao pirinty tamy bokikely roe reo, le fa ho 80 tapitrisa ty isakiny.

Falifaly njarahy be raiky ta Brezily tany zay nandramby bokikely hoe Janjino Ndranahary iny, ka hoy ty asany: “Falifaly aho mahay hoe, kay mba misy mpidary avao ty olo manahaky anay retoa. Tsy nirambesiko gazetinareo rey satria tsy mahay mamaky teny aho. Fe teako biby bokikely toy.”

Nisy ampela raiky atao hoe Brigitte mipetraky a Fransy any. Tsy mahay mamaky teny ie. Hoy ty asany: “Manenty sary amy bokikely io ao avao aho sanandro.”

Hoy ty Vavolombelo Jehovah raiky an’Afrika Antimo any: “Io ro bokikely farany ze mora ampiasà mba hanomboha resaky amy ty Sinoa, lafa hampianatsy ty fahamarina amy Baiboly ao. Samby fa nitoriako iaby ndre ty olo amy oniversite eny, ndre ty olo tsy mahay mamaky teny. Fa manampy ahy bokikely Janjino Ndranahary le ho Velo Tsy Misy Farany Iha, ka tsy ampy tapa-dera, le fa vitako ty mampita hevitsy fototsy baka amy Baiboly ao reo.”

Misy Vavolombelo Jehovah mampianatsy mpivaly nahita fianara, mipetraky an’Alemaina any. Azoazo nahoda iny bokikely iny, le hoy ty asany: “Manino tsy nameanareo ahy liany fa ela bokikely toy io? Kanefa toy ro manampy ahy hahazo soa ty tantara amy Baiboly ao noho ty raha volany ao!”

Nisy ampela mareny raiky ta Aostralia tany nivola hoe: “Fa maromaro tao zay ty niarahako nipetraky tamy ry masera tamy tranon-drelijiozy tany. Zaho ro marìny marè any mpitariky fivavaha tao reo, fe mbo tsy nisy tamin-drozy nampianatsy ahy mikasiky ty Fanjakà Ndranahary. Ty sary amy bokikely io ro nahaizako soa ty tena dika ty Matio 6:10.”

Nanoratsy ho zao ty sampa ty Vavolombelo Jehovah a Kanada any: “Maro aminolo baka a Sierra Leone mipetraky atoy ro mieky hoe miezaky mitory ty hafatsy amy Baiboly ao ty Vavolombelo Jehovah. Lafa nahita any bokikely Janjino Ndranahary amy safà Krio rozy, le nisy nivola hoe: ‘Mikarakara olo vatany nareo, tsy manahaky ty sisany.’”